भांगरभूंय | प्रतिनिधी
“तुका सवणीं जाय? घरांत पांजरो लावं नाका, पोरसांत झाडां लाय”.हीं सर्गेस्त मनोहरराय सरदेसाय हांचीं उतरां
म्हज्या भोव आवडीचीं. खरेंच झाडां फक्त सवण्यांक, पिसोळ्यांकूच आकर्शीत करिनात जाल्यार आपल्या सरभोंवतणी ‘गूड वायब्स’ वा ‘पोझिटिव्ह औरा’ तयार करतात. घरा मुखार आंगण आनी घरा कुशीक वा घरा फाटल्यान पोरसूं आसप ही गोंयकारांची, गोंयच्या गिरेस्त संस्कृतायेची वळख. घरा भोंवतणचीं झाडां, कुंडींतले रोंपे पळयतकूच जणू काय व्हंकलेन केल्लो शिरंगारच अशें दिसता. म्हज्या मतान एका घराची सोबाय घरा मुखा वेल्या पोरसांतल्या झाडांनीच वाडटा.
पाचव्या पानां मदीं फुलिल्लो तांबडोच गुलाब, गेटीचेर चडिल्लीं गोकर्णीची वाल आनी ताका फुलिल्लीं जांबळी आनी धवीं फुलां, हळडुवोच कर्नो, कुचकुचीत रंगबेरंगी रामुल्याचीं फुलां, तांबडीगुंज चित्रंगीची फुलां पळोवन मन भुल्लुसून वता. तशेंच आपल्या खासा बागेंतलीं फुलां सकाळचे पुजेक देवाक ओंपतना आगळीच प्रसन्नताय जाणवले बगर रावना.
घरांत वा घरा भोंवतणीं झाडां आशिल्ल्यान आमचे भलायकेचेर आनी दीसपट्टे जिणेचेर बरो परिणाम जाता. सरभोंवतणी झाडां आशिल्ल्यान चडांत चड प्राणवाय मेळटा. दुशीत हवा निवळ करपाचेंय काम तीं करतात. हिरवळ, रंगबेरंगी फुलां पळयतकूच आमचें ध्यान मन प्रसन्न जाता. आमची एकाग्रताय सुदारता, चिंता आनी ताण उणो करपा खातीर आदार करता.
पूण जायते फावटी झाडां रोवूंक वा बागकाम करूंक सोदतल्यांक प्रस्न पडटा तो म्हणल्यार खंयची झाडां रोवचीं?, खंय रोवचीं?, कशीं रोवचीं वा तांची देखरेख कशी करची? सगल्यांत पयलीं झाडां रोवपाक म्हत्वाची आसता ती म्हणल्यार सुवात, बरी सुवात सोदतना अशी सोदची ज्या जाग्यार कमींत कमी 6 वरां वत पडटा. कारण चडांत चड झाडांच्या बऱ्या वाडी खातीर 4-5 वरां वत गरजेचें. तशेंच चड खर वता वा सामकें कमी वत आशिल्ल्या सुवातींचेर रोवप टाळचें. झाडांच्या गुणधर्मा प्रमाणें मातयेची निवड करप गरजेची. गार्डन सॉयल, लोमी सॉयल वा दोंगराळ माती, जे मातयेंत ओलसाण वा मोयश्चर आसता अशी माती साबार झाडां खातीर योग्य थारता. फॉस्फरस, नायट्रोजन, पोटॅशियम (NPK) सारकिल्ले धातू मातयेंत आसल्यार मातयेक तशेंच रोंप्याक फावो तें पोशण मेळपाक पावता. मातयेंत अदीं मदीं सारें, च्या करतकूच उरिल्लो च्यापालो, केळ्यांच्यो, बटाटांच्यो साली, तातयांच्या कल्लांचो पिठो भरशिल्यार झाडां खातीर गुणकारी थारता.
झाडांक जाय तितलेंच उदक घालप हें लक्षांत दवरूंक जाय. कारण चड उदक घाल्यार तांची मुळां कुसपाची शक्यताय आसता वा कमी उदक घाल्यार तीं सुकूंक शकतात. तांदूळ, दाळ, चणें भाज्ज्यो बी धुंयतना वापरिल्लें उदक नॅच्युरल फर्टीलायझराचें काम करतात. स्नेक प्लांट, स्पायडरप्लांट, लकी बांबू, मनीप्लांट, कांटेकुवंर तशेंच दसण, रोजां, गुलाब, आदीं रोंपे सुरवातेक लावन आपल्या घरा स्वताची ल्हानशी बाग तयार करूं येता. ह्या कांय रोप्यांची खाशेतलताय म्हणल्यार हांकां चड देखरेखीची गरज लागना आनी बदलत्या हवामाना खातीर, ऋतू खातीर तांची वाड जावपाक खंड पडना वा आडखळ येना.
झाडां ही ल्हान भुरग्यां वरींच. ल्हान आसतना जर तांची शारिरीक आनी मानसीक उदरगत सारकी जायना जाल्यार तीं दुबळीं आनी अशक्त जातात आनी साबार रोगांक बळी पडटात. जाय तितलें उदक, पोशण, मातये बरोबरच झाडां कडेन उलोवप तांकां पोशेवप तितलेंच म्हत्वाचें. अशें केल्ल्यान ती अदीक फळादीक, टवटवीत आनी ल्हायव्हली जातात.
म्हजो बापूय सदांच सांगता एकाद्रें बीं रुजयतकूच वा रोंप लायतकूच ताका शास्त्र म्हणून थोडें उदक घालप आनी सांगप, ‘हांव तुजी मना पासून काळजी घेतलों/घेतलें’ हाचें वरवीं त्या रोंप्या कडेन नकळटां एक आपुलकेचें नातें तयार जाता. इश्टागती सारकें दुसरें निर्मळ आनी निसुवार्थी नातें ना. झाडांक इश्ट समजून तांची जर काळजी घेतली जाल्यार तांच्या रुपान खरे इश्ट मेळटले हें नक्की.
साईशा शेट शिरोडकार
9307250175
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
