भांगरभूंय | प्रतिनिधी
20 सप्टेंबर ते 4 ऑक्टोबर ह्या दिसा मजगतीं, हांव जॉर्डन-इस्रायल देशांची पयसुल्ली भोंवडी करून आयलों. 7 ऑक्टोबराच्यान थंय मोटे गॅर्र पेटलें. येदे व्हडले भोंवडे परस त्या गॅर्रांतल्यान हांव बरो वाटावलों. हाचेंच जणएकल्याक कवतूक दिसलें. पुराय जॉर्डन-इस्रायलाचे भोंवडेंत म्हाका खंयच पुलीस दिसले नात. दिसले ते थोडेभोव सुरक्षा कर्मी. झगडीं जावं गुन्यांव जंय जातात, थंयच पुलीस जाय. हाचो अर्थ ह्या दोनूय देशां भितर तसले वायट प्रकार घडनात, असो अर्थ जालो ना! ऑस्ट्रेलिया देशांतूय अशेंच खंय. त्या देशाची भोंवडी करून आयिल्ल्या एका बँकेच्या मॅनेजरान म्हाका सांगलें, रात-दीस खंय थंयचीं दुकानां उक्ती. जाय-जाय तो म्हाल-वस्तू बॅगांत भरून घेवप. ताचे दुडू ऑनलायन फारीक करप, आनी चलूंक लागप. हांगा फक्त लागता तें मनशां भितरलें प्रामाणीकपण. मनाचें खरेंपण! हाचे उरफाटी सगली आमगेल्या देशांतली परिस्थिती. दुकानां भितर म्हाल दिवपी-घेवपी मनशांची गर्दी. भोंवतणी पावला-पावलार म्हणटात तशे पुलीस. गाडयांची गर्दी सांबाळपाक, तशेंच मनशांलीय गर्दी सांबाळपाक. स्कुला-कॉलेजी सुटली की थंयच्या विद्यार्थ्यांचेर, वाहनांचेर नियंत्रण दवरपाक पुलीस. जात्रा, सण-परबो आयल्यो की शेंकड्यांनी पुलीस बंदोबस्ताक. पुलिसां बगर आमची भौशीक जीण एक पावल मुखार मारपाक कुस्तार. अशी पुराय देशभर परिस्थिती. दुकाना भितर मालका सयत गिरायक करतले मनीस. तांगेली हिसपा भायर मनीस वरां फुकट, पेड्डेर. पुलिसांल्या फुकट, पेड्डेर जातल्या मनीस वरांचो हिशेब केन्ना कोणाक लागचो ना. देशभर लाखभर तरी पुलीस स्टेशनां. थंय ड्युटी करपी कोट्यांनी बायल-दादले पुलीस. तांगेलें मुखेल काम गुन्यांव जातात ते आडावप. एके भशेन हो आमगेल्या राजकी वेवस्थेचो आपल्याच नागरिकांचेर अविस्वास. खंय तरी हो अविस्वास घेवन बसपाक मर्यादा आसपाक जाय. गुन्यांव घडटात देखून पुलीस फोर्स सांबाळप. हें गणीत आमगेल्या देशांतल्यान केन्ना बिटकी कवळटले काय?
गुन्यांव कित्याक जातात? चडशे गरजेंतल्यान. गुन्यांव करपी, ना करपी तशेंच गुन्यांवकारांक ख्यास्त दिवपी पुलीस! हे सगले जाण मनिसूच. तशेंच जायत्या देशांनी मनशां बगर चलपी विक्रेची वेवस्था हिवूय मनशांनी मनशां पासत सुरू केल्ली वेवस्था. भारतांत इतली सगली ही पुलीस वेवस्था पळोवन हांगासर गुन्यांव करतल्यांक फावो अशें वातावरण आसा हें सिद्ध जाता. आतां गुन्यांव करतल्यांक खंयच्यान तरी गुन्यांव करपाची प्रेरणा मेळ्ळे बगर हांगासर इतले गुन्यांव घडटात? देखून ते आडावपाक आमकां पुलिसांचें येदें व्हडलें बळगें सांबाळचे पडटा. हय मूं? तशें जाल्यार गुन्यांव करपाची प्रेरणा जावं देख सामान्य लोकांक दिवपी ती कोण? असो विचार करतकूच आपशीच आमगेलीं बोटां देशाच्या राजकारण्यां वटेन घुंवतात. कित्याक तर ह्या धर्तरीचेर जल्मल्लो मनीस आपूण जावन केन्नाच गुन्यांवकार जावचो ना, वा तोच वेवसाय करपाचीं सपनां चिंतचो ना. पोटाची भूक मनशालो दुडवांचो हावेस वाडयता. हें खरें. पोटाचे भुकेक मर्यादा आसता. देखून दुडवांच्या हावेसाचेर बंधनां येतात. पूण राजकी हावेस ही एक अशी गजाल जंय दुडू एकठांय करपाक मर्यादा नासता. तशेंच राजकारणांतली एका परस दुसरी व्हडली वात मेळोवपाक कसलीच शीम-मेर ना. गुन्यांव आनी गुन्यांवांक पोसवण दिवपी हो वाठार! अशे भशेन ताचें राजकारण आयज नामनेक पावलां. सहाजीकपणान देशांतले नवे पिळगेक संवसाराची वळख करून घेतना ह्या गुन्यांवकारी वाऱ्याची बादा जाता. राजकारण हें सदांच निवळ आसपाक जाय. अशें म्हणटा म्हणटा राजकारण बऱ्या मनशांक न्हय, अशें आमी म्हणपाक लागले. आयज गुन्यांवकारी फाटभुंये बगर आयचे राजकी क्षेत्र मुखार पावल मारिना. इतलें वायट रूप देश पांवडो ते पंचायत पांवड्या मेरेन राजकारणाक रूप आयलां. अशे हे परिस्थितींत गुन्यांव करतल्यांक, गुन्यांव करीत दुडू जोडटल्यांक तशेंच गुन्यांव, दुडू एकठांय हाडून राजकारण करतल्यांची देख नवी पिळगी घेवपाक लागली, जाल्यार तातूंत अजाप ना.
