भांगरभूंय | प्रतिनिधी
यत्न केले तर तुमकां यश मेळप कठीण न्हय. भालो फेक भांगरा मनीस नीरज चोप्राची देख घेयात. क्रिकेट, हॉकी, बॅडमिंटना सारके वेंचिक खेळ सोडले तर एथलेटीक्सा सारके प्रकार लेगीत लोकप्रीय करपाक नीरज आनी हेर खेळगड्यांनी खूब हातभार लायला. म्हणूनच तर 7 ऑगस्ट हो भालो दीस म्हूण मनोवपाचो निर्णय सरकारान जाहीर केलो. आतां 23 ऑगस्टाक लेगीत म्हत्व आयलां. खेळ जावं हेर अभ्यास आतां हातूंत मार्गदर्शन मेळूं शकता. आॅनलायन, ऑफलायन वर्गांनी शिक्षकां वरवीं अश्या जायत्या मार्गांनी तुमकां हें मेळूं शकता. हाचो लाव घेवन जो फांटो घेवपाक आमी फाटी आसता ताचेर भर दिवपाचो यत्न आमी कित्याक करचो न्हय ? लश्कर, बॅंक, एथलेटिक्स, नागरी परीक्षा सारक्या फाट्यांचेर आमी चड भर कित्याक दिवचो न्हय?
एखादी सर्त देशा भायर जाता तेन्ना थंयच्या वातावरणाक स्पर्धक वळखींचो जावचो म्हूण ताणें आदींच थंय वचप गरजेचें आसता. तेच धर्तेर पास जाल्लो उमेदवार फुडें नोकरी करतलो तेन्ना ताका कितें अडचणी येवं शकतात, हें वळखून जर ताका ह्या अडचणींचेर प्रशिक्षण दिलें तर बऱ्याच उमेदवारांक बरें पडटलें. होच निकश करियरा भितरुय येता. देखीक लश्कर जावं बॅंक फाट्यान आमी कमी पडटात कित्याक? हाची एक जाप मार्गदर्शन ना म्हूण ही आसूं शकता. हें मतीन दवरून काय कॉलेजी, बॅंकेचे मार्गदर्शन, परीक्षा हांचें आयोजन करता असोच उपक्रम ताणी हेर फाट्यां खातीरूय दवरुं येता. व्याख्यान जरूर दवरतात आसतले, पूण मार्गदर्शनाची वळेरी कोर्सा भितर चड जाता हें कोणूय मान्य करतलो. खेळ जावं कसलोय फाटो जाका रस आसा त्या वेंचिक विद्यार्थ्याक एकठांय हाडून अशें मार्गदर्शन केलें तर ताचो उपेग चड जावं येता. हाका खर्च आसा, पूण तो खर्च विद्यार्थ्यांच्या भल्या खातीर आसा हें आमी विसरूंक फावना. म्हापशाची काकुलो कॉलेज हि विंगड विंगड उपक्रमा खातीर प्रसिद्ध आसा. हालींच तांणी आपल्या कॉलेजच्या वाचनालयाची दारा लोकांखातीर सांज वेळेत उक्ती केल्यात. तांच्या वेवस्थापनान प्राचार्याच्या मजतीन सी ए ह्या फाट्याक भरपूर मागणी आसा हें लक्षान दवरून सी ए चे खाशेलें वर्ग सप्टेंबर सावन आयोजित करपाचे केल्या असो उपक्रम हेर कॉलेजानी आपल्या परिसरातल्या भुरग्या खातीर दवरचो. खास करून गांवगिऱ्या वाठारान आसपी कॉलेजानी.
हाच्या खातीर एक उपाय म्हळ्यार सर्वेक्षण करचे ते करुनूच पावल फुडें घालचे.
विद्यार्थ्यांची संख्या खंयच्या फाट्यांत चड आसा ते कळ्ळे उपरांतूच फुडें वच्चे. अर्थात त्या- त्या कॉलेजांनी अणभवी तज्ञ मंडळी आसात तांचो लाव घेवं येता. हातूंतल्यान आनी उपक्रम सुचूं शकतात, पूण हें सगळें विद्यार्थ्याक लाव जावपी आसपाक जाय. एक उदाहरण मुद्दाम दितां. समजा फुडल्या म्हयन्यांत दोतोर रामाणी आयोजित मॅरेथान रेस फोंड्यां जातली. ते निमित्तान मॅरेथान आयोजक वा हे रेसीची प्रेरणा घेवपी एखादो आमी आफोवं शकतात. ताका स्वताक मॅरेथानांत वांटो घेनसो दिसलो, ताचीं कारणां जर ताणें विद्यार्थ्यांक सांगलीं तर ताचो परिणाम बरोच जातलो. भलायके खातीर धांवप, ते खातीर बेगीन उठप हें म्हत्वाचें कितलें आसा, हें तो स्वताच सांगतलो. हाचो प्रभाव विद्यार्थ्यांचेर जरूर जातलो. गोंयांतल्या उमेदवारांनी जरूर सर्वेक्षण करून जे सुवातेर कोण वचूंक पळयना त्या फाट्याची जरूर कारणां सोदचीं. तांकां तांच्या करियराची वाट मेळूं शकता. आमी त्रास घेवपाक फाटीं आसात काय कितें? हाची जापूय तुमकां दिवची पडटली. खरें तर त्रास काडपाची पिराय तरणाटीच आसता. हे पिरायेक जरी आमचे कडेन घडये पयसो नासलो तरी शक्त, उत्साह जरूर आसता. ताचो उपेग अभ्यासाक करचो. न्हिदपा खातीर करचो न्हय.
नीरज चोप्रा ल्हान पिरायेचेर गुबगुबीत आशिल्लो हाची खंत दिसून ताच्या बापायन ताका मैदानार व्हेलो. त्या मैदानावेलो भालो फेक खेळ ताका आवडलो आनी फुडें ताणें इतिहास रचलो. जर ताणें आळस केल्लो जाल्यार.. !
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
