भांगरभूंय | प्रतिनिधी
विश्वजीत राणेः मुल्यांकना खातीर वरिश्ठ सीए ललीत शहा हांची नेमणूक
भांगरभूंय । प्रतिनिधी
पणजीः फाटल्या 3 ते 5 वर्सांत गोंय राज्य नगर विकास संस्थे वतीन (जीसुडा) हातांत घेतिल्ल्या प्रकल्पांचें मुल्यमापन जातलें, अशी म्हायती नगर विकास मंत्री विश्वजीत राणे हांणी दिली. मुल्यांकना खातीर वरिश्ठ सीए ललीत शहा हांची नेमणूक केल्या, अशेंय तांणी स्पश्ट केलें.
राणे हांणी सांगलें, कांय दिसां आदीं जीसुडा अधिकाऱ्यां वांगडा विशेश बसका घेतिल्ली. तातूंत अशें कळ्ळें, फाटल्या कांय वर्सांत जीसुडा वतीन सुरू केल्ले खूबशे प्रकल्प अर्दकुटे आसात. हाचे फाटलें कारण सोदून काडचे खातीर हो निर्णय घेतला. हे मुखार जीसुडा वतीन करतात त्या प्रकल्पांचें मुल्यांकन करचे खातीर आयआयटी भुवनेश्वरा वांगडा कबलात केल्या. थंयचे तज्ञ विवीध प्रकल्पांची गुणपत्ता सांबाळपाक मजत करतले. जीसुडाच्या विवीध प्रकल्पांच्या कामां संबंदांत पारदर्शकता येवची हे खातीरूच हें पावल उखल्लां, अशें राणे हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
