भांगरभूंय | प्रतिनिधी
खबरां संस्था ः लग्न करुन बायल घोवाच्या घरा वता. पूण तिचें लग्न जाल्लें उपरांत तिच्या आवय-बापायच्या घरांत रावपाचो वा त्या घरा कडेन तिचो आता कांयच संबंद ना अशें मानूंक फावना अशें म्हत्वाचे निरीक्षण मद्रास उच्च न्यायालयान केलां.
पंचायत सचीव पदाचेर बायलेची नेमणूक जाली. पूण संबंदीत बायलेन चुकीचो पत्तो दिवन नोकरी मेळयली असो दावो करून मायकन्नन हांणी म्रदास उच्च न्यायालयांत याचिका दाखल केली. हे याचिकेचेर न्यायाधीश आर. एन. मंजुळा हांच्या खंडपिठा मुखार सुनावणी जाली.
न्यायाधीश मंजुळान स्पश्ट केलें, लग्न जाल्ली बायल घोवाच्या घरां रावता. पूण हाचो अर्थ लग्नाक लागून तिका आवय-बापायच्या घरांत रावपाचो अधिकार ना असो न्हय. लग्ना उपरांत वेगळें रेशन कार्ड मेळचें ह्या हेतान आवय-बापायच्या रेशन कार्डांतल्यान तिचें नांव काडून घोवाच्या रेशन कार्डात घालतात. हाचे वयल्यान लग्न जाल्ल्या बायलेन आपल्या आवय-बापायच्या घरां कडेन आशिल्ले सगळे संबंद तोडल्यात वा आवय-बापायच्या घराचीं दारां तिचे खातीर कायमचीं बंद जाल्यात असो निश्कर्श काडूंक फावना. लग्नाच्या नेमांत बायलेचेर अशी कसलीच अट घालूंक ना अशें न्यायाधीश मंजुळान फुडें स्पश्ट केलें.
पत्तो दवरप वा बदलप हे कांय परिस्थितींत लग्न जाल्ल्या बायलेच्या आनी तिच्या कुटुंबाच्या इत्से प्रमाण आसता. घरा वांगडा हे इत्सापत्र तिका निवासी प्रमाणपत्र म्हणून दिवपाक जाता अशें न्यायालयान याचिका न्हयकारतना सांगलें.
हो निर्णय बायलेचो
शरण्याचे आवय-बापूय अजून पंचायतींत आसात. तिका तिच्या सुविधे प्रमाण आनी पसंती प्रमाण आवय-बापायक भेट दिवपाचो वा रावपाचो अधिकार आसा. लग्न जाल्ले बायलेन आपली मूळ सुवात पुरायपणान सोडल्या अशें मानतात. पूण बायलेन आपलें जल्म घर आनी लग्न घर हांचे मदीं रावपाचें थारायल्यार तिका खंयचोय पर्याय वापरपाक आडावंक मेळना अशेंय न्यायालयान स्पश्ट केलां.
बायलेची निवड पितृसत्ताक नदरेन पळोवची न्हय
संबंदीत बायलेन आपल्या घोवा कडेन मतभेद आसात अशें सांगिल्लें. संबंदीत प्रकरण हे बायलेचे वैयक्तीक आशिल्ले. पूण याचिकादारान तिका खाजगी तथ्य उक्ते करचे पडले. बायल खंयच्याय बऱ्या वा वायट कारणांक लागून आवय-बापाय कडेन येता. तिका आवडटा तेन्ना ती थंय रावप पसंत करता. बायलेन आपल्या जल्म घरांत रावपाची निवड केल्यार तिच्या निर्णयाक पितृसत्ताक नदरेतल्यान पळोवचें न्हय अशें म्हणत न्यायालयान मायाकन्ननाची याचिका न्हयकारली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
