भांगरभूंय | प्रतिनिधी
नवी दिल्ली, खबरां संस्था ः संवसारभर वायु प्रदुशणाचो धोको दिसानदीस वाडत आसा. ‘एअर क्वालिटी लाइफ इंडेक्स’ (AQLI) 2023 प्रमाण शिकागो विद्यापिठाच्या ‘एनर्जी पॉलिसी इन्स्टिट्यूट’न 29 ऑगस्टाक सादर केल्ल्या अहवाला प्रमाण वायु प्रदुशणाच्या समस्याचो दक्षिण आशियांतल्या लोकांच्या आयुश्याचेर गंभीर परिणाम जाला. वायु प्रदुशणाक लागून तांचे आयुश्य 5.1 वर्सांनी उणे जाला. तातूंत बांगलादेश, भारत, नेपाळ, पाकिस्तान ह्या देशांतल्या लोकांचो आस्पाव आसा.
वायु प्रदुशणाक लागून मनशाचें आयुश्य 5.1वर्सांनी उणें जावपाक लागलां. ते भायर हे समस्याक लागून हृदयविकारांचो आनी रगतपेशींच्या दुयेंसाचो धोको वाडला. भलायकेच्या समस्यांक लागून भारतीयांचें आयुश्य सुमार 4.5 वर्सांनी उणें जावपाक लागलां.
ह्या अहवालांतली एक गजाल म्हळ्यार प्रदुशणाची पातळी 2000 पातळेचेर आसली जाल्यार देशांतलें आयुश्य फकत 3.3 वर्सांनी उणें जावपाचें; पूण फाटल्या कांय वर्सांत प्रदुशणाच्या पातळेत चड वाड जाल्ल्यान हुस्को वाडला.
संवसारांत भारत हो दुसऱ्या क्रमांकाचो सगळ्यांत चड प्रदुशीत देश. भारतांतले 1.3 अब्ज लोक अशा वाठारांनी रावतात, जंय प्रदुशणाची पातळी संवसारीक भलायकी संघटनेच्या मार्गदर्शक तत्वां परस चड आसा. भारतांतली 67.4% लोकसंख्या भारताच्या राश्ट्रीय एअर क्वालिटी इंडेक्स परस चड वाठारांनी रावता. वायु प्रदुशणाचो परिणाम भारताच्या उत्तर वाठारांनी चड दिसता.
उद्देगीकीकरण, वाडती लोकसंख्या आदी कारणांक लागून प्रदुशण वाडत आसा. इंधनाच्या चड वापराचो प्रदुशणाचेर परिणाम जाता. भारत आनी पाकिस्तान सारकिल्ल्या देशांनी 2000 वर्सा सावन वाहनांचो आंकडो चार पटींनी वाडला, जाल्यार बांगलादेशांत 2010 ते 2020 ह्या काळांत वाहनांचो आंकडो तिप्पट जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
