भांगरभूंय | प्रतिनिधी
फाटल्या आयतारा कोंकणी भवनांत कोंकणी भाशा मंडळान आयोजीत केल्ल्या शणै गोंयबाब कथामाळेची निमाणी फेरी घडून आयली. त्या दिसा समारोप सुवाळ्याचें सुत्रसंचालन करपाक हांव माचयेर आयलों तशें सात- आठ वर्सां आदले सर्तक म्हूण आयिल्ले सगले अणभव यादी जावन खीणभरा खातीर दोळ्यां मुखार आयले. दुसरी ते धावी यत्तेंत शिकतना एखाद्या वर्साचो आडवाद सोडल्यार हांव म्हाल तशेंच निमाण्या पांवड्या वेले सर्तींत वांटेकार जालां. त्या दिसा ते म्होंवे दीस याद जाले. सर्त सोंपली म्हणटकूच इनामाची म्हाका उमळशीक लागताली. मनांतल्या मनांत म्हाका इनाम मेळटलेंच अशी आस्त आसताली. म्हज्या वांगडच्या हेर सर्तकांकूय घडये तशीच उमळशीक आसताली आसुये. तांच्या तोंडार ती दिसताली. सर्तकां परस तांच्या शिक्षकांक आनी पालकांकूच इनामाची चड उमळशीक आसताली. पयर आयतारा सुत्रसंचालना खातीर हांव माचयेर आयलों तेन्ना तशीच उमळशीक म्हाका मुखा वेल्या सर्तकां मदीं दिसली.
2009 वर्सा हांव दुसरी यत्तेंत शिकतना पयले खेपे म्हज्या वेलवाडा- पैंगीणच्या सरकारी मुळावे शाळेंतल्यान निवड जावन म्हाल पांवड्या वेले सर्ती खातीर पात्र थारलों. काणकोण म्हाल पांवड्यार म्हाका दुसरें इनाम फावो जालें. राज्य पांवड्या वेले सर्ती खातीर हांव पात्र थारलों. म्हाका आयजूय याद जाता, म्हजे जिणेंतली ती त्या खिणा मेरेनची सगल्यांत उंचेली सर्त आशिल्ली. राज्य पांवड्यार म्हजी दाळ शिजली ना. इनामां वांटप सुवाळ्याक एकेक इनाम जाहीर जाता तशें म्हजेंच नांव जाहीर जाल्ल्याचो भास जातालो. म्हाका इनाम मेळ्ळें ना. म्हाका मात्शें वायट दिसलें. हांवें म्हज्या पालकांच्या तोंडा कडेन पळयलें. तांच्या तोंडार निरशेवणेचे कसलेच भाव नाशिल्ले. सर्तींत आपले पुराय तांकीन आनी प्रामाणीकपणान बेस बरें सादरीकरण करप म्हत्वाचें, इनाम न्हय हें तांणी म्हाका त्या दिसा सांगलें. आयजूय हांव हो मंत्र जपत आयलां.
त्याच शणै गोंयबाब सर्तीच्या समारोप सुवाळ्याक कोंकणी भाशा मंडळान ह्या वर्सा सुत्रसंचालक म्हूण म्हजी निवड केली त्या खिणाक म्हाका सर्तींतलें आतां मेरेनचें सगल्यांत व्हड इनाम मेळिल्ल्याची खोस भोगली. तेच वांगडा ह्या सर्तीच्या मडगांव केंद्राची संयोजक म्हूण पुराय जापसालदारकी म्हजेर सोंपोवन मंडळान म्हज्या कथामाळेंतल्या सहभागाची आनी तातूंतल्यान मेळयिल्ल्या अणभव, आत्मविस्वास आनी कुशळटायेची सगल्यांत व्हडली पावती म्हाका दिली. एक सर्त, तिचीं गोंयभर अठरा विंगड विंगड केद्रां, हजारां वयर सर्तक, एकशें साठ परिक्षक, तशेंच संयोजक, निवेदक, आपवावुरपी म्हूण शेंकड्यांनी तरणाटे उमेदीन आनी एका ध्येयान काम करतात आनी हांवूय तांतूंत वांटेकार जातां हाचें समाधान आनी अभिमान हांवें अणभवलो.
