भांगरभूंय | प्रतिनिधी
पायलट म्हणाल्यार विमान चालक हें सवंसारांतलो दर एक मनीस जाणा. तशें पायलट हें उतर हेर कामांत लेगीत वापरतात. देखीक पायलट प्रॉजेक्ट. पूण म्हाका दिसता अाख्ख्या संवसारांत आमच्या गोंयांतूच मोटारसायकलीन भाडें मारतल्याक पायलट म्हणटात आसुये. आमच्या देशांत आनी देशा भायर थारावीक पयशे घेवन व्हड जापसालदारकेन पॅसेंजराक घेवन येरादारी करपी मोटारसायकल पायलट जगांत खंयच मेळचो ना. गोंयांत शार तशेंच कांय गांवगिऱ्या वाठारांनी भौशीक बस येरादारीची वेवस्था ना, अशा सुवातींनी मोटासायकलीन भाडें मारपाचें काम करतात.
गोंया भायलो कोणूय येवपाचो आसल्यार आमी ताका पायलट करून अमूक दिल्ल्या नाम्यार येवपाक सांगतात.
गोंय मुक्त जावचे पयलीं मोटारसायकलीन भाडें मारपी पायलट नासले. मुक्ती उपरांत दोन वर्सांच्या काळांत कोणा सभाग्याचे तकलेंत मोटारसायकलीच्या फाटल्यान पॅसेंजराक बसोवन तो सांगता त्या जाग्यार पयशे घेवन भाडें मारपाची दोनचाकी वाहनाची येरादारी सुरू करपाची बरी कल्पना आयली जायत. त्या मनशाक आतां सोदून काडप तशें कुस्तार. पूण जाणें कोणें ही पद्दत वास्तवीक रुपांत हाडली ताची खरेंच तोखणाय करची अशें म्हाका दिसता.
कारण फुडें ह्याच वेवसायाचेर निंबून खूब जणांनी आपलो संवसार चलयलो. भुरग्यांक बरें शिक्षण दिवन व्हड केलीं. तांचीं लग्नांय केलीं हो त्या वेवसायांतलो जमेचो भाग.
जगभर जे पायलट आसात ते विमान चलोवपी. मात गोंयांतल्या मोटारसायकलीन भाडें मारतल्याक पायलट हें नांव कशें पडलें काय हें येवजुवप सहाजीक आसा. कारण मळबांतल्यान शेंकड्यांनी प्रवाश्यांक घेवन वचपी वैमानीक आनी आमच्या गोंयांत मोटारसायकलीर बसोवन भाडें मारपी पायलटाची तुळा करप म्हणल्यार मुर्खपणाचें जातलें. जेन्ना अतीमहनीय सोयरे गोंयांत येतात वा वतात तेन्ना तांची शासकी सोयरे म्हणूनन स्वागत मिरवणुकीच्या रुपांत करतात. तसल्या मिरवणुकांनी मुखेल सोयऱ्याच्या गाडयेच्या दोनूय वटांनी आनी फुडल्यान धव्या युनिफॉर्मांतले मोटारसायकल चालक आसतात. तांकां सरकारी प्रोटोकोलांत पायलट अशें म्हणटात.
गोंय मुक्ती उपरांत जेन्ना असल्यो मिरवणुको जाताल्यो तांकां पायलट म्हणटात अशें लोकांक कळटकूच मोटारसायकलीन भाडें मारतल्याक गोंयचें लोक पायलट म्हणपाक लागले. ताचे आदीं भाड्याची मोटरसायकल म्हणटाले अशें आदल्या तेंपा वयले जाणकार सांगतात. आतां गोंयांत दर एक घरा मुखार दोन-तीन दुचाकी दिसतात. पूण आदल्या तेंपार हाचें प्रमाण खुबूच उणें आशिल्लें. त्या वेळार खंय हो पायलट लोकांक भोव उपेगी पडटालो.
