भांगरभूंय | प्रतिनिधी
राज्याचो आकार जितलो ल्हान, तितली ताची उदरगत नेटान. गोंय हें ताचें बेसबरें उदाहरण. महानगर आनी ताचे सरभोंवतणी आशिल्ल्या उपनगरांचोय विकास वेगान जाता. मात, हें जातना कांय चुकीच्यो गजालीय घडटात. हांगाय देख म्हूण गोंय घेवं येता. उदरगती वांगडा लोकसंख्याय नियंत्रणा भायर वता. म्हारगाय वाडटा. ताचेच वांगडा गैरप्रकार, भ्रश्टाचार, गुन्यांवांकूय ओतो येता. राज्य ल्हान आसल्यार सरकारी कामां खातीर राजधानी शारांत वचपाक दीस, दोन दीस व्हगडावचे पडनात. लोकांचे त्रास उणे करपाक जिल्हे, तालुक्यांतलीं मुखेल शारां आसात. थंय सरकारी कामां जातात. मध्य प्रदेश, उत्तर प्रदेश, बिहार, आंध्र प्रदेश हे सारक्या कांय राज्यांचीं दोन राज्यां केल्यांत. ताचो थंयच्या लोकांक फायदो जाला. मात, सैमीक संपत्ती दुसऱ्या राज्यांत गेल्ल्यान लुकसाणूय जालां. राज्यां व्हडलीं आसलीं काय तातूंतल्या कांय तालुक्यांची उदरगत कांसवा गतीन जाता. देश स्वतंत्र जावन 75 वर्सां जावन गेलीं. मात आमच्या देशांतले कांय तालुके अजून मागास आसात. हाका अर्थांत सरकारां जापसालदार!! गोंयांत फाटल्या 20 वर्सां सावन तिसऱ्या जिल्ह्याची मागणी जाता. सध्या उत्तर गोंय आनी दक्षीण गोंय अशे दोन जिल्हे आसात. ह्या नव्या पूर्व गोंय जिल्ह्यांत फोंडें, धारबांदोडें आनी सत्तरी तालुक्यांचो चड करून आस्पाव जावं येता!!
तिसऱ्या जिल्ह्याच्या मुख्यालया खातीर, सरकारी कार्यालयां खातीर कुट्टी फोंड्यां सरकारी जमीन आसा, अशें शेतकी मंत्री रवी नायक हांणी काल म्हणलां. मनोहर पर्रीकार आसतना तांणीच तिसऱ्या जिल्ह्याची मागणी करपी खाजगी थाराव मांडिल्लो. उपरांत सरकार ताचेर अभ्यास करता, अशें आस्वासन मेळिल्ल्यान तो फाटींय घेतिल्लो. आतां हो विचार परत एकदां सामकार आयला. हालींच ह्या नव्या जिल्ह्याचो अभ्यास करपाक सरकारान स वांगड्यांची एक समितीय स्थापन केल्या. ती तीन म्हयन्यांत अहवाल सादर करतली. हें नवें पावल उखलतना लोकांचे विचारूय घेवचे पडटले. तातूंतले म्हत्वाचे चालीक लावचे पडटले. अजून ते विशीं थळावे फुडारी जागृत जावंक नात. तांचीं मतां फुडल्या 1- 2 दिसांनी येतलीं. तांचो विरोध आसा काय तेंको तेंवूय कळटलें.
ह्या जिल्ह्या खातीर अर्थीक तजवीज करची पडटली. कितल्या लोकांक जिल्ह्याचो फायदो जातलो, तेंवूय पळोवचें पडटलें. जिल्ह्या खातीर ज्या तीन म्हालांचीं नांवां मुखार आयल्यांत, तातूंत तिनूय म्हालांनी रानां आसात. हो सैम सांबाळचो पडटलो. भौशीक उदरगतीचे नदरेन फाटीं आशिल्लो धारबांदोडें म्हाल हांगा आसा. ताचे उदरगती खातीर हो नवो जिल्हो उपेगी पडपाक जाय. मंत्री रवी नायक हांणी लोकांक आतां सरकारी कामां खातीर पणजे, मडगांवां वच्चें पडटा. ह्या जिल्ह्याचें मुख्यालय कुट्टी फोंड्यां जाल्यार लोकांचो वेळ आनी पयसो वाटावतलो अशें म्हणलां. जिल्ह्याची शीम अजून थारूंक ना. कितल्यो पंचायती आसतल्यो, तेंवूय थारपाचें आसा. हें काम शिमग्या पयलीं पुराय जातलें अशी आस्त.
नोकऱ्यांचे बाबतींत सत्तरी, फोंडें तालुके तशे मुखार आसात. म्हणटकूच धारबांदोडें तालुक्यांतल्या बेरोजगारां कडेन लक्ष दिवचें पडटलें. शेती- बागायती मळाचेर सत्तरी, फोंडें, धारबांदोडें उदरगत करीत आसा. ल्हान जिल्हो जातकच हें पाचवें मळ तशेंच फुलिल्ले उरपाक जाय. लोकांक बुन्यादी सुविधा मेळपाक जाय. फक्त सरकारी कार्यालयां लागीं आयलीं म्हूण जायना. तीं चड कार्यक्षम जावचीं. विशेश म्हणल्यार फोंडें म्हालांत वीज, खेळां, उदका स्रोत, शेतकी खात्याचे मेळून चार मंत्री आसात. सत्तरी म्हालांत एक मंत्री आसा. उत्तर गोंया परस दक्षीण गोंय जिल्हो लोकसंख्या आनी आंवाठान व्हडलो. म्हणटकूच तिसरो जिल्हो करपाक तशी अडचण येवची ना. फुडाराक जनगणना जावपाची आसा. ताचे वांगडाच मतदारसंघाची फेररचणुकूय जातली. सध्या 40 मतदारसंघ आसात, घडये तांचो आंकडो वाडूं येता. कारण गोंयची लोकसंख्या नेटान वाडत आसा. राखीव मतदारसंघूय वाडपाचे आसात.
नवो जिल्हो करचोच, पूण थळाव्या लोकांची आनी त्या वाठारांची सर्वांगी उदरगत जावची, हे नदरेन कार्य करचें पडटलें. हांगाचो सैम तिगून उरतलो, हाचेर चड भर दिवचो पडटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
