भांगरभूंय | प्रतिनिधी
-पर्यावरणीय दाखले दिवपाचे प्रक्रियेक नेट दिवपाचे आदेश
पणजी : पयल्या दोन पांवड्यार 9 खण ब्लॉकांची पावणी जाले उपरांत आतां तिसऱ्या पांवड्यार आनीक चार खण ब्लाकांची पावणी जातली. खणी सुरू जावपा खातीर पर्यावरणीय दाखले दिवपाची प्रक्रिया नेटान करपाचे आदेश मुख्यमंत्री डॉ. प्रमोद सावंत हांणी दिल्या.
मुख्यमंत्री डॉ. प्रमोद सावंत हांणी खण ब्लॉकांच्या पावणेचो नियाळ घेवपा खातीर बसका घेतली. हे बसकेक मुखेल सचीव पुनीत कुमार गोयल, पुलीस म्हासंचालक जसपाल सिंग, खण संचालक नारायण गाड हांचे सयत पर्यावरण खात्याचे अधिकारी हाजीर आशिल्ले. आतां मेरेन 9 खण ब्लॉकांची पावणी जाल्या. ह्या खण ब्लाकांतल्यान वर्साक 7.5 दशलक्ष टना मेरेन म्हाल काडप शक्य आसा. सर्वोच्च न्यायालयान वर्साक 20 दशलक्ष टन म्हाल काडपाची मर्यादा घातल्या. हाका लागून आनीक 12.5 दशलक्ष टना मेरेन म्हाल काडप शक्य जातले. खण लिजांतल्यान वर्साक कितलो म्हाल काडप शक्य आसा, ताचो अभ्यास सुरू आसा. वर्साक 20 दशलक्ष टन म्हाल काडपाक मेळटलो, अशे तरेन ब्लॉकांची पावणी जातली. आतां मेरेन 7.5 दशलक्ष टन म्हाल काडपाक मेळटलो, त्या 9 ब्लॉकांची पावणी जाल्या, अशी म्हायती खण संचालक नारायण गाड हांणी दिली.
आतां दक्षीण गोंयांतल्या 3 आनी उत्तर गोंयांतल्या एका खण ब्लॉकाची पावणी जातली, अशी म्हायती गोपांनी दिली.
ज्या खण ब्लॉकांची पावणी जाल्या, तांकां बेगिनांत बेगीन पर्यावरणीय दाखले मेळोवन त्यो सुरू जावपाचेर विचार जालो. पर्यावरणीय दाखल्यांची प्रक्रिया नेटान करपाचे आदेश पर्यावरण आनी रानां खात्याच्या अधिकाऱ्यांक दिल्या.
जानेवारींत दुसऱ्या पांवड्या वयली पावणेची प्रक्रिया पुराय जाल्ली. वेदांता, चौगुले, बांदेकार, फोमेंतो, साळगावकार शिपींग ह्या कंपनींनी ब्लाकांची पावणी मेळयल्या.
चिरे खणीच्या 36 आराखड्यांक मान्यताय
चिरे खणी तशेंच खडी काडपाक (मायनर मिनेरल्स) परवाने दिवपाचेर चर्चा जाली. चिरे खणीच्या 36 आराखड्यांक मान्यताय दिल्या. पर्यावरणीय दाखले मेळ्ळे उपरांत चिरे खणी तशेंच खडी काडपाचे परवाने जारी जातले. थारावीक मुजतीत परवाने दिवपाची प्रक्रिया सुरू करपाचे आदेश दिल्यात.
परंपरीक रेंव काडपाचे परवाने जारी जातले
रेंवेचो उणाव पयस करपा खातीर रेंव काडपाचे परवाने बेगीन जारी जावपाची गरज आसा. परंपरीक पद्दतीन रेंव काडपाचे परवाने जारी जातले. न्हंयांतल्यान रेंव काडपा विशीं एनआयओन अहवाल सादर केला. ह्या अहवालाक खंडपिठांत आव्हान दिलां. कायदेशीर प्रक्रियेचो अभ्यास करून परंपरीक रेंव काडपाचे परवाने जारी जातले.
भायल्यान रेंव आनी चिरे हाडपा खातीर ट्रान्सीट पास, रॉयल्टी तशेंच तालावाचेर बसकेत चर्चा जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
