भांगरभूंय | प्रतिनिधी
ब्रिटीश साहित्यीक विलीयम शेक्सपियर हांणी ‘रोमियो ज्युलिएट’ नाटकांत म्हणलां, ‘नांवांत कितें आसा? गुलाबाक दुसरें कितेंय नांव दवरल्यार ताचो वास आसा तसोच उरतलो!!’ पूण आयज ते आशिल्ले जाल्यार आपल्या ह्या वाक्या खातीर समेस्त प्रेक्षकांची माफी मागपाचे. कारण नांवांत खूब कितें आसा, हें आमी भारतीयांनी सिद्ध केलां. कोणाचें अर्दकुटें नांव घेतलें जाल्यार आमी तिडकतात, कांय नांवां बदलपाचो आमचो आग्रो आसता, थोड्या नांवांची आमकां अॅलर्जी, तर कांय नांवांचीं भिरांत, कांय नांवां आमच्या स्वाभिमानाक, संस्कृतायेक खत लायतात खंय, कांय नांवां बदल्लीं कांय आमकां अभिमानाचो उमाळो येता, कांय नांवां आमकां गुलामगिरीचें प्रतीक दिसपाक लागल्यांत!! उंचेलें शिक्षण घेतकूच बरें नांव मेळोवन दिवपी संस्थेचें नांव बदलपाक जाय म्हूण आमी अशिक्षिता सारके झगडून एकमेकांच्यो तकल्यो फोडल्यात… आनी शेक्सपियर म्हणटात, नांवांत कितें आसा? नांवांत खूब कितें आसा, सायबा!!
फाटले कांय दीस दोन नांवां गाजपाक लागल्यांत. ‘इंडिया’ आनी ‘भारत’!! दोनूय नांवां तशीं आमचे आवडीचीं. कांय लोक भारत वापरतात, तर कांय लोक इंडिया. सगल्या मळांचेर हीं नांवां आमी घेतात, तें घेतलें काय आमचें राष्ट्रप्रेम खदखदपाक लागता. ह्या दोनूय नांवांचो वापर आमी तितल्याच अभिमानान केला. पूण आतां एक नांव आमच्याच मदल्या कांय जाणांचें नांवडटें जालां आनी कांय जाणांचें आवडटें. थोडे भारता वटेन तर थोडे इंडिया वटेन रावल्यात. कांय जाणांक इंडिया म्हणलें काय तिडक मारपाक लागल्या, तर थोडे इंडियाच्या मोगांत आसात. थोड्यांक दोनूय जाय. हो नामांकरण वाद सुरू जालो, राष्ट्रपतींनी जी- 20 देशांच्या प्रतिनिधींक धाडिल्ल्या निमंत्रण पत्रिके वयल्यान. तातूंत ‘प्रेसिडेंट आॅफ भारत’ असो उल्लेख आशिल्लो. मागीर घे बोवाळ. पुराणकाळांतले दावे, ब्रिटीशांनी हें इंडिया नांव दिलें, असो युक्तीवाद. तर दुसरे वटेन राज्यघटनेंतल्या कलम एकांतल्या ‘इंडिया.. दॅट इज भारत’ हाचो विरोधकां कडल्यान उल्लेख. आतां ह्या वादांत फुडाऱ्यांनी, सिनेमा नटांनीय उडकी घेतल्या.
सत्ताधाऱ्यांक इंडिया आघाडी स्थापन जायत सावन भंय दिसपाक लागला. ‘जुडेगा भारत, जीतेगा इंडिया’, ही आमची टॅगलायन. फाल्यांय आमी ताका भारत हेंय उतर जोडलें जाल्यार तुमी खंय वतले? खंयचें नांव सोदतले? आमचो मोग इंडिया आनी भारताचेरूय आसा, अशें खासदार मनोजकुमार झा म्हणटात. अभिनेत्री कंगना राणावत म्हणटा, इंडिया हें नांव ब्रिटिशांनी दिलां. तें भारत आसचें. सगल्यांक परबीं. आयज आमी गुलामगिरींतल्यान मुक्त जाले. जय भारत. अमिताभ बच्चन हांणी ‘भारत माता की जय’ अशें टिट्व केलां. जॅकी श्राॅफ म्हणटा, इंडिया आसल्यार भारत आसा आनी भारत आसल्यार इंडिया. नांव बदल्लें, तरी आमी थोडेच बदलतात? जॅकीच्या निमाण्या वाक्यांत खूब अर्थ भरला. ओमर अब्दुलान स्टेट बँक आॅफ इंडिया, इस्रो, आयआयटी, आयआयएम हांच्या नांवांचें कितें करतले, असो प्रस्न केला. फक्त विरोधकांनी इंडिया नांव दवरलां म्हूण तुमी देशाचें नांव भारत करतात जाल्यार तशें सांगात, आमी आमचे आघाडीचें नांव बदलतात, असो थोमणोय ओमरान मारला.
चवथीच्या दिसांनी (18 ते 22 सप्टेंबर) संसदेचें खाशेलें अधिवेशन आपयलां. तातूंत हो नव्या नांवाचो बारसो जावं येता. एक देश, एक वेंचणुकेचोय निर्णय जावपाक शकता. चवथ आसतना अधिवेशन आपयलां म्हूण महाराष्ट्रांतले खासदार बेजार जाल्यात. संवसारांतल्या सात देशांनी आपलें नांव बदल्लां. तातूंत बांगलादेश, श्रीलंका, म्यानमार हे देशूय आसात. भारत हें नांव तशें प्रचलीत. पूण प्रादेशिकताये पसून पयस आशिल्लें, इंग्लिशीचो प्रभाव आशिल्ले लोक इंडिया हें उतर चड वापरतात. सिनेमां, तातूंतल्या पदांनी तें लोकप्रीय केलां. कांय संस्थां, संघटणांनी तें वापरलां. तेन्ना नांव बदलतना कोणाक अडचण येवचीना हें पळोवचें पडटलें. बाॅम्बेचें मुंबय आनी मद्रासाचें चेन्नय जालें. कलकत्ताचें कोलकाता जालें. तेन्ना भारत जालें म्हूण सामान्य मनशाक तसो फरक पडचोना. सुरवातेक मात्शें खाकडूंक जातलें इतलेंच.
अधिवेशनांत हो नांव बदलपाचो थाराव येतलो हो विरोधकांक फक्त दुबाव. तशें जातलेंच अशें ना. शेक्सपियर म्हणटात, नांव कितेंय आसलें तरी गुलाबाचो वास कायम तसोच उरतलो. इंडियाचें भारत जालें तरी भारतीय समाजांत जंय मोग, मायपास, एकचार आसा तो थंय तसोच उरचो. भ्रश्टाचार, गैरप्रकार, दुस्वास, गुन्यांव मात नव्या ‘भारतां’त वखदाक पसून नासचे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
