भांगरभूंय | प्रतिनिधी
‘लॅन्सेट’चो अहवाल, अमेरिका, चीनाचोय आसपाव
नवी दिल्ली, खबरां संस्था : भारतांत 2020 वर्सा 30 लाख 2 हजार मुजतपूर्व बाळंतपणा (जल्म) जाल्यांत. हो आंकडो ह्या काळांत संवसारभर मुदतपूर्व जल्म जाल्ल्या वट्ट केशींच्या 20 टक्क्यां परस चड आसा. हो दावो ‘लॅन्सेट’ ह्या विज्ञान नेमाळ्यांत उजवाडाक आयिल्ल्या अभ्यास अहवालांत केला.
संवसारीक भलायकी संघटना (डब्ल्यूएचओ), संयुक्त राष्ट्रांचो बालकल्याण निधी (युनिसेफ) आनी ब्रिटनांतल्या लंडन स्कूल ऑफ हायजीन अँड ट्रॉपिकल मेडिसीन हांच्या संशोधकांनी केल्ल्या संशोधनांतल्यान, 2020 वर्सा 50 टक्क्यां परस चड मुदतपूर्व जल्म फकत आठ देशांनी जाल्ल्याचें दिसून आयलां. त्या देशांत भारत, पाकिस्तान, नायजेरिया, चीन, इथिओपिया, बांगलादेश, काँगो प्रजासत्ताक आनी अमेरिकेचो आस्पाव आसा.
ह्या देशांतली व्हड लोकसंख्या, चड जल्म प्रमाण आनी दुबळी भलायकी वेवस्था हीं मुदतपूर्व जल्म जावपाचें प्रमाण चड आसपाचीं मुखेल कारणां आसात. संवसारीक पांवड्यार 2020 वर्साचे सुरवेक 1 कोटी 34 लाख भुरगीं जल्माक आयल्यात. तातूंतल्या सुमार 1 कोटी भुरग्यांक अकाली जल्माक लागून जावपी गुंतागुंतींक लागून मरण आयलें. हो आंकडो संवसारभर मुदतपूर्व (गर्भधारणेक 37 सप्तकां पूर्ण जावचे पयलीं) जल्मल्ल्या दर धा भुरग्यांतल्या एका भुरग्या बरोबर आसा. अकाली जल्म हें भुरगेपणांत मरण येवपाचें मुखेल कारण, अशें संशोधकांनी सांगलें. देखून अकाली जल्मल्ल्या भुरग्यांची जतनाय घेवपा सयत आवयचे भलायकेचेर आनी पोशणाचेर लक्ष केंद्रीत करपाची बेगोबेग गरज आसा.
चडशे मुदतपूर्व जल्माचें प्रमाण उण्या उत्पन्नाच्या आनी मध्यम उत्पन्नाच्या देशांनी आनी प्रदेशांनी चड आसता अशें संशोधकांनी सांगलां. ग्रीस, अमेरिके सारक्या चड उत्पन्न आशिल्ल्या देशांनी लेगीत 10 टक्के वा ताचे परस चड प्रमाण मेळ्ळां. दक्षिण आशियांत बांगलादेशांत 2020 वर्सा सगळ्यांत चड मुदतपूर्व जल्म दिवपाचें प्रमाण (16.2 टक्के) नोंद जालां. ताचे उपरांत पाकिस्तान (14.4 टक्के) आनी भारत (13 टक्के) आसा.
मुदतपूर्व जल्मल्ल्या भुरग्यांचे भलायकेक धोको निर्माण जाता. हो अभ्यास लोकसंख्येचेर आनी राष्ट्रीय प्रतिनिधीक आंकड्यांचेर आदारीत आसा. देखून आंतरराष्ट्रीय तुळा करपा खातीर 2020 वर्सा खातीर देश पातळेचें मुल्यांकन तयार करपाक मेळटलें, अशेंय अहवालांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
