…. आतां सूर्यनमस्कार !!…… इस्रोच्या मुकूटांत मानाचें नवें पीस.

भांगरभूंय | प्रतिनिधी

० चांद्रयान- ३ चे यशस्वी मोहिमे उपरांत भारतीय अंतराळ संस्था (इस्रो) आतां सूर्य नमस्कार घालपाक सज्ज जाल्या. सूर्याच्या अभ्यासा खातीर ‘आदित्य एल १ हें अंतराळयान श्रीहरिकोटा सावन आयज ११. ५० वरांचेर सूर्याचे दिशेन गेलें.

० ‘पीएसएलव्ही सी५७’ हो बळिश्ट वाहक ‘आदित्य एल १’ यानाक घेवन वयर गेलो. पृथ्वी सावन १५ लाख किलोमीटराचेर ‘एल १’ (सूर्य- पृथ्वी लॅग्रॅन्जिअन पॉइंट) हे कक्षेंत यान थीर जातलें आनी सौर वारें आनी सूर्याचे प्रभामंडल हांचें निरीक्षण, अभ्यास करतलें. आकाशगंगेंतल्या ताऱ्यांचो अभ्यास करतलें. हें यान सुर्याचेर देंवचें ना. अजून मेरेन वितळनाशिल्लो धातू तयार करप शास्त्रज्ञांक जमूंक ना. ‘एल’ कक्षेंत पावपाक ताका १२७ दीस लागतले.

० सुर्याचेर ज्वालामुखी सारकीं ल्हारां हवेंत उसळटात. एक प्रकारचो स्फोटूच तो. ह्या प्रत्येक ल्हारांत एक पृथ्वी सहज मावता. ह्या ल्हाराक लागून पृथ्वी वयल्यो दूरसंचार यंत्रणां इबाडपाक शकतात. पृथ्वीभायल्या अवकाशाचेरुय परिणाम जातात.

० सुर्याच्या अभ्यासा खातीरचे मोहिमेची घोशणा इस्रोन २००८ त केल्ली. आतां मेरेन नासा, युरोपियन स्पेस एजन्सी अशा मोजक्याच देशांतल्या संस्थांनी सुर्या विशींच्या अभ्यासा खातीर यानां धाडल्यांत.

० सुर्याचेर दिसता तो उजो न्हय. ती गॅस. ताच्या भायल्या भागाचें, फोटोस्फियराचें तापमान ५५०० अंश सेल्सियश. सुर्याच्या केंद्रबिंदूचें भितरल्या मध्यभागाचें तापमान १ कोटी ५० लाख अंश सेल्सियस इतलें आसा. तोपांत उदक तापोवपाक दवरतकच ताचें तापमान १०० अंश सेल्सियश जाता तेन्ना उदक सळसळून ताका फुलां येतात.

० इस्रोची ‘आदित्य एल १’ यानाचे मोहिमेक २०१९ वर्सा सुरवात जाली. ते खातीर ४०० कोटी + खर्च जाला.

० हे सूर्य मोहिमेक लागून भारतीयां मदीं उमेद निर्माण जाल्या. सकाळच्यान साबार जाग्यांचेर सूर्यनमस्कार घालून ही मोहीम येशस्वी जावची म्हूण लोकांनी प्रार्थना केली. डेहराडूनाच्या योगपिठांतूय सूर्यनमस्कार उपक्रम चालीक लावन इस्रोक परबीं दिलीं.
ॐ मित्राय नमः, ॐ रवये नमः, ॐ सूर्याय नमः, ॐ भानवे नमः, ॐ खगाय नमः, ॐ पूष्णे नमः, ॐ हिरण्यगर्भाय नमः, ॐ मरीचये नमः, ॐ आदित्याय नमः, ॐ सवित्रे नमः , ॐ अर्काय नमः, ॐ भास्कराय नमः, ॐ श्री सबित्रू सुर्यनारायणाय नमः. सूर्यनमस्कार हो आख्ख्या आंगाक जावपी बरो व्यायाम.

० ह्या यानांत सात उपकरणां आसात. तातूंत आंतरविद्यापीठीय खगोलशास्त्र आनी खगोलभौतिकी केंद्रान विकसित केल्ल्या ‘सोलर अल्ट्राव्हायोलेट इमेजिंग टेलिस्कोपा’चो (सूट) आसपाव आसा. ते वरवीं सूर्याचीं अतिनील किरणां (अल्ट्रा व्हायलट किरणां, जीं मनशाचे काती खातीर धोक्याचीं आसतात), तापमानाचो अभ्यास करतले. अतिनील किरणाचो ह्या यानाचेर परिणाम जावचो ना. हे दुर्बिणीचो आराखडो पुणेंच्या आयुकान तयार केला, तर निर्माण, चांचणी इस्रोंत केल्या. २०१३ सावन हें काम चालू जाल्लें. हे दुर्बिणींत ‘एआय’ चो वापर केला.