सर्तींत वांटेकार जातालों तेन्ना म्हाका सदांच आयोजकांचें अप्रूप दिसतालें. कसो घडोवन हाडटात आसतलो हो येदो व्हडलो आटाप असो म्हाका प्रस्न पडचो. आतां आयोजक जातगूच सगल्यो जापो आपसूक मेळटात. सर्तीच्या दोनेक म्हयन्या आदीं मंडळ शिक्षकां खातीर कार्यशाळा घेता. सर्तीच्या मुखेल संयोजकाची निवड करता. तो केंद्र संयोजकांची निवड करता. तांच्यो बसका जातात. केंद्र संयोजक परिक्षकांची निवड करतात. मंडळ परिक्षकां खातीर खासा कार्यशाळेचें आयोजन करता आनी तांकां सर्तीचो उद्देश, नेम, अटी, परिक्षण करतना घेवपाची जतनाय आदीं गजालींचेर मार्गदर्शन करता. थळाव्या पांवड्यार एखादी संस्था मंडळाक आयोजना खातीर उमेदीन पालव दिता. हजारांनी सर्तक कथाकथनाच्या ह्या उत्सवांत वांटेकार जातात, आनी एक दीस म्हजे सारखेच सर्तीच्या आयोजनांत वांटेकार जातात. सर्तीचें खरें येस हेंच. तेंच सर्तकाचें खरें मोल.
चौथी यत्ता पास जावन हांवें मडगांवच्या महिला नूतन हे शाळेंत प्रवेश घेतलो. सवी यत्तेंत आसतना शालेय तशेंच केंद्र पांवड्यार म्हाका पयलीं इनामां फावो जालीं. निमाणें फेरयेंत म्हाका इनाम फावो जालें ना. पूण हांव निरशेलों ना. परिक्षकांचेर वा आयोजकांचेर हांवें वा म्हज्या शिक्षक वा पालकांनी दुबाव घेतलो ना. ताणी म्हज्यांतल्यो उणिवो म्हाका दाखोवन दिल्यो. थोडोसो यत्न केल्यार तुजें सादरीकरण आनिकूय प्रभावी जावं येता हो आत्मविस्वास दिलो. सातवेक आसतना हांवें आनिकूय चड यत्न करपाचो संकल्प केलो. म्हज्या पप्पान सर्ती खातीर खासा काणी बरयली. हांवें म्हजे परीन यत्नांत खंयच उणाकपण उरचें ना हाची जतनाय घेतली. शाळेंत म्हाका पयलें इनाम फावो जालें. केंद्र पांवड्यारूय म्हाका पयली सुवात फावो जाली. आयज मेरेन म्हाका केन्नाच राज्य पांवड्यार इनाम फावो जावंक नाशिल्लें. इनामाची सक्ती नासली तरी भक्ती आशिल्लीच. निमाणें फेरयेंत म्हाका पयलें इनाम फावो जालें. हांव खोशयेन फुल्लों. म्हज्या शिक्षक आनी पालकांकूय उपाट खोस भोगली. पूण अपेस जितल्या संयमान घतिल्लें तितलोच संयम जैतांतूय घेवचो आसता हें म्हाका तांणी शिकयलें. आठवी यत्तेंत आसतना म्हाल आनी निमाणें फेरयेंत म्हाका तिसरी सुवात फावो जाली. णववी यत्तेंत म्हाल पांवड्यार पयलें आनी निमाणें फेरयेंत तिसरें इनाम फावो जालें. धावी यत्तेंत आसतना हांव निमाणें फेरये खातीर पात्र थारपाक शकलों ना. म्हाका वायट दिसलें ना. कारण शणै गोंयबाब सर्तीन म्हाका जैताच्या खोशये वांगडाच अपेसाची खंत पचोवपाचें भान दिल्लें.
आयज शणै गोंयबाब सर्त हो एक ब्रॅंड जाला. अश्या वेळार आपल्या भुरग्यांचेर इनामा खातीर दबाव घालपी आनी तें मेळ्ळें ना जाल्यार आपल्या भुरग्यां मुखारूच परिक्षक वा आयोजकां कडेन वाद घालपी पालक वा शिक्षक हांव जेन्ना पळयतां तेन्ना म्हाका तांची काकुळट दिसता. हजारांनी सर्तकांतल्यान केंद्र पांवड्यार आनी जिल्हो वा राज्य पांवड्यार पात्र थारप हेंच व्हड इनाम अशें पालकांक दिसपाक जाय. सर्तींतल्या सहभागांतल्यान एक दीस आपलो भुरगो आयोजनाचो म्हत्वाचो घटक जावचो हें ध्येय पालकांनी दवरपाक जाय. तशें जालें जाल्यारूच त्या भुरग्याच्या सर्जनशिलतायेक मेळिल्लें ते पयलें इनाम थारतलें, आनी सर्तीच्या आयोजनाचें ध्येय साध्य जालें म्हणपाक मेळटलें.
अनीश अग्नी
9405951996
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
