भांगरभूंय | प्रतिनिधी
हालींच 2 ऑक्टोबराक आमी गांधी जयंती नेटान मनयली, पूण त्या दिसा शास्त्री ह्या आदल्या प्रधानमंत्र्याची लेगीत जयंती आसता, हाचो उगडास करचो पडटा. कारण ना म्हणलें तरी २ ऑक्टोबर हो गांधी जयंतीचो दीस अशें जायत्या जाणांच्या तोंडान आसता. गांधी साहित्याचेर खुबशा शैक्षणिक संस्थांनी विद्यार्थ्यांक शिकपा खातीर अभ्यासक्रम आसता. फक्त आमच्या देशांतूच न्हय तर संवसारभर गांधीजींचें नांव आसा. ते आफ्रिकेक आसतना तांचे भितर एक क्रांती जाली आनी आमका महात्मा मेळ्ळे. हेर फुडारी गांधी भशेन संवसारभर पावपाक फाटीं पडले. ताचीं कारणां राजकी आसूं शकतात. पूण हेर व्हड नेत्यांचें लेगीत तत्वज्ञान शिकपा सारकें आसा. देखीक लालबहादूर शास्त्री हांचें जिणें घेयात. ते संवसारा सोडून गेले तेन्ना तांचेर रीण आशिल्लें. सादेंपणान रावप हो तांचे जिणेचो भाग आशिल्लो. गुजरात विद्यापीठान परदेशी विद्यार्थ्यां खातीर गांधीजींच्या जिणेचेर, साहित्याचेर अभ्यासक्रम दवरला. ताचो लाव 16 देशांतले 70 विद्यार्थी लाव घेतात. ह्या 16 देशां भितर अमेरिका, फ्रान्स, मेक्सिको, ब्राझील, घाना, सुदान, इंडोनेशिया सारक्या देशांचो आस्पाव आसा.
संवसारांतले व्हड फुडारी, देखीक दलाय लामा, नेल्सन मंडेला सारक्यांचेर गांधीजींच्या विचारांचो प्रभाव आशिल्लो. येरवड्याचे बंदखणींत एकलो गुन्यांवकार आशिल्लो, तो सुट्टकच समाज ताचे कडेन दुबावान पळोवपाक लागलो. ताचें लग्न जावप लेगीत अडचणीचें थारूंक लागलें. अशा वेळार ताणें गांधीजींच्या साहित्याचो अभ्यास सुरु केलो, इतलेंच न्हय तर गांधीजींचें साहित्य विकपाक लागलो. फुडें ताचे भितर बरो बदल जावपाक लागलो. तो लग्न लेगीत जालो. आसू. ह्या साद्या मनशाच्या जीवितांत गांधीजींचें साहित्य बदल करूं शकता तर हेरांचे कितें? म्हूण संद मेळटा तशे तुमी गांधीजींच्या साहित्याचो अभ्यास करात. विद्यापीठांनी सुविधा आसा. अजुनूय संवसारांक तांच्या अभ्यासक्रमांचो विचार करचो पडटा, हें अजाब न्हय. पूण हेरुय फुडारी आसात जांचो तुमी अभ्यास करचो. गांधीजींच्या विचारांचेर तुमी एमए करूं शकतात. म्हाका खात्री आसा की हाचो अभ्यास करतकच तुमचे भितरलो पयशे जोडपाचो सुवार्थ उणो जातलो. तुमी वसुधैव कुटुम्बकम असो विचार करपाक लागतले. तुमी साधी जीण जगपाचो प्रयत्न करतले.
आयज अशा विचारसरणीची संवसारांक गरज आसा. आयज कितलेशे जाण करियरा खातीर आवय-बापायक विसरतात. तांका फक्त दिसता पयसो. करियराचो खरो अर्थ तुमकां गांधीजीं सारक्या विचारांनी मेळूं शकता. एक वेळार आमच्या देशानुच न्हय तर सरभोंवतणी नजर जर गेली तर सादे जिणेच्यो देखी मेळटल्यो. आतां हाचें प्रमाण उणें उणें जायत गेलां. शिकुंकूच जाय, पूण त्या शिकपाचो उपेग आमी हेरां खातीरूय करपाक जाय. आयज दिसाक एक तरी अपघात जाता. ते करपी अनपढ आसतात? गुन्यांव करपी अशिक्षीत आसतात? आमी शिकतात, पूण आमचे भितर जी नमळाय येवपाक जाय ती दिसना. मूळ सभाव बदलना. नोकरेक लागलो काय आपुण राजा जालों. मागीर ताचें उलोवप बदलता, ताचे भितर अहंकार येवपाक लागता आनी तो दुसऱ्याक मजत करपाचें विसरता. (आडवाद आसात, पूण थोडे).
घडये हेर साहित्याचो आस्पाव जरी अभ्यासक्रमांत ना तरी गांधीजींची जीण तुमकां प्रेरणा जरूर दिसूं शकता इतकी शक्त तांच्या साहित्यांत आसा. वल्लभभाई पटेलांचो पुतळो तुमी गुजरातांत पळयला आसतलो. त्या पटेलांक लोह पुरुष म्हळ्यार लोखंडाचो दादलो म्हणटाले हें कित्याक? ते तांचें साहित्य वाचले उपरांत तुमकां कळटलें . ल्हान- ल्हान म्हायती वेल्यान व्हड म्हायती घेवप सूचना. आतां तर नेटा खातीर तुमकां घरा बसून खंयच्याय व्हड नेत्याची म्हायती मेळूं शकता . तेन्ना गांधीजींचे साहित्य अभ्यासतना हांचोय विचार जरूर करचो. करियर म्हळ्यार फक्त पयशे जोडप न्हय तर मनीस जोडपय आसता हें विसरचें न्हय. बरो शिकिल्लो आसा पूण आवय- बापायक वृद्धाश्रमान रावचें पडटा हें शिकिल्ल्या मनशाचें लक्षण कशें जावं शकता? हाचो प्रत्येकान जरूर विचार करचो.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
