भांगरभूंय | प्रतिनिधी
तीन म्हयन्यांची मुजत सोंपले उपरांत फुडली सुनावणी
भांगरभूंय । प्रतिनिधी
पणजीः वाग वाठार आदेशाक आव्हान दिवपी गोंय सरकाराचे याचिकेचेर सर्वोच्च न्यायालयांत फुडली सुनावणी 10 नोव्हेंबराक जातली. हे सुनावणी पयलीच खंडपीठान वाग वाठाराचे कार्यवाहीक दिल्ली 3 म्हयन्यांची मुजत सोंपता. विशय सर्वोच्च न्यायालयांत आशिल्ल्यान हाचेर मार्ग काडपा खातीर सरकारा कडेन आतां फक्त 24 दिसांची मुजत आसा.
एनजीओचे याचिकेचेर म्हादय, खोतीगांव वाठार वाग वाठार अधिसुचित करपाचो आदेश मुंबय उच्च न्यायालयाच्या गोंय खंडपिठान 24 जुलयाक दिल्लो. आदेशाचे कार्यवाही खातीर 3 म्हयन्यांची मुजत खंडपीठान दिल्या. ही मुजत 24 ऑक्टोबराक सोंपता. अवमानाचें बंगलाट वाटोवपा खातीर सरकारा कडेन आतां फक्त 24 दिसांची मुजत आसा.
खंडपीठाची मुजत 24 ऑक्टोबराक सोंपता. गोंय सरकारान सर्वोच्च न्यायालयांत याचिका घातिल्ल्यान मुजतवाडी खातीर खंडपीठा कडेन अर्ज करपाचो पर्याय आसा. तरी अजून मेरेन कसलोच निर्णय जावंक ना, अशें अॅडव्होकेट जनरल देविदास पांगम हांणी सांगलें.
सर्वोच्च न्यायालयांत याचिका सुनावणेक आयली तेन्ना खंडपिठाच्या निर्णयाक स्थगिती दिवपाची मागणी गोंय सराकाराच्या वकिलान केली. ही मागणी मान्य जावंक ना. हाका लागून खंडपिठाचो आदेश कायम आसा. वाग वाठाराच्या प्रस्तावाचेर केंद्रीय रान आनी पर्यावरण मंत्रालयाचें म्हणणें आयकून घेतल्यार बरें, अशें वक्तव्य न्यायमुर्तींनी केलें.
राज्य सरकारा कडल्यान राष्ट्रीय वाग जतनाय प्राधिकरणाक (एनटीसीए) वाग वाठाराचो प्रस्ताव येवप गरजेचें आसता. हाचे उपरांत एनटीसीए वाग वाठाराविशीं राज्य सरकाराक शिफारस करूं शकता, अशी गोंय सरकाराची भुमिका आसा. एनटीसीए न 31 मार्च 2016 ह्या दिसा मुखेल रान संरक्षक आनी मुखेल वनपाल हांकां पत्र धाडिल्लें. खोतीगांव- म्हादय अभयारण्य वाठारांत वाग आशिल्ल्याचे पुरावे आसा. वागांचो आंकडो वाडपाची तांक ह्या वाठारांत आसा, अशें ‘एनटीसीए’न पत्रांत म्हणलां. हें पत्र वाग वाठार करपाचें शिफारस पत्र थारूं शकना, ह्या युक्तिवादाचेर गोंय सरकाराचो भर आसा.
रान जीव कायदो 1972 च्या कलम 38 व्या प्रमाण वाग वाठार जाहीर करपाची तजवीज आसा. एनटीसीएचे शिफारसी उपरांत राज्य सरकार वाग वाठार जाहीर करपाक शकता, अशी तजवीज कलमांत आसा. सर्वोच्च न्यायालयान स्थगिती न्हायकारले उपरांत ठोस असो निर्णय राज्य सरकारान घेवक नाशिल्ल्या कारणान स्थिती अस्पश्ट आसा.
कोणूच कांयच उलयनात
विशयाचें गांभीर्य आपल्याक खबर आसा. सध्या तरी आपूण हाचेर कांयच उलय ना, अशें रान खात्याच्या मंत्र्यांनी सांगलें. रान खात्याचे सचीव पुनीत कुमार गोयल तशेंच मुखेल रान संरक्षक लेगीत हाचेर म्हायती दिवपाक तयार ना. गोंय सरकाराचे आव्हान याचिकेंत केंद्रीय रान आनी पर्यावरण मंत्रालय, राष्ट्रीय वाग जतनाय प्राधिकरण (एनटीसीए) आनी एनजीओ प्रतिवादी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
