भांगरभूंय | प्रतिनिधी
सध्या कॅनडा आनी भारता मदीं वाद चलता. कारण थारल्या, खलिस्तानी आतंकवादी हरदीप सिंग निज्जराची हत्या. कॅनडाचे भुंयेर एका नागरिकाची हत्त्या करपांत विदेशी सरकाराचो हात आसा, ही कृती देशाचें सार्वभौमत्व माड्डुवपी आसा. हे हत्येच्या तपासांत पालव दिवपाक आमी भारत सरकाराचेर चेपण हाडूं, अशें प्रधानमंत्री जस्टिन ट्रुडो हांणी म्हणले. हाचो भारत सरकारान निशेध केलो. उपरांत कॅनडान आपल्या नागरिकांनी भारतांत (हें गोंयांकूय बादिकार) गेल्यार सांबाळून रावचें, तांचेर अत्याचार जावं येता, अशीं बरीचशीं मार्गदर्शक तत्वां जाहीर केलीं. भारतानूय तीं केली. दोगांयनी आपापले देश पर्यटकां खातीर सुरक्षीत आसात, अशें जाहीर केलें. दोगांयनीय एकमेकांच्या राजदूतांक देश सोडपाक लायलो. काल भारतान कॅनेडियनां खातीरची व्हिसा सेवा कांय काळा खातीर निलंबीत केल्या. सांजवेळा उद्देगपती आनंद महिंद्रा हांणी कॅनडांतलो आपलो वेवसाय बंद केला. हाचो शॅर बाजाराचेर परिणाम जाला.
रामायण, महाभारत जावपाक ल्हानशें कारण जापसालदार आशिल्लें. कॅनडा वादा कडेन हत्या हें कारण आसा. पूण ताचे परस खलिस्तान चळवळीक लागून हें जालां, अशें म्हणचें पडटलें. ती सुरू जालीं 1969 वर्सा. पंजाब विधानसभा वेंचणूक हारिल्ले जगजितसिंह चौहान इंग्लंडाक गेले आनी थंयच्यान तांणी खलिस्तानाची मागणी केली. खलिस्तान म्हणल्यार पंजाब, हरयाणा जोडून केल्लो नवो देश. उपरांत 1980 च्या दशकांत ही मागणी परतून वयर सरली. धर्माच्या आदारान पाकिस्तान जालें, आखाती देश घडले, म्हणटकच हांकांय ती आशा जाली. (श्रीलंकेंतल्या तामिळांकूय अशींच वेगळ्या प्रांताचीं सपनां पडिल्लीं. वंश, धर्माच्या आदाराचेर स्वताचो देश वा प्रांत मागपी लोकांनी हाचेर शांत चित्तान विचार करूंक जाय. थोड्यांच्यो चळवळी चिड्डल्या, तर थोड्यांक देश मेळ्ळे, पूण ते आयज कोणाक नाकात) 1980 ची चळवळ खूब हिंसक आशिल्ली. तातूंत प्रधानमंत्री इंदिरा गांधी, जनरल वैद्य हांची हत्या जाली. सुवर्णमंदिरांत लिपिल्ल्या आतंकवाद्यांक धांवडावपाक भितर लश्कर घालपाचें धाडस इंदिरा गांधीन दाखयलें. पूण ते खातीर तांकां उपरांत जिवाचें बलिदान दिवचें पडलें. ही चळवळ 22,000 लोकांचो जीव घेवन शांत जाली. आतां खलिस्तानवादी बरेच भारतीय शीख कॅनडांत आसात. तातूंत कांय आतंकवादी, बंडखोरांचोय आसपाव आसा.
कॅनडा हो अमेरिके उत्तरे कडलो देश. लोकसंख्या 3 कोटी 82 लाख. भितर 14 लाख भारतीय. तातूंत साडेसात लाखां वयर शीख भाव. मुळांत हो सुखवस्तू देश. अर्थवेवस्था बळिश्ट, बेकारी उणी, राहणीमान उंचेलें. नितळ देश, भलायकी, शिक्षणाच्या मळाचेर मुखार. कुशळ कामगार, विद्यार्थ्यांक सहज प्रवेश. एकामेकां विशीं लोकांक दुस्वास ना, हाका लागून कॅनडाचें आकर्शण सगल्याक 1980 च्या दशका सावन आसा.
कॅनडा सरकाराच्या मवाळ धोरणाक लागून थंय भारता विरोधांत कारवायो करपी बरेच शीख तरणाटे स्थायीक जाल्यात. खलिस्तानाच्या समर्थना खातीर ते जाहीर कार्यक्रम, निदर्शनां करतात. भारता विरोधांत आनी खलिस्तान मागणे खातीर जनमत कौल घेवपाची मागणीय करतात. ते आतां थंयच्या हिंदूंक सतावंक लागल्यात. खलिस्तानी आतंकवादी गुरपतवंत सिंग पन्नू हाणें हिंदूंक कॅनडा सोडून वचपाची धमकी दिल्या. ताचेर दुस्वास पातळावपाच्या आरोपा खाला केश घालची, अशी मागणी करपी पत्र हिंदू फोरम कॅनडान सरकारान बरयलां. ताका आपले विचारसरणे कडेन सहमत नाशिल्ल्या लोकांक लक्ष्य करपाचें आसा. ताचें हें अभिव्यक्ती स्वातंत्र्य म्हूण घेवचें न्हय, अशेंय हिंदू फोरमान म्हणलां. खलिस्तानाची चळवळ चिड्डिल्ल्यान खलिस्तानवादी ताचो राग थंयच्या हिंदूंचेर काडपाचो विचार करतात, अशें दिसता. हो वाद वाडचो ना, हाची खबरदारी कॅनडा सरकाराक घेवची पडटली. मवाळपणा उपकारचीं ना.
भारत आनी कॅनडा हांचें मदीं बरे संबंद आसात. कांय आडवाद सोडलो जाल्यार शीख, हिंदू, क्रिस्तांवूच न्हय, तर थंयचे हेर देशांत लोकूय एकवटान रावतात. तीन लाखां वयर भारतीय विद्यार्थी थंय शिकतात. कॅनडाच्या प्रधानमंत्र्यान भारताचेर गंभीर आरोप केल्यान आमचे प्रतिमेक खत लागलां. तांणी चर्चे वरवीं हो वाद सोडोवंक फावो. तो वाडत गेल्यार ताचे परिणाम निश्पाप लोकांक कारण नासतना भोगचे पडटले. कॅनडाचे अर्थवेवस्थेक भारतीय नागरीक, कंपनीं योगदान दितात. तेन्ना भारता कडेन वांकडेंपण घेवप कॅनडाक परवडपाचें ना. थंयच्या खलिस्तानवादी रोंपाकूय तांणी सारें- उदक घालचें न्हय आनी दुसऱ्यांकूय घालपाक दिवचें न्हय. धर्माच्या आदाराचेर स्थापन जाल्ल्या कांय देशांची स्थिती कितें जाल्या तें खबर आसतना हे लोक ते वाटेर कित्याक चलतात, हेंच कळना जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