राजकारणान देशाची ही असली प्रतिमा तयार केल्या. ताका लागून पुलीस आमचे समाजवेवस्थे भितर आसप हें आयज अनिवार्य जालां. थोडे भितर राजकारणाचें गुन्यांवीकरण जालां. देखून ते भिरांतेक आडावपाक पुलीस वेवस्थेचेर विस्वास दवरपी आमची मानसीकता जाल्या. लोक आपूण जावन कायद्याक पाळो दीत, प्रामाणीकपणान वागतात, वायट गजाली सोंपोवपाची चिंतना चिंततात. देखून त्या देशांनी पुलीस फोर्स ना. मार्केटांनी गटारां सोड, कोयराचो एक कुडको लेगीत आमकां थंय दिसलो ना. हीं कामां ते लोक आपले बुद्धीन वावरत, प्रत्येक सुवात आपूण जावन निवळ दवरपाचे जाणविकायेन करतात. दीस-रात पुलिशेच्या धाकाची थंय गरज पडना. पसरकारां बगर पसरे, म्हाल विकतले मनशां बगर आस्थापनां. गुरखे, पुलिशेचे राखणे बगर फक्त ऑनलायन दुडू फारीक करपाचे वेवस्थे खाला दुकानां. आमच्या देशांत अशी वेवस्था आमी आयज सपनांत तरी चिंतपाक शकतात?
पुलीस आनी त्या यंत्रणे खाला पुराय वेव्हार. ही वेवस्था ब्रिटीश राजवटीन हांगासर चालीक लायिल्ली. कारण त्या राजवटीक भारतीय मनशांचेर निखालस विस्वास नाशिल्लो. तशेंच ब्रिटिशांक ह्या देशाचेर जाता तितलो हात मारूंक पुलिसी भंय हांगासर कायम दवरपाक जाय आसलो. ब्रिटीश वचून 70 वर्सां वयर सोंपलीं. आमचे मनीस हो देश आतां चलयतात. पूण भारतीय मनशांक आपले म्हणणें म्हणपा इतलो विस्वास आमचे शासन वेवस्थे भितर रुजवणा येवंक ना? वाडटी पुलीस यंत्रणा त्या अविस्वासाचीच गजाल ठामपणान समाजा भितर मांडटा. जॉर्डन, इस्रायल, ऑस्ट्रेलिया तशेंच संवसारांत आनीक कितल्या देशांनी पुलीस यंत्रणा ना. हें म्हाका खबर ना. पूण पुलीस यंत्रणे बगर वेवस्थेचेर लोकांचो विस्वास अदीक आसा हें सांगप आनीक प्रत्यक्षांत तशें वावरप, तशी सुरवात करप हातूंत फरक आसा. शाळांनी, स्कुलांनी वचपी निरागस मनान निवळ भुरग्यांचे नदरेन. नागरिका वटेन पळोवपाची ही एक जिणे वयली आस वाडोवपी नदर. आमगेल्या शासनान प्रायोगीक तत्वाचेर तरी ती सुरू करची. पुलिशेचो कमीत कमी उपेग ह्या तत्वाचेर सुरवात करून जर यंत्रणे भितर बदल केले जाल्यार आनीक एक 50-100 वर्सांनी तरी पुलिशे बगर शासन वेवस्था देशा भितर प्रत्यक्षांत हाडपाची सपनां आमी खरी जाल्ली पळोवपाक शकतात. बंदिस्त अशें पुस्तकी शिक्षण सुमारा भायर जालें. आमकां आमगेल्या भुरग्यांक. जिणेचे वास्तवीक धडे शिकोवन मनाचें शिक्षण शिकोवपाची सुरवात आतां जावपाक जाय. डिगऱ्याे शिक्षणान आमकां खूब दिल्यो. मनाक ट्रेनींग दिवन संवसारांत बरे भशेन वावुरपाक शिकोवपी भंया विरयत रावपाक अदृश्य सर्टिफिकेटींची आयज गरज आसा.
महेश पारकार
9420768518
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
