भांगरभूंय | प्रतिनिधी
सगळ्यांक पेरां खावपाक आवडटा. भारतभर ताची लागवड करतात. पेरांत जायतीं जीवनसत्वां आसतात. तातूंत सगळ्यांत चड आसता व्हिटॅमिन सी. हाचेभायर पेरांत लोखण, चुनो आनी फॉस्फरस मेळटा. नेमान पेरांचे सेवन केल्यार तुमची कूड निरोगी उरतली. भारतांत पेरांच्या जायत्या जातींची लागवड करतात.
भारतांत सादारणपणान पेरां 40 ते 60 रुपया किल दरान विकतात. पूण, जपानी रेड डायमंड हे एक प्रकारचे पेर ताका खूब मागणी आसा. रुच आनी गोडसाणी खातीर ताची नामना आसा. बाजारांत 100 ते 150 रुपया किल दरान तीं विकतात. ताची लागवड करपी शेतकार कांय वर्सां भितर गिरेस्त जाल्यात. जायत्या राज्यांतल्या शेतकारांनीय जपानी रेड डायमंड पेरांची लागवड करपाक सुरवात केल्या.
10 अंश सेल्सियस ते 42 अंश सेल्सियस तापमान लागवडी खातीर बरें. जमनीचें पीएच मोल 7 ते 8 मदीं आसूंक जाय. काळ्या आनी रेंव आशिल्ले जमनींत जपानी पेरां लायल्यार चड उत्पन्न मेळटा. जपानी रेड डायमंड रोयतना वळींचो अंतर 8 फूट आसचो. त्याच वेळार झाडां मदलें अंतर 6 फूट दवरचें. हाका लागून झाडांची वाड नेटान जाता. वर्साक दोन फावट झाडांची कापणी करची.
हेर पिकां भशेन जपानी पेरांच्या शेतांनी शेण सारें म्हणून वापरचें. ताका लागून जमनीची पिकाळसाण वाडटा. जाय जाल्यार एनपीके सल्फर, कॅल्शियम नायट्रेट, मॅग्नेशियम सल्फेट आनी बोरॉन सारें म्हणून वापरुं येता. फकत ठिबक शिंपणावळ वापरून झाडांक उदक घालचें. देखून उदकाचो उणाव जायना. देशी पेरांच्या लागवडींतल्यान वर्साक एक लाख रुपया मेळटात जाल्यार जपानी रेड डायमंड पेरांच्या लागवडींतल्यान तुमची येणावळ तिप्पट वाडटली. म्हणल्यार एका वर्सात 3 लाख रुपया मेळटले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
