भांगरभूंय | प्रतिनिधी
संवसारीक पर्यटन दीस गोंय सरकारान 27 सप्टेंबराक मनयलो. कार्यावळीची जायरात पळेल्यार पर्यटनाची दिका सरकार बदलपाक सोदता. पर्यटन मंत्री रोहन खंवटे वेवसायीक, उद्देजक आशिल्ल्यान उद्देग, वेवसायांतल्या बारीकसाणींची जाणविकाय तांकां आसा.
पर्यटनाच्या मळार नवें कितें तरी करपा खातीर वर्सभर घोशणा जाल्यो, त्यो चालीक लावपा पासत पावलांय पडल्यांत, खर्चूय केला. फुडल्या 25 वर्सांचो विचार करून गोंयांत पर्यटन तिगचें म्हणून येवजण्यांची बांदावळूय खातें करता. पर्यटन वेवसाय, उद्देगांतल्या भागिदारांच्यो बसका घेवन मुखार वतना आडमेळीं हाडपाक नव्यो संघटणाय जातात. तांचे सकारात्मक विचार आसल्यार ते आयकून घेवचे, फुडारांत जावपी बदलां विशीं तांकां समजावचें. मुखेल करून कोविडा उपरांत वातावरण बदलता, ऋतुमानांच्या बदलांतल्यान पावस, वत, शिंयाळें पर्यटन, पर्यटकांची दीसपट्टीय बदलतली हेंवूय वेवसायिकांक सांगचें पडटलें. दर्यावेळेक वेंग मारिल्ली गोंयच्या पर्यटनाची मुळावी संकल्पना तशीच आसली तरी संस्कृतायेंत बदल जातात हें सत. संस्कृतायेंतल्या बदला प्रमाण पर्यटनाची नवीं मांडणी जावपाक जाय नाजाल्यार अर्थकारणाक बळगें मेळचें ना. राज्यांच्या पर्यटनांतलो पयसो देशाचें अर्थीक बळ वाडयता, देशाक लाव अदीक जाता. पर्यटन उद्देगाक केंद्रा कडल्यान व्हड प्रमाणांत पयसो मेळोवपाचो आसत जाल्यार केंद्रीय पर्यटनाची निती, शिस्त राज्याक आपणावची पडटली.
दर्यावेळो आनी दर्यावेळे वेलें पर्यटन म्हणल्यार गोंयच्या पर्यटनाचो मध्यबिंदू. दर्यावेळो, वेळे लागसारच्यो सुवाती खूब बदल्ल्यात. दर्यावेळां वेली शेणिल्ली नितळसाण, काँक्रिटाचीं बांदकामां, पर्यटकांचे चोंबे, नायटलायफ थळाव्यांक तिडक हाडपी. दर्यावेळो राखपा खातीर, थंयचें पर्यटन तिगपा पासत, शिस्ती खातीर नेमावळ खातें करता आसत जाल्यार ताका येवकार दिवपाक जाय. दर्यावेळे वयले शॅक्स पर्यटनाक एका तेंपार उर्बा दिवपी आशिल्ले. तरी एकल्यान भाड्याक घेतिल्लो शॅक पोटभाड्यार दिवपाचें प्रमाण वाडटा. देशांतल्या हेर राज्यांतल्या परकी वेसायिकांक, विदेशी नागरीक पोटभाड्यार शॅक घेतात, नव्यो वसणुकोय जाता. पर्यटन शॅकाच्या नांवार आतंकवादी राज्यांत येवपाच्यो घडणुको ह्या वसणुकांतल्यान घडटात. गोंयच्या पर्यटनाची प्रतिमा गोंयकारांचें नांव घुस्पावन इबाडपाचो यत्न तातूंतल्यान जाता, गांवचें गांवपण थंय शेणटां.
देशांतरांतल्यान विदेशांतूय आतंकवाद वाडपाक लागला, ताचे परिणाम पर्यटनाचेर जातात. गोंयांत विदेशी भोंवडेकार येवप एके वटेन उणें जालां, जाल्यार दुसरे वटेन आतंकवादी देशांतल्यान येवपी कांय भोवंडेकारांनी गोंय आपलें घर केलां. ते थळावे कायदे पाळटात? कांय समाजीक वावरांत विदेशींचो आस्पाव आसलो तरी देशांतले, विदेशांतले नागरीक राज्याक येणावळ दिवपी आसात? तांचो वेव्हार, वेवसाय कसलो? सरकारान ते विशीं अभ्यास करचो पडटलो आनी उपरांतूच तांकां सदांच आलाशिरो दिवप ना दिवपाचो निर्णय घेवचो. भोंवडेकार म्हणून येवन राविल्ल्या विदेशी नागरिकांचो राबितो खंयच्या वाठारांत चड आसा ताची म्हायती सोदपाचो यत्न सरकारान केला? तांची वळेरी नांवां, नाम्या सयत पुलिशेंत आसा? तांच्या राज्यांतल्या राबित्याचें कारण कितें? शिस्तीच्या पर्यटनाक आडमेळीं हाडपी संघटणांक तांचो तेंको आसा? आंदोलना करपी संघटणांक निधीची पुरवण ते करतात? तांचे मनस्थितीचो अभ्यास केल्यार वेगळेंच सत कळटलें. आत्मीक वा अध्यात्मीक पर्यटन सर्किटाची सरकारी येवजण देशी, विदेशी पर्यटनाक नवे दिकेन व्हरतली. देवळां, चर्च, मशिदीचें दायज गोंयांतल्या गांवगिऱ्या वाठारांक अर्थीक लाव दिवपी जावचें. मुखेल देवळांनी, चर्चींनी, मशिदींनी भोंवडेकारांक व्हरचेंच तेभायर शाराच्या लागसार आशिल्ल्या उपनगरांकूय आत्मीक पर्यटन सर्किटांत हाडपाक जाय.
