भांगरभूंय | प्रतिनिधी
लागीं लागीं वर्सभरा आदली खबर. कर्नाटक राज्यांतल्या उडुपी जिल्ह्यांतल्या मणिपाल इन्स्टिट्यूट ऑफ टॅक्नोलॉजी ह्या उंचेल्या पांवड्या वेलें शिक्षणीक संस्थेंत शिक्षकान भर वर्गांत एका अल्पसंख्य विद्यार्थ्याची तुळा अजमल कसाब ह्या आंतकवाद्या कडेन केली. आपल्या वर्गांतल्या भौसंख्य धर्मीय विद्यार्थ्यां इतलीच राष्ट्र निश्ठा बाळगुपी त्या तरणाट्या विद्यार्थ्याच्या संवेदनशील मनाचेर कितें परिणाम जावं येता हाचो त्या प्राध्यापकान इल्लोय विचार केलो ना. सबंद संवसारांत धर्माच्या नांवाचेर आतंक चलिल्लो आसतना शिक्षकांनी दुस्वासाच्या ह्या उज्यांत तेल घालप कितलें योग्य?
आयज समाज माध्यमांचेर कांय शिक्षक धर्मीक दुस्वासाचे, फटीचेर आदारिल्ले पोस्ट दोळे धांपून फॉरवर्ड करतना दिश्टी पडटात. तांचें खरेपण नियाळपाचीय तकालस ते घेनात. साबार विद्यार्थी शिक्षकांचेर दोळे धांपून विश्वास दवरतात आनी तांच्या जिणे शैलीचें अनुकरण करतात. देखूनच तांकां योग्य म्हायती दिवप आनी तांचे मदीं सारासार विचार करपाची तांक निर्माण करप ही आपली लागणूक हाचें भान असले शिक्षक दवरनात. फाटल्या 30 जानेवारीक गांधीजींच्या स्मृतीदिसा एका शिक्षकान ‘नथुराम गोडसे अमर रहे’ म्हूण एका व्हॉटस्एप ग्रुपार कमेंट घालो. गांधी हत्येचें समर्थन करून नथुराम गोडसेची तोखणाय करप शिक्षकाक सोबता? त्या दिसा शाळेंत गांधी जयंती मनयतना खंयच्या तोंडान तो भुरग्यां मुखार उबो राविल्लो आसतलो?
कांय वर्सां आदीं कुडचडें वाठारांत धर्मीक दंगल जाल्ली. त्या वेळार गोंयच्या शिक्षणीक मळार व्हड नांव आशिल्ल्या एका राष्ट्रीय शिक्षक पुरस्कार प्राप्त शिक्षकान तत्कालीन सुनापरान्त दिसाळ्यांत एक लेख बरयिल्लो. तांतूंत ताणें अल्पसंख्यांकां विशीं आक्षेप घेवपा सारखीं विधानां केल्लीं. एका नामनेच्या विद्यालयाचो तो तेन्ना प्राचार्य आशिल्लो. तांच्या शाळेंत शिकतल्या विंगड विंगड धर्मांच्या विद्यार्थ्यांनी ह्या राष्ट्रीय आदर्श शिक्षका कडेन खंयचे नदरेन पळोवचें आनी कसलो आदर्श घेवचो?
‘हिन्दू खतरे मे है’ ह्या माथाळ्या खाला हालींच मुख्याध्यापक म्हूण निवृत्त जाल्ल्या एका व्यक्तीन व्हॉटस्एपार म्हाका मॅसेज धाडलो. हिन्दूंची लोकसंख्या फाटल्या कांय वर्सांत कशी व्हड पांवड्यार देंवत आसा आनी मुस्लीम धर्मियांची लोकसंख्या कशी वाडटा आनी ही परिस्थिती अशीच उरली जाल्यार 2041 सालांत मुस्लीम लोकसंख्या पंच्यांयशीं टक्के जावन हिन्दूंची लोकसंख्या इकरा टक्क्यांचेर कशी येतली ताचो हिशेब ते मॅसेजींत आशिल्लो. आयचे घटकेक मुस्लीम धर्मियांची लोकसंख्या लागीं लागीं पंदरा टक्के आसा आनी हिन्दूंची पंच्चात्तर टक्के. अठरा वर्सांत मुस्लीम लोकसंख्या पंच्चात्तर टक्क्यांचेर पावतली जाल्यार दरेका मुस्लीम जोडप्यागेर वर्साक दोन-तीन तरी भुरगीं जल्माक येवचीं पडटलीं इतलेंय तर्कीक लागीं लागीं तीस वर्सां विज्ञान विशय शिकयिल्ल्या त्या शिक्षकाक कशें कळना? दुर्दैवान, समाजांत मानाची आनी विश्वासाची सुवात आशिल्ल्या कांय शिक्षकांनी आपली बुद्द घाणाक दवरल्या.
