भांगरभूंय | प्रतिनिधी
2016 मेरेन गोंय प्लास्टीक मुक्त करपाची घोशणा आदले मुख्यमंत्री मनोहर पर्रीकार हांणी केल्ली. एखाद्रे तांकां 2012, 2014 विधानसभा, लोकसभा वेंचणूक प्रचारा पासत भोंवतना विखुरिल्लें, उडयिल्लें प्लास्टीक दिसलें आसतलें. प्लास्टीक, हेर कोयराच्या वेवस्थापनाची गरज दिशिल्ल्यान तांणी साळगांवां कोयर वेवस्थापन प्रकल्पाची बांदावळ केली. कोयर वेवस्थापनाची मोंख मुखार दवरून प्रकल्प पुराय करप सोंपें नाशिल्लें. आदले मुख्यमंत्री प्रतापसिंह राणे, दिगंबर कामत, लक्ष्मीकांत पार्सेकार हांचो व्हड आदार तांकां तेखातीर मेळ्ळो. आदले उपमुख्यमंत्री फ्रान्सीस डिसोझा, आदले नगर विकास मंत्री मिलिंद नायक हांचो कोयर वेवस्थापन प्रकल्पांतलो वांटो न्हयकारूंक येवचो ना.
खात्यांतले वेव्हार पूर्ण करपाक तांचो तेंको म्हत्वाचो. प्रकल्पाक जाल्लो विरोध मोडून काडपाक पर्रीकार हांणी घालून दिल्ल्यो देखी फुडारांत आपणावच्यो पडटल्यो. साळगांवचे आदले आमदार दिलीप परुळेकार, जयेश साळगांवकार, कळंगूटचे आमदार मायकल लोबो हे पर्रीकारा बराेबर रावले. पर्यटन मंत्री आनी पर्वरेचे आमदार रोहन खंवटे हांकांय विश्वासांत घेतिल्ल्यान साळगांव कोयर वेवस्थापन प्रकल्प चालीक लागलो. प्रकल्पाचो वावर बरो चल्ला, कुडचड्यार दुसरो प्रकल्प जाला. न्यायालयाच्या आदेशान दक्षीणेंतल्या फोमेंतो प्रकल्पांतल्या कोयराचो विलो लागतलो. 100 टक्के नितळ गोंया खातीर वावुरतना फुडल्या दोन वर्सां भितर सरकारान नागरिकांक सांगाताक घेवचें. उद्देजक, कंपनींच्या आदारानूच सरकाराक फुडारा खातीर तालुको पांवड्या वेल्या कोयराच्या वेवस्थापनाची येवजण करची पडटली.
म्हजो कोयर तुज्या दारांत नाका, तुजो कोयर म्हज्या दारांत नाका अशें सांगत वाद घालत रावल्यार कोयराच्या राशींतल्यान सुटका ना. कोयर उडोवपाच्यो कांय सुवातो आसतात, नागरीक तांचो वापर करून नेमावळ मोडटात. हांगां कोयर उडोवचो न्हय म्हणून लागिल्ल्या तकट्यांच्या कुशिकूय कोयराच्यो राशी आसतात. उपजिल्हो पांवड्यार कोयराचे आनीक दोन प्रकल्प उबारून कोयराच्या वेवस्थापनाक राज्यांत नेट दिवपाक जाय.
नितळसाणीचे मोंखीतय स्पश्टता आसल्यार निमाण्या वेळार बोवाळ जायना. ग्रामसभा, म्हायती तंत्रज्ञान शास्त्राचो उपेग करून कोयराच्या वेवस्थापनाची म्हायती, दिका लोकां मेरेन पावोवपाक जाय. कोयराच्या वेवस्थापनाची मर्यादा रस्त्या कुशीक पडिल्लो, घरांतलो, भौशीक सुवातांतलो कोयर उखलपा मेरेन नासता. घरा सावन न्हंयाे, शेतां मेरेन पडिल्लो, सांचिल्लो कोयर एकठांय करून ताचें वेवस्थापन करप हें व्हड आव्हान. पणजी म्हापालिके खातीर खासा ट्रकांची निर्मणी, जागरुकताय करून शार नितळसाणेचो वावर पर्रीकार हांच्या तेंपार जालो. कोयर वेवस्थापना खातीर कायद्याची नेमावळ राज्य, केंद्र पांवड्यार करपाच्या वावरांतय तांचें बुदवतंपण, कुशळटाय आसा. तांच्या योगदानांतल्यान पणजी वा गोंय 100 टक्के कोयर वा प्लास्टीक मुक्त जालां अशें न्हय. तांणी बुन्याद घालून दिल्या, जागृताय मोहीम चालू दवरून 100 टक्के नितळसाणीचे मोंखी कडेन वचपाक जाय.