पर्यटन मंत्री रोहन खंवटे हांच्याच मतदारसंघांत, बार्देस तालुक्यांतूय देवळां, चर्च हेर धर्मीक थळां आसात. थंय पर्यटकांक जात्रा, फेस्तां दिसांनी आनी नित्य व्हरपाच्यो बऱ्यो सुविधाय आसात. नवीं स्पायस प्लान्टेशन्स गोंयच्या केपें, सांगें, धारबांदोडें, पेडणें, सत्तरी, दिवचल तालुक्यांनी जाल्यांत. त्या प्लान्टेशनाचें खासा सर्कीट आत्मीक पर्यटना सांगातान करचें. सांगें, काणकोणा, शिरोडें, केपेंच्या तळ्यांच्या, साळावले धरणाच्या वाठारांच्यो भोंवड्यो भोंवडेकारांक मनाक थाकाय दितल्यो. पर्यटकांक हाॅटेलांनी सफरींची, सर्किटांची व्हर्च्युअल म्हायती दिवपी अॅप सरकारा कडेन आसा? येरादारी खातीर पर्यटन खात्याचे अॅप सुविधेचो उपेग व्हड प्रमाणांत जाता? उत्सव पर्यटनाची जायरात इफ्फी वरी महोत्सवा वांगडा जावपाची गरज आसा. कसिनोच्यो, सोऱ्याच्यो जायराती इफ्फींत जातात मागीर उत्सव, गोंयच्या दायजाचें व्हर्च्युअल दर्शन इफ्फीच्या पड्ड्यार कित्याक ना?
गोंयांत सगल्या राज्यांची संस्कृताय स्थलांतरा वांगडा येवपाक लागल्या. ते संस्कृतायेंतूय गोंय आसता मात्शें वेगळेंपणान. उडप्यांची इडली सांबार, मसाला डोसा, मुंबय, दिल्लीची पावभाजी संस्कृताय जशी देशाची जाल्या तशीच गोंयचीय. भलायकी बरी दवरपी ताजीं खाणां-जेवणां भोंवडेकारांक सवाय दरान मेळ्ळ्यार भोंवडेकार धादोशी जातले. गोंयांत उडप्यां बराबरीन हेर राज्यांतले रॅस्टोरंण्ट वेवसायांत आयल्यात तांकांय गोंयच्या निजाचें अस्सल खाण जेवण दिवपाची विनवणी करची. गोंयच्या निजाच्या खाणा जेवणाचे संस्कृतायेंत बदल जाल्यात, ते आपणावन रॅस्टोरंण्टांनी, घराघरांनी पावोवपी अस्तुरेचे पंगड आसतले. तांचीय वळेरी करची, ई बाजार सेवा केंद्रांचो विस्तार जातना ती उपेगाची. चवथीक गोंयांत पर्यटक येतात, तांचे खातीर खासा कार्यावळी जावपाक जाय. भौशीक गणपती, देखावे दाखोवपाचें सर्कीट जाय. दसरो, दिवाळी, नातलां, हेर फेस्तां खातीर सर्किटांची जायरात वर्सुकी ई कॅलेंडरांतल्यान महोत्सवांनी करपाक जाय.
संवसारीक परिशदो, मेळावे, संमेलनां, बसकांनी गोंयचें दायज, साहित्य, सैम संस्कृताय दाखोवपाची संद तरणाट्यांक मेळची. तीन, पांच नखेत्रीं हाॅटेलां परस ल्हान घरां वरी राबित्याची पर्यटन संस्कृती गांवांनी व्हरपाक जाय. दर्यादेगो म्हेळ्यो, गर्दीच्यो, भुंयेर चेपण हाडपी जातात तेन्ना वातावरण बदलांतल्यान त्यो बंदूय जावंक शकतात. महाराष्ट्र तशेंच हेर राज्यांच्या सरकारांनी वातावरण बदलाचो अभ्यास सुरू केला. गोंयांतूय तो जावचो, दर्यावेळेच्या बदलांचें संशोधन जावचें.
केंद्रीय शिमे खाला पर्यटन, खण वेवसाय येता, राज्यांचे येणावळीचो बरोच वांटो केंद्र सरकाराक मेळटा. सरकारान नव्यो येवजण्यो, प्रकल्प केंद्रा मुखार मांडल्यार पयसो मेळचो ना अशें न्हय. येणावळ वाडी खातीर संकल्प, संशोधनांतल्यान वाट दिसतली.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