व्हॉटस्एपाचेर आयिल्लो धर्मीक दुस्वास निर्माण करपी एकाद्रो मॅसेज फॉरवर्ड करचे आदीं ताच्या खरेपणाची खात्री करपाची तकालस हे शिक्षक घेनात. विद्यार्थां मदीं विज्ञानीक नदर तयार करपाची जापसालदारकी आशिल्ले शिक्षकच जर वैचारीक नदरेन खांकनवाळ जाले जाल्यार विद्यार्थ्यांनी आदर्श तो कोणाचो घेवचो?
शिक्षकान सदांच धर्मीक, अर्थीक, समाजीक पांवड्यार समानतेचो आदर्श आपल्या विद्यार्थ्यांक घालून दिवंक जाय. ते खातीर स्वता तीं तत्वां आचरणांत हाडपाक जाय. वर्गांत भुरग्यांची बांकार बसपाची वेवस्था जाती-धर्माच्या निकशाचेर करपी कांय शिक्षक हांवें पळयल्यांत.
फाटीं, उत्तर प्रदेशांतल्या मुजफ्फरनगरांत एके शिक्षिकेन वर्गांतल्या एका अल्पसंख्य भुरग्याक हेर भुरग्यांनी ताचेर थापटां मारपाची ख्यास्त दिली. गणीत विशयाची ताणें दिल्ली जाप चुकीची आशिल्ली इतलोच त्या भुरग्याचो गुन्यांव आशिल्लो. खंतीची गजाल म्हणल्यार ही शिक्षिका धर्माचें नांव घेवन ही करणी करताली. असली शिक्षिका फुडाराचे आदर्श नागरीक घडोवंक शकतली? दुर्दैवान भुरग्यांक तांच्या कंवळ्या पिरायेचेर अशीं धर्मीक दुस्वासाचीं इंजेक्शनां दिवपी साबार शिक्षक दरेका धर्मांत आसात.
शिक्षका कडच्यान विद्यार्थ्यांक शिक्षीत करपाचो, समाजाक विंगड विंगड विशयांचेर जागृत करपाचो वावर जावचो अशी अपेक्षा आसता. कारण शिक्षकाक मानपी आनी ताचें अनुकरण करपी एक व्हड घटक आसता. देखूनच ताची जापसालदारकी वाडिल्ली आसता.
शिक्षकांनी आपल्या भुमिकेन सदांच विद्यार्थ्यांक एक आदर्श घालून दिवंक जाय. जात- धर्म हो आयच्या तंत्रज्ञान आनी विज्ञानीक उदरगतीच्या युगांत काळा भायलो विशय हें भुरग्यांक पटोवन दिवंक जाय. भौशीक जिवितांत आनी राष्ट्राचे घडणेंत धर्मीक एकचाराचें म्हत्व तांकां शिक्षकांनी पटोवन दिवंक जाय. धर्म मोगाचो अतिरेक जाता तेन्ना समाजीक एकचाराक वेंर वता. शिक्षणान परिपूर्ण मनीस घडचो अशीच तर अपेक्षा आसता. क्रांतिवीर नांवाच्या एका हिन्दी चित्रपटांत नाना पाटेकराचो एक फामाद संवाद आसा. धर्माच्या नांवार अल्पवयीन भुरग्यांक खुबळावपी एका अल्पसंख्यांकाचें आनी आपल्या बोटाचें रगत एकठांय करून तो ताका विचारता, “बता, इसमें मुसलमान का कौन सा और हिन्दू का कौनसा? अगर बनाने वाले ने फरक नहीं किया तो तू कौन होता है फर्क करने वाला?” शिक्षकांची धर्मा विशीं हीच भुमिका आसपाक जाय.
फाल्यांची एक सक्षम पिळगी घडोवपाचें व्हड आव्हान आनी जापसालदारकी आपल्याचेर आसा हें शिक्षकांनी मतींत दवरपाक जाय. भुरग्यांक धर्मीक एकचाराची शिकवण मेळची देखून आमच्या शिक्षण वेवस्थेंत साबार येवजण्यो आंखिल्ल्यो आसात. शाळांनी त्यो प्रभावीपणान राबोवंक जाय. हो एकशें चाळीस कोटी भारतीयांचो अखंड देश. अखंड उरलो जाल्यारच तो फाल्यां संवसाराचेर शेक गाजोवंक पावतलो. तशें घडटलें जाल्यार एकचारांत विस्वास दवरपी एक सक्षम पिळगी आमकां शिक्षकांक तयार करची पडटली. देखूनच धर्माचो पुरस्कार करचे सुवातेर मनीसपणाचो पाठ शिकोवपी शिक्षकांची आयज देशाक चड गरज आसा.
अनंत अग्नी
9422439903
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
