धाडस जाताच कशें?

भांगरभूंय | प्रतिनिधी

बेकायदेशीर परवानो दिवपाचें धाडस कोणाकूच जावंक जायना, टक्केवारी, हप्ते घेवचे पयलीं तांकां कलकल सुटपाक जाय, अशीं पावलां उखलप शक्य आसा?

सैम संवेदनशील वाठारांत बेकायदेशीर बांदकामां बांदपाक मेळनात. खास करून दर्यादेग नियमन क्षेत्रांत (सीआरझॅड) तर कांयच करपाक मेळना. आयच्या म्हायती तंत्रज्ञानाच्या युगांत हें सगल्यांक खबर आसा. तरीय कांय जाण मस्तेपणां करतात. जाय थंय जाय तें करतात आनी मागीर …. कांय तेंपान सरकारी यंत्रणा तें बेकायदेशीर बांदकाम कायदेशीर करतात. दरवर्सा अळंबी येवचीं तशीं हीं बांदकामां येतात आनी दरखेपे उदार अंतकरणाचीं सरकारां तीं नियमीत करतात. मात, दोन दिसां पयलीं मुंबय उच्च न्यायालयान (गोंय) एक म्हत्वाचो निवाडो दिला. तो म्हणल्यार सैम संवेदनशील, खास करून सीआरझॅड वाठारांतलीं बांदकामां नियमीत करपाक मेळचीं नात. ताका लागून अधिकारी, लोकप्रतिनिधींच्या पांयांर घालून घेवन बांदकामाच्या संरक्षणाची भीक मागप्यांक हाचे मुखार घडये असलीं बांदकामां वाटावपाक मेळचीं नात. न्यायसंस्थेन हो बेकायदेशीर कामांचेर घाल्लो घणूच म्हणचो पडटलो.
सरकारान फाटल्या कांय वर्सांनी दर्यादेग वाठारांतल्यो खोपी, सीआरझॅडाचे नेम माड्डून बांदिल्लीं तात्पुरतीं घरां, शेडी कायदेशीर केल्यात. अशें जातकच मागीर बांदकाम एक ना एक दीस कायदेशीर जातलें हे आशेन कांय जाण मुद्दाम तें उबारपाचें धाडस करतात… आनी तातूंतल्या कांय जाणांक तें कायदेशीर करून घेवपाक यशूय येता. एका गांवांतली जमीन लोकांच्या नांवार जावपाची आसा, हें कळटकच रातयां थंय घरां उबीं जाल्लीं आसात! कोमुनिदादींच्या जमनींचेर बेकायदेशीर प्रकार जाल्यात ताका शीम- मेर आसची ना. 1993 वर्सा कितली जमीन आशिल्ली आनी 30 वर्सां उपरांत आतां कितली उरल्या? तातूंतली सरकारान कितली घेतल्या, कोमुनिदादीन कितली विकल्या आनी कितले जमनीचेर अतिक्रमण जालां, हाचो नियाळ घेतल्यार सत्य परिस्थीती कळटली आनी चड करून ती धक्को दिवपी आसतली!
दोन रुपया चोरपी गुन्यांवकार आनी दोन लाख चोरपीय गुन्यांवकारुचू. तरीय जमनींचेर बेकायदेशीर दुरीग, शेड घालप्याचें एकवेळ समजू येतां, पूण हांगा चार – चार मजली इमारती उबारल्यात. त्योय सैम संवेदनशील वाठारांत. न्हंयेचे देगेक. कसलीच कायदेशीर परवानगी घेनासतना!! हालींच असलीच एक इमारत मोडपाचो आदेश न्यायालयान दिल्लो. ती मोडपाचे आशिल्ले. पूण तें काम स्थगीत जालें. तो राष्ट्रीय एकचार दीस आशिल्लो! 31 आॅक्टोबर!!
हरमलाच्या नागरिकान सीआरझॅडांत बेकायदेशीर बांदकाम केलां अशी कागाळ एकल्यान पंचायती कडेन केल्ली. कोण हालचाल करिना म्हूण तो पंचायत उपसंचालका कडेन गेलो. त्या बांदकामाचो 2009 त पंचनामो जाल्लो. तळमजलो आनी वयलो एक मजलो मोडपाचो आदेश पंचायत उपसंचालकान 2012 दिलो. ताका त्या नागरिकान पंचायत संचालकां मुखार आव्हान दिलें. तांणी 2014 त उपसंचालकांचो आदेश रद्द जालो. मागीर हें बांदकाम नियमीत करपाचो अर्ज त्या नागरिकान केलो. ताका कागाळ करप्यान जिल्हो न्यायालयांत आव्हान दिलें. परत 2021 त तें बांदकाम मोडपाचो आदेश कायम उरलो. मागीर जीसीझॅडएमए कडेन बांदकाम नियमीत करपाचो अर्ज केलो. उपरांत न्यायालयान तें बांदकाम मोडपाक स्थगिती मेळ्ळी. उपरांत त्या नागरिकान तें बांदकाम नियमीत करपाचे जीसीझॅडएमए आनी पंचायती कडेन केल्ले अर्ज निकालांत काडपाची मागणी उच्च न्यायालयान कडेन केली. तेन्ना खंडपिठाक तें बेकायदेशीर बांदकाम आशिल्ल्याचें आनी तें वाटावपाचो यत्न जाला, अशें दिसून आयलें आनी तांणी बेकायदेशीर बांदकाम नियमीत करपाक मेळना, अशें निरिक्षण नोंद केलें. बांदकाम नियमीत करपाचो यत्न फळादीक जायत हे आशेन 2012 सावन हें बांदकाम मोडूंक नाशिल्लें. तें नियमीत करपाक उच्च न्यायालयांत याचिका केली आनी आतां सुनावणे उपरांत त्या नागरिकाक दोन म्हयन्यां भितर तें मोडपाचो आदेश कोर्टान दिला. बुद्दीबळाची मॅच जिखपाक एकूच खेळी जाय आनी इतल्यान विरोधकान चेकमेट करून तोंडा कडेन आयिल्लो घांस व्हरचो, तसो कांयसो हो प्रकार जाला.
हीं बेकायदेशीर बांदकामां करपाचें धाडस येता खंयच्यान? एकूय परवानो, दाखले घेनासतना ते पावल मुखार घालताच कशे? कोणाचो तरी आशिर्वाद आसले बगर हें शक्य ना. बेकायदेशीर कामांच्यो केशी येतात तेन्ना हें जावपा फाटल्यान कोण आसात, तें न्यायसंस्थेचे नदरेक घडये येता आसतलें. त्या अधिकाऱ्यांक, लोकप्रतिनिधींक ख्यास्त करप कायद्यान शक्य आसा? बेकायदेशीर परवानो दिवपाचें धाडस कोणाकूच जावंक जायना, टक्केवारी, हप्ते घेवचे पयलीं तांकां कलकल सुटपाक जाय, अशीं पावलां उखलप शक्य आसा? सैम संवेदनशील वाठारांत, सीआरझॅड विभागांतलीं बांदकामां हाचे मुखार नियमीत करपाक मेळचीं ना, अशें न्यायालयान म्हणलां. आतां कायद्यांतल्यो पळवाटो सोदिनासतना मुखार वचुंया. पर्यावरण सांबाळुया!