स्मार्ट सिटीच्या वावराक परतून आरंभ जातना प्लास्टीक, काँक्रीट, सुक्या, ओल्या, ई कोयराच्या वेवस्थापनाची वेगळी मांडावळ जावची. हाचे आदीं ह्याच विशयाचेर सुचोवण्यो केल्यात, ई मेल म्हापालिकेक धाडिल्ल्यान सुदारप जालां. सुदारपाचीं, बदलाचीं फळां एका दिसान मेळची ना पूण आरंभ जावचो. प्रधानमंत्री नरेंद्र मोदी हांणी धा वर्सां पयलीं केंद्रांत सत्तेर येतना जाहीरनाम्यांतल्यान आश्वासनां दिल्लीं. ते खातीर उपरांत येवजण्यो केल्यो, पयलींच्यो तश्योच फुडें व्हरतना बदलूय जाले. बदलांतल्यान आयिल्ल्या मांडावळींतले जैत हालीं दिसपाक लागलां. उदरगतीचीं पावलां मारतना लुकसाणूय जालां पूण फाटीं पळय नासतना नव्या तंत्रज्ञानांतल्यान नवी दिका देशाक मेळटा हें सत. चांद्रयान 3 वा आदित्य एल 1 चें जैत, सर्वधर्म समभाव, योगा, थळाव्यांक पालव दिवपाचे संस्कृतायेची तोखणाय हेर राष्ट्रां करतात. भारत अजून महासत्ता जावपाचे दिकेन वता हें तरणाट्यांकूय होलमल्ल्यान भारताक मजत मेळटा.
प्रधानमंत्री मोदी हांणी न्हंयो, दर्यादेगो तशेंच हेर सुवातांच्या नितळसाणीच्या केल्ल्या वावराची पळोवणी जाता. व्हड प्रकल्प तातूंतल्यान उबे जाल्यात, देश ग्रीन टॅक्नोलाॅजी कडेन वता. येता ते गांधी जयंती दिसा नितळसाणीचो उलो सगल्यांनी मारपाक जाय. नितळसाणीचें व्रत आमचे मुखार हाचे फुडेंय आसचें, ते खातीर नव्यो येवजण्यो, कल्पना दर एकल्याच्यो आसतल्यो.
मध्य प्रदेशांतलें इंदूर, कर्नाटकांतलें म्हैसूर, बेळगांवी तशेंच देशांतलीं कांय शारां स्मार्ट जातात. वीस वर्सां पयलीं सुरू जाल्ल्या वावरांतल्यान शारां नवे बांदावळींतल्यान येणावळूय मेळयतात, स्वयंपूर्ण जातात. नवीं संकश्टां येतलींच, मुखेल करून नितळसाणीचें. नागरीक नागरी शिस्तीक पाळो दिनात, सरकारी यंत्रणां मोडटात, उण्यो पडटात तेन्ना बिगर सरकारी यंत्रणांची मजत सरकारूय घेता. कांय नव्यो यंत्रणा तयार जातात, त्या यंत्रणांतल्यान राजकारण येवचें न्हय हाची जतनाय सरकारान घेवची.
सरकार ही एक अखंडीत प्रक्रिया हें अधिकाऱ्यांनी मतींत घेतल्यार, तोडपी, फोडप्यांकूय आळाबंद घालूं येता. मुख्यमंत्री, मंत्री बदलतात, प्रशासनांतूय बदल येतात, नेमावळीक मोडण दिवं येता. कायदे मोडल्यार तालुको नासल्यार उच्च, सर्वोच्च न्यायालय बडी मारता हें केंद्र, राज्य सरकाराक कळ्ळां. पोरणें कायदे उपेगाचे नात, तांकां तेंपा प्रमाणें कुरपणें घालचें अशें न्यायालयाक पटोवन दिल्यार आडमेळीं कोण हाडटलो?
पर्रीकार हांणी केल्लें तें सगलें अचूक आसतलें अशें न्हय, कांय चुकोय जाल्यात. म्हालेखापालांनी त्यो दाखोवन दितकूच त्यो सुदारपा खातीर वेळ कित्याक लागता? सुदारिल्ल्यो येवजण्यो मार्गार हाडपाक कळाव लागचो न्हय. शूभ अशूभ, म्हुर्ता इतलेंच नित्याची जीण म्हत्वाची, गरजवंतांक जाय तें वेळार मेळचें हेखातीर सरकारान वावुरचें. पंचायत वांगडी, नगरसेवक, मंत्र्यांचे क्रियाशिलतायेचो नियाळ घेतल्यार 100 टक्के नितळसाण पयस ना.
100 टक्क्यांची मोख दवरल्यार 60 ते 80 टक्के जैत दोन वर्सां भितर मेळटलें. नितळसाणी पासत आदल्यो राज्यपाल मृदुला सिन्हा वावुरल्यो, यंत्रणांक क्रियाशील करपाचें तांचें कार्य फुडें व्हरपाक जाय. तांचे वरींच, तांचेच पद्दतीन कामकाज हेरांनी करचें अशें म्हणप समा जावचें ना, पूण तांची देख कित्याक नाका? त्यो चुकल्यात, सुदारात. नितळसाण विसरूं नाकात.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
