भांगरभूंय | प्रतिनिधी
भांगरभूंय । खबरां मेज
पणजीः विश्व हिंदू परिशद संचलीत मातृछाया हे आपसेवी संघटने वतीर गोंयांत पांच सुवातांनी आश्रमय चलतात. थंय 150 निराधार भुरग्यांचें संगोपन करतात, तांकां शिक्षण दितनाच तांचेर बरे संस्कार करतात. मनीस सेवा हीच ईश्वर सेवा, अशी शिकवण तांकां दितात. संस्कारांक आचरणाची जोड मेळटली तेन्नांच ह्या वावराक येश मेळटलें हाची खात्री आसा, अशें मातृछाया ट्रस्टाचो संस्थापक मधुकर दीक्षित हाणे सांगलें.
10 वी आनी 12वेचे परिक्षेंत बरे गुण घेवन पास जाल्ल्या चलयांचो ढवळी हागच्या बालिका आश्रमांत भोवमान केलो. त्या वेळार दीक्षित हांणे आपलें मनोगत उक्तायलें. कार्यावळीक मुखेल सोयरे म्हणून ब्लू क्रॉस लॅबोरेटरीचे निवृत्त मुखेली दिनार म्हार्दोळकार आनी खासा सोयरे म्हणून ज्येश्ठ पत्रकार गंगाराम म्हांबरे हाजीर आशिल्ले. माचयेर मातृछाया न्यासाचो सचीव शिरीषकुमार आमशेकार आनी डॉ पुर्णिमा उसगांवकार आशिल्ली.
सोयऱ्यांचे हस्तुकीं ह्या वेळार वर्सुकी अहवालाचें प्रकाशन केलें. दिनार म्हार्देोळकार हाणे मातृछायाच्या वावराची तोखणाय केली. संस्थां सामाजीक लागणुकेची जाणीव दवोरून नवनवे उपक्रम चालीक लायता हे खातीर ताणे खोस उक्तायली. आधार नाशिल्ल्या भुरग्यांक शिक्षण, संस्कार आनी नवी जीण संस्था दिता त्याच वांगडा ती भुरगीं दाखयतात ती सेवाभावी वृत्ती तुस्त करपा सारकी आसा, अशें गंगाराम म्हांबरे हाणे सांगलें. पांच कडल्या आश्रमां शिवाय कालापूर हांगचे रुग्णाश्रय, होम नर्सींग अभ्याक्रम, ज्येश्ठ नागरिकां खातीर केंद्र हे संस्थेचे उपक्रम आदर्शवत आसात अशेंय ताणे सांगलें.
ढवळी बालिका कल्याण आक्षमातलो आदित्य नायर, अर्पिता मालेकर, अंजली डकवर्थ, वीणी मुणकर, समीक्षा नायक, रेणुका कांबळे, सुश्मिता सिंग, तन्वी गावडे, सविता कांबळे, दीपिका वेरदोळे, अस्तर हबीब, रिश्वा नार्वेकार तशेंच मडगांव बालिका आश्रमांतले सर्वांगी केरकार, काजन नायक, प्रणाली गोस्वामी, कविता गवंडी, समीक्षा नायक, रोहिणी नायक आनी नंदिनी हांचो सोयऱ्यांचे हस्तुकीं भोवमान केलो. कार्यावळीचें सूत्रसंचालन आश्रमाची सहसंचालिका अस्मिता गोखळे हिणे केलें. बेबी पुचुरू हिणे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