गोंयांत पायलट वेवसायाक सरकारी मान्यताये उपरांत पुराय लोकां मदीं भाड्याची मोटारसायकल पायलटाच्या वेवसायाची रुजवण जातकूच त्या तेंपा वयली राजदूत, जावा, येझडी मोटारसायकलीच्या फाटल्या फुडल्या पंख्यांक हळडुवो रंग मारून मुखेल बस थांबे, तिस्कार, आंब्या, वडा, पिपळा रुखा मुळांत मोटारसायकल स्टॅण्डार काडून रखरखीत वतांत घाम गळयत, पावसांत भिजत, पायलट भाड्याची वाट पळयताले. तांचो भेस टीशर्ट, पॅन्ट, दोळ्यार गॉगल, माथ्यार चॅपें आनी खंयचे तरी एक दिसाळें, आनी मोटारसायकलीच्या कागदपत्रांची गियेक हुमकळिल्ली कापडा पोती. त्या तेंपार आयचे भशेन हॅल्मेटाची सक्ती नाशिल्ली. तरी पूण आपले तकलेची जतनाय घेवपाचे नदरेन पायलट हॅल्मेट वापरताले. गोंयांत दरेका म्हालांतल्या मुखेल बस स्टॅण्डा लागीं हळडुव्या रंगान पंखे पेंटींग केल्ल्यो पायलट मोटारसायकली नदरेक पडटात.
खंयच्याय प्रासार प्रवासी बस आयली तशे सगले पायलट बेगोबेग मोटारसायकलीक कीक मारून स्टार्ट करतात आनी पॅसेंजराक ‘बाय… बाब खंय वचपाचीं’ अशें नमळायेन विचारतात. पॅसेंजरान खंय वचपाक जाय तें सांगतकूच ज्या वाठारांत तांकां वचपाचें आसा त्या वाठारांत वचपी बस आसल्यार तांकां खंयचे बसीर गेल्यार तुमी पावतलीं तेंवूय प्रामाणीकपणान सांगतात.
पायलट आपल्या पॅसेंजरां मदीं चलयो, बायलो, दादले, धनीक, गरीब असो केन्नाच भेदभाव करिनात. उरफाटें बायलांक पायलटांचेर चड विस्वास. केन्नाय रातची जर निमाणी बस चुकल्यार पायलटाचेर विस्वास दवरून खंयच्याय आड रस्त्यान पायलट करून वचपाक तीं भियेनात. आयज मेरेन गोंयांत पायलटान पॅसेंजराक पावयतना नाडलो वा बायलांचेर जबरदस्ती केली अशी खंयच्याच पुलीस स्टेशनार कागाळ रजिस्टर ना अशें म्हाका दिसता .
आदल्या तेंपार गोंयांत सगल्या लोकां कडेन गांवांनी टेलिफोन, स्कुटरी, मोटारसायकली नाशिल्ल्यो. गांवांत कोणाची भलायली इबाडल्यार वा कोणूय भायर पडल्यार दोतोराक घेवन येवप, भायर पडिल्ल्या मनश्याल्या सोयऱ्यांक कळीत करपाचें काम पायलट मनीसपणाचे भावनेन निशुल्क करताले. पायलट जर गांवचोच आसल्यार तो भाडें घेवन शारांत गेल्यार शारांत रावपी गांवच्या लोकांनी धाडिल्ली भेटवस्त तो त्या मनशाक पावयतालो. तशेंच कांय लोक तांचे कडल्यान घरा नुस्तेंय पावयताले. हो एक पायलट वेवसायिका मदलो समाजसेवेचो भाग अशें हांव मानता.
पायलट हो पॅसेंजरांक सेवा दिवन आपलो संवसार चलयता. ताची सगली जाेड तांचेर निंबून उरता.
दीसभर कश्ट करून जे पयशे मेळयता तो जमा करून आपल्या भुरग्यांक बरें उच्च शिक्षण दिवन
दोतोर, इंजिनिअर, नर्स, शिक्षक घडयल्यात. ही खरेंच तोखणाय करपा सारकी गजाल.
आतांच्या काळांत चडशा लोकां लागीं स्कुटरी, मोटारसायकली आसात. पायलटांनी आतां नव्या जमान्यांतल्यो मोटारसायकली घेतल्यात. पूण आतां तांचो पयलीं भशेन वेवसाय फुलना. शारांतलें कांय लोक आपल्या भुरग्याक स्कुलांत पावोवपा खातीर, हाडपा खातीर पायलटाचो आदार घेतात. गोंयभर पायलटांच्यो संघटणा आसात. सरकारी आनी काय समाजसेवी संस्थांचो तांकां पालव मेळिल्ल्यान दर बस स्टॅण्डा लागीं तांचे खातीर पायलट शेडीचो लाव मेळ्ळा. पायलट वेवसायांत येवपाक इस्तूक बेकार तरणाट्यां खातीर मोटारसायकल घेवपाक सरकार आदार करता ही एक बरी गजाल आसली तरी पायलटाचो धंदो आतां पयलीं भशेन उरिल्लो ना हिवूय तितलीच खरी गजाल.
सुदिन वि. कुर्डीकार
8275425404
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
