भांगरभूंय | प्रतिनिधी
पुलीस उपअधिक्षक जिवबा दळवी
म्हापशेंः पर्यटकांचेर हल्लो करपाचो वा पर्यटकां कडेन गैरवर्तन करपाचो कोणाकूच अधिकार ना. तशेंच पर्यटकांक धमकी दिवन फटवणूक करची न्हय. पर्यटकांचो अपघात घडल्यार वा तांणी सोरो पियेल्यार रोखडेच पुलिसांक कळोवचे, अशें आवाहन पुलीस उपअधिक्षक जिवबा दळवी हाणी केलें.
शिवोले एका रेस्टोरण्टाच्या वाठारांत पर्यटकांचेर बाऊन्सर आनी सुरक्षा रक्षकांनी केल्ल्या हल्ल्याचे फाटभुंयेर हणजूण पुलीस स्टेशनांत आयोजीत बसकेंत दळवी उलयताले. ह्या वेळार रेस्टोरण्ट, पब आनी सुरक्षा एजन्सीचे धनी हाजीर आशिल्ले.
पर्यटक गोंयांत सुट्टी घालोवपाक येतात, तेन्ना तांकां मौजमजा करपाक आवडटा, जर पर्यटक सोऱ्याचे घुंवळेंत आसल्यार सदर आस्थापनाच्या धनयांनी तांकां टॅक्सी उपलब्ध करून दिवची जाका लागून ते सोऱ्याचे घुंवळे वाहन चलोवचे नात, हाची जतनाय घेवची. तशेंच तांचे वाहन सुरक्षीत दवरून दुसऱ्या दिसा तांकां परत करचे, अशी सुचोवणी दळवी हांणी केली.
तशेंच आपल्या रेस्टोरण्टांत आसपी कर्मचाऱ्यांची पडताळणी करची. तांची फाटभूंय पळोवची. तांकां कामार दवरतना पुलीस पडताळणी करप गरजेचें, अशें तांणी म्हणलें.
तशेंच आपल्या आस्थापनांत सुरक्षा रक्षक कर्मचारी दवरचो, बाऊंन्सर न्हय. ताका लागून हाचे मुखार सुरक्षा एजन्सी वा संबंदींत आस्थापनांनी बाऊन्सर बदला सुरक्षा रक्षक दवरचो. पुलीस बाऊन्सर दवरल्यार कशें सोंसून घेवचे नात, अशें स्पश्ट निर्देश रेस्टोरण्ट धनी आनी सुरक्षा रक्षक एजन्सींक दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
