भांगरभूंय | प्रतिनिधी
इस्रायल- पॅलेस्टायनाचें पेटलां. रेंवट परत तापलां. तसो तांचे मदल्यान सुरवातेक सावन उजो वचना. पुराय संवसारान ह्या दोनूय देशांचेर नियंत्रण दवरपाचो, वाद मिटोवपाचो यत्न केलो. पूण साध्य कांयच जावंक ना. हाचो त्रास निश्पाप लोकांक भोगचो पडला. दोन दिसां पयलीं पॅलिस्टायनाच्या हमास संघटणेन इस्रायलाचेर राॅकेट हल्लो केलो. सुमार पांच हजार राॅकेटां सोडलीं. हातूंत कोट्यांनी डाॅलरांचें लुकसाण जालें. इस्रायलाच्या 50 वर्सांच्या इतिहासांतलो हो सगल्यांत भिरांकूळ हल्लो. 600 परस चड लोकांक मरण आयलें. उपरांत इस्रायलान हवाई हल्लो केलो, तातूंत 300 वयर लोक मेल्यात. मरप्यां मदीं अर्थांत सैनिकूच नात, तर दोनाय कडले नागरिकूय आसात. अजून ह्यो चकमकी सोंपूंक नात. इस्रायली बायलो बेपत्ता आसात. तांकां हमासान व्हेल्यांत, असो आरोप इस्रायलान केला. बलात्काराचो ते शस्त्रा म्हूण वापर करतात, अशेंय तांणी म्हणलां… आनी आतां मेरेनचो संवसारीक झुजाचो इतिहास पळयल्यार ह्या दाव्यांत तथ्य ना, अशें म्हणपाक मेळचें ना.
जमनी खातीर दोगांय मदीं हें झूज चलता. इस्रायल आक्रमक आसा. पूण आतां पॅलेस्टायनूय तितलोच आक्रमक जाला. यासर अराफात अध्यक्ष आसतना पॅलेस्टायना फाटल्यान भारत उबो राविल्लो. सध्याच्या सरकारान इस्रायलाक जाहीर तेंको उक्तायला. काँग्रेस सरकार सत्तेर आशिल्लें तेन्ना भारतांत आतंकवादी हल्ले जाताले, तशीच कांयशी परिस्थिती सध्या इस्रायलांत आसा, अशी प्रतिक्रिया भाजपान उक्तायल्या. तर दोनूय देशांनी चर्चा करून पॅलेस्टायन प्रस्नाचेर बेगीन तोडगो काडचो, अशें काँग्रेस आनी दाव्यांनी म्हणलां. मात, हिंसक घडणुको, झूज, चर्चा, अमेरिका, युनोचो हस्तक्षेप जावन पसून हो प्रस्न सुटावो जायना. संवसाराचे समाजीक भलायके खातीर हें धोक्याचें थारपाची भिरांत आसा. कारण आतां आदलो काळ उरूंक ना.
पॅलेस्टायन सरकार म्हणचे परस हमास ही संघटणाच इस्रायला आड दोन हात करपाक मुखार आसा. 1987 च्या सुमाराक ही चळवळ सुरू जाली. इजिप्ताच्या 1920 तल्या मुस्लीम ब्रदरहुड आनी हांची विचारसरणी एकूच. तांकां इराणाचो तेंको आसा. फाटलीं 16 वर्सां तांची गाझा पट्टेचेर (वाठार) सत्ता आसा. पॅलेस्टायनाचे अध्यक्ष महमूद अब्बास हांच्या सैन्याचें आनी हांचें पटना. 2006 त संसदीय वेंचणुकेंत हमासाक जैत मेळ्ळां. उपरांत गाझा पट्टी तांच्या ताब्यांत गेली. हो वाठार आमचो, इस्रायलाचो न्हय, अशें तांचें म्हणणें. 1990 ची इस्रायल आनी पॅलेस्टायन लिबरेशन आॅर्गनायझेशन (पीएलओ) हांचे मदली ओस्लो शांतता कबलातूय तांकां मान्य ना. साहजिकूच ते आनी इस्रायल सैन्य हांचे मदीं चकमकी जातात. पयर जाली तें लागीं लागीं झुजच! आपल्या एका सशस्त्र गटा वरवीं हमास संघटणा हिंसा घडयत आसता. ताका लागून इस्रायल, अमेरिका, युरोप आनी हेर कांय देशांनी हमासाक आतंकवादी संघटना म्हूण घोशीत केल्या. तांचे समर्थक सगल्या देशांनी आसात. तांच्या अर्थीक बळग्याचेर हे सांवार घालतात. पॅलेस्टायन सरकाराक शांततायेच्या मार्गान हो प्रस्न सोडोवपाक जाय, तर हमासाक शांती मान्य ना. एक घाव, दोन कुडके ही तांची विचारसरणी. जमनी खातीरच्या संघर्शाक लागून फाटल्या 75 वर्सांत उणेच लाखभर लोक मेल्यात.
संवसारांतलो हो सगल्यांत दीर्घ काळ चलिल्लो वाद. पॅलेस्टायन आनी इस्रायल ज्यू, ख्रिश्चन आनी मुस्लीम धर्मां खातीर पवित्र. कारण तांचे प्रेशीत, संत, पुराण पुरुस, अस्तुऱ्यो ह्याच वाठारांत जल्माक आयल्यात. तांचें जिवितूय हांगाच गेलां. पॅलेस्टायनाक थंय ल्हानशा जाग्याचेर स्वताचो देश जाय आशिल्लो. इस्रायल म्हणटा, पुराय जेरुसालेम आमची राजधानी. पॅलेस्टायनाक पूर्व जेरुसालेम राजधानी म्हूण जाय. इस्रायलाची 14 मे 1948 दिसा स्थापना जाली तेन्ना पांच अरब राष्ट्रांनी पॅलेस्टीनी लोक आशिल्लो पॅलेस्टायन वाठार ताब्यांत घेतलो. इस्रायलाचें आनी तांचें झूज जालें. थंय इस्रायल वरचड थारलें. तेन्नाच्यान एकमेकांचेर शेक मेळोवपाचो यत्न चल्ला. कांय मुस्लीम राष्ट्रां पॅलेस्टायना वांगडा, तर इस्रायला फाटल्यान अमेरिका, युरोप आसा. पॅलेस्टायनाक देश स्थापन करपाक जागो जाय. ताका भारतान 1988 त मान्यताय दिल्ली. 1996 त गाझांत कचेरीय सुरू केल्ली, उपरांत 2003 त ती रामाल्लांत हालयली. अमेरिका आनी हेर देशांची पीएलओक मान्यताय आसा, पूण देश म्हूण न्हय. इस्रायल तर तांकां मानीच नात. पॅलेस्टायन इस्रायलाक घुसखोर मानतात. आमची भोवतेक जमीन तांणी हडप केल्या, असो तांचो आरोप. पयरच्या ह्या झुजाचे परिस्थितीची दखल अमेरिके सयत सगल्यांनीच घेतल्या. ती बेगीन निवळप, सगल्यां खातीरूच बरें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
