राज्यसभेंतूय बायलां आरक्षण विधेयक एकमतान मंजूर, कायद्याचो मार्ग मेकळो

भांगरभूंय | प्रतिनिधी

-राज्यांच्या विधानसभां कडेन मान्यते खातीर धाडटले

नवी दिल्लीः लोकसभे आतां राज्यसभेंतूय बायलां आरक्षणाचें विधेयक एकमतान मंजूर केले. सुमार 10 वरां चर्चा जाले उपरांत हें विधेयक 171 आड 0 अशा एकमतान पास केले. ह्या विधेयकाक सगल्या पक्षांनी तेंको दिल्ल्यान आपूण सगल्यांचे उपकार मानता, अशें प्रधानमंत्री नरेंद्र मोदी हांणी म्हणलें.

लोकसभेंत हाचे पयलींच 454 आड 2 मतांनी हें विधेयक मंजूर केल्ले. ते उपरांत आतां राज्यसभेंतूय हें विधेयक मंजूर केलां. ह्या विधेयकाचेर उलयतना प्रधानमंत्री नरेंद्र मोदी हांणी म्हणलें, ह्या विधेयकाचेर दोन दीस म्हत्वाची चर्चा सुरू आशिल्ली. सगल्या सहकाऱ्यांनी हाचेर अर्थपूर्ण चर्चा केली. फुडारांतूय ह्या चर्चेतले दरेक उतर आपल्या प्रवासांत उपेगी पडटले. ह्या विधेयकाक तेंको दिल्ले खातीर आपूण सगल्यांचो उपकारी आसा, अशें प्रधानमंत्र्यांनी म्हणलें.

वट्ट 10 वरांच्या चर्चे उपरांत ह्या विधेयकाचेर मतदान घेतलें. इलेक्ट्रॉनीक पद्दतीन हे मतदान घेतले. संसदेंत हें विधेयक पारीत जाले उपरांत आतां ते राज्यांच्या विधानसभां कडेन मान्यताये खातीर धाडटले.

अर्द्या राज्यांनी ताका मान्यताय दिले उपरांत ताचेर कायदो करतले. ह्या विधेयकाचें कायद्यांत जरी रुपांतर जाले तरीय रोखडीच ताची अंमलबजावणी जावची ना. नव्या जनगणने उपरांत मतदारसंघाची पुनर्रचणूक जातली आनी ते उपरांतूच ह्या कायद्याची अंमलबजावणी करतले. तशेंच हें विधेयक पारीत जालां पूण ताची अंमलबजावणी केन्ना जातली, हे विशीं सध्या तरी स्पश्टता ना.

आरक्षण बेगोबेग लागू करचेंः काँग्रेसची मागणी

ह्या विधेयकाचेर चर्चा करतना राज्यसभेंतले विरोधी पक्षफुडारी मल्लिकार्जुन खर्गे हांणी म्हणलें, बायलां आरक्षण विधेयकांत ओबीसींक आरक्षण दिवंक ना. तुमी तातूंत सुदारणा करपाक शकतात. ओबीसींक आरक्षण दिवपाक शकतात. ओबीसी बायलांक कित्याक फाटीं उडयतात? तांकां वांगडा घेवन वचपाचे न्हयक्ष तुमी ताची अंमलबजावणी केन्ना करतले, ते विशीं स्पश्ट सांगांत.

तशेंच बायलां आरक्षण विधेयक रोखडेच लागू करपाक जाय. ताका आमी बिनशर्त तेंको दितात. हातूंत जनगणनेची आनी मतदारसंघाच्या पुनर्रचणुकेची गरज ना. हाचे पयलीं कृशी विधेयक मंजूर जाले, नोटबंदी जाली. ताका लागून आरक्षणाच्या ह्या विधेयकाचेर आपूण आतांय तशेंच करून आरक्षण रोखडेच लागू कपाक शकतात.