भांगरभूंय | प्रतिनिधी
दुयेंतींक आॅनलायन सेवा दिवपाक खोर्ले (तिसवाडी) भलायकी केंद्र सगल्यांत मुखार आसा. खुद्द भलायकी मंत्र्यान ही म्हायती दिली. आयुश्यमान भारत येवजणे खाला (आभा) देशभरांतल्या भलायकी केंद्रांचेर दुयेंती खातीर ही सेवा सुरू करपाचे यत्न चालू आसात. गोंयांतूय ती चालीक लायल्या. तातूंत सध्या तरी खोर्ली केंद्र पयल्या क्रमांकाचेर आसा. आतां हेर केंद्रां, हाॅस्पिटलांनीय ह्या मळाचेर नेटान मुखार वचपाक जाय. तशें ही येवजण येसस्वी करप निमाणें कर्मचाऱ्यांच्या हातांत आसा. तांणी ते खातीर मेहनत घेवची पडटली. वाजेवन, तिडकून उपकारपाचें ना. तंत्रज्ञाना बगर पर्याय ना, हें एकदां मानून घेतलें काय फुडलें काम सोंपें जातलें. ‘आभा’क लागून कामां फटाफट जातलींच, पूण ताचो सगल्यांत चड फायदो दुयेंती, दोतोर, नर्सी, कर्मचाऱ्यांक जातलो. कारण तांचीं कामां सोंपी, उणीं जातलीं.
‘आभा’ खाला मोबायल फोनाचेर क्युआर कोड स्कॅन करतकूच टोकन नंबर येता. तो आनी तपासपाचो वेळ भायले स्क्रिनीचेर दिसता. ताका लागून दुयेंतींक रांकेंत रावपाक नाका. दोतोरान तपासतकूच मोबायलाचेर वखदांचें प्रिस्क्रिप्शनूय येता. दुयेंती कांय म्हयन्यांनी आयलो जाल्यार तें हाडपाक विसरता. आतां तें मोबायलांतूच आसतलें. दोतोरांकूय हाचो फायदो जाता. दुयेंतींची आदली सगली म्हायती (केस हिस्ट्री) संगणकांत डाटा स्वरुपांत आशिल्ल्यान उपचार करतना बऱ्याक पडटा. एकाच दुयेंसाचेर कांय म्हयने उपचार करपाचे आसल्यार दोतोराचो आनी दुयेंतीचो मोलादीक वेळ वाटावता. दुयेतींची नोंद, तांचीं दुयेंसां, रोग, केल्ले उपचार हाचो डेटा तयार जाल्यार तो संबंदीत भलायकी केंद्राकूच न्हय, तर भलायकी खात्याकूय बऱ्याक पडटलो. खास करून संसर्गजन्य दुयेंसां वेळार. मात, हातूंत मुखेल अडचण आसा ती मोबायल फोनाचेर ही सुविधा वा अॅप वापरपाची. तशे पिरायेची साठी हुपिल्ले गोंयकार पसून सोंपेपणी मोबायल फोन हाताळटात. हें जमना तांकां मात दुसऱ्याची मजत घेवची पडटली. अर्थांत तांचे खातीर हाचे पयलीं चलत आयिल्ली तपासपाची पद्दत दोतोर वापरतलो. सध्या खोर्ली भलायकी केंद्राचेर 10 पंचायतींतले 48 हजार लोक अवलंबून आसात. सद्दां उणेंच 100 दुयेंती उपचारा खातीर येतात. चडशे आॅनलायन उपचार घेतात. बाकीच्या केंद्रांनीय आॅनलायन सेवा आसा, ह्या अर्थीक वर्सा अखेर मेरेन ती वाडल्यार भलायकेच्या मळाचेर क्रांती जातली.
सगलीं भलायकी केंद्रां आॅनलायन जावचींच, पूण ताचेच वांगडा तांचो पांवडोय वाडचो. सांखळेच्या हाॅस्पिटलांत दोळ्यांची कुयदाद घेवपी विभाग सुरू जाला. हेर कडेनूय हे खाशेले सुसज्ज विभाग जावचे. गोंयांत ज्या दुयेंसांचो आंकडो वाडटा, तांचेर सगल्या हाॅस्पिटलांनी उपचार जावचे. खास करून मुतखडो, गोडेंमूत, मानसीक तणाव, रक्तदाब, हाडाचीं, कांतीचीं दुयेंसां. ते विभाग सुरू जाल्यार वा दर सप्तकांत तांचेर उपचार करपी स्पेशालिस्ट भलायकी केंद्रांनी येत जाल्यार जिल्हो हाॅस्पिटलां, जीएमसी वयलो ताण बरोच उणो जातलो. गोंयांत अपघातांचें प्रमाण तशेंच आसा. अपघात जालो काय ताका राज्यांतल्या मुखेल हाॅस्पिटलांनी व्हरतात. चडूच गंभीर आसल्यार जीएमसींत. पूण किरकोळ जखमी जाल्यार गांवांतल्या भलायकी केंद्रांत उपचार जाल्यार बरे. हाॅस्पिटलां हीं 24 वरां उक्तीं आसतात. न्हय आसपाकूच जाय. मात कांय नागरिकांच्या मतान, बऱ्याच भलायकी केंद्रांतले दिवे रातचे आठा उपरांत पालवतात. नवो दुयेंती आयलो काय ताका सरळ शारांतल्या हाॅस्पिटलांनी धाडटात. हें खरें काय फट ताचो तपास भलायकी खात्याक करचो पडटलो. साध्या दुयेंसांचेर उपचार करपी घोळटें हाॅस्पिटलूय जाय. हाॅस्पिटलां पसून पयस रावपी लोकां खातीर तें बऱ्याक पडटलें. कारण, आदल्या तेंपा परस हालींच्या वर्सांनी दुयेंतींचो आंकडो वाडला. फुडाराकूय तो वाडत वतलो. तेन्ना ‘दोतोर, तुमच्या दारांत’ चालीक लागपाक कोणाची हरकत नासची. मदीं, दोतोर फोनाचेर वा आॅनलायन सल्लो दिवपाचे आशिल्ले. तेंवूय करूं येता. हाॅस्पिटलां आॅनलायन लींक केल्यार तज्ञ दोतोरांक दुयेंतींचे भलायकेचो डाटा मेळटलो आनी तांकां उपचार करपाक बऱ्याक पडटलें. तशेंच हेर हाॅस्पिटलांकूय तांचो सल्लो घेवपाक मेळटलो. भलायकी मळान काळाचीं पावलां वळखून एक पावल मुखार घालां, ही तुस्त करपा सारकी गजाल.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
