भांगरभूंय | प्रतिनिधी
गोंयाक भेडसावपी चिरंतन प्रस्न जायते. तातूंतलो म्हत्वाचो गुन्यांवकारी म ळा वयलो. घुंवळे वखदांचो (ड्रग्साचो). फाटलीं 40 वर्सां गोंयचे पुलीस ताचेर नियंत्रण हाडपाचो यत्न करतात, पूण तो आटापा येना. ड्रग्साच्या जिवाचेर कांय लोक करोडपती जाले. पूण दुसरे कडेन शेंकड्यांनी संवसार मातयेंत भरसले. जे ड्रग्सांचे भकीक पडले, ते तर सासणाचे सोंपले. हे जिवघेणे नशेंतल्यान सांवरून बऱ्या मार्गाक लागिल्ले तरणाटे आसात, ते सांगतले ड्रग्स म्हणल्यार कितें तें! 30- 35 वर्सां पयलीं ड्रग्स सांपडल्यार 10 वर्सां बंदखणींत बसचें पडटा, अशी भिरांत सगल्यांक दिसताली. मात, अजून खरेंच तशी कोणाक बंदखण जाता काय हो संशोधनाचो विशय. धरिल्लें ड्रग्स नश्ट करतात अशें म्हणटात. पूण, ही कार्यावळ जाहीरपणान जावंक जाय. हो राकेस काबार करपाक पुलिसांनी, गृह, पर्यटन खात्यान पेंगट बांदून वावराक लागपाक जाय. कारण गोंय हें ड्रग डेस्टिनेशन जावपाच्या मार्गार आसा. अक्षरशा दरदिसा कोण ना कोण ड्रग्सा सयत सांपडटात.
गोंयांत ड्रग्स खंयच्यान येतात, ताची पुलिसांक मात पसून खबर ना. देखून बाबड्यांक मुळा सावन कारवाय करपाक मेळना, अशें जायत्या गोंयकारांक दिसतालें. मात आतां खुद्द गोंय पुलिसांनीच एके बसकेंत गोंयांत ड्रग्स खंयच्यान येतात, हाचें सोबीत सादरीकरण केलें. एसएसडी पेपर हे पुस्तकांतल्यान लिपोवन विमानांतल्यान हाडटात, कोकेन बोटींतल्यान. बद्द द. अमेरिकेंतल्यान एलएसडी क्रिस्टलूय विमानांतल्यानूच येता. उपरांत ताचेर प्रक्रिया जाता. चरस नेपाळ, हिमाचल प्रदेशांतल्यान येता. उत्तर भारतांतल्या हेर राज्यांनीय तें मेळटा. गांजो झारखंड, ओडिशांतल्यान. आतां तर ताची गुपीत लागवड गोंयांत पसून जाता. हेर पिकां मदीं लिपोवन वा वाझांनी. फाटीं पुलिसांनीच कांय गांजो धरिल्लो. 20- 25 वर्सां पयलीं उत्तर भारतांतल्या कांय राज्यांनी गांज्याचीं पानां सहज मेळटालीं खंय. कायद्यान तो बेकायदेशीर जालो आनी मागीर ताचेर बंदी आयली. अफगाणिस्ताना सारक्या कांय देशांनी गांजो आनी हेर नशा हाडपी पिकांची उक्तेपणी शेती करतात. गोंयांत येतात ते चडशे ड्रग्स मुंबय, बंगळुरू, भुवनेश्वर, मनाली ह्या वाठारांतल्यान येतात, अशें पुलिसांचें म्हणणें. विशेश म्हणल्यार कांय पर्यटक गोंयांत येतना ड्रग्स वांगडा हाडटात. वतना सोऱ्याची बाटली व्हरतात. कांय जाण तर खास तें विकपाकूच गोंयांत येतात आसतले. आंतरराष्ट्रीय ड्रग्स वेव्हारूय जाता. खास करून इस्रायल, नायजेरिया, रशियेंतल्यान. तांचें ड्रग्स म्हारगें. पुलिसांनी ह्या सादरीकरणांत व्हडलो दावो केला. तो म्हणल्यार शेजराच्या सिंधुदुर्गांत ड्रग्स तस्करांचो अड्डो आसा खंय. सासोली गांवांत. गोंयांत येवपी ड्रग्स पयलीं सासोली देंवयतात. मागीर रस्तो मार्गान तें गोंयांत धाडटात.
पुलिसांक हें जर खबर आसा, जाल्यार ते खर कारवाय कित्याक करिनात? सासोली चड पयस ना. थंय धाडी घालून तें ड्रग्स जप्त करूं येता. तें हाडप्यांक, दवरून घेवप्यांक सहज धरूं येतात. पोरूं नोव्हेंबरांत हणजूण्यां एका शॅक्स धनयाक हैदराबाद पुलिसांनी धरिल्लो. ताचेर ड्रग्सांची पुरवण करपाचो आरोप जाल्लो. मजा म्हणल्यार, तो मेरेन तो अशें करता, तें केन्नाच उक्ताडार येवंक नाशिल्लें. गोंयच्या पुलिसांकूय ताचे विशीं खबर नाशिल्ली. कांय फुडाऱ्याच्या लागींच्या मनशांचेर आरोप जाल्ले. मात उपरांत तो कोण तरी भलतोच अशें एका राजकी पक्षान जाहीर केलें आनी हें प्रकरण मिटलें. पुलिसांनी बसकेंत सादरीकरण केलां, तातूंतल्या गुन्यांवांचेर नियंत्रण हाडपाचे उपाय तांकां खबर आसतलेच. ते तांणी बेगीन चालीक लावंक फावो. कारण ड्रग्स ही समाजाक लागिल्ली कीड. आतां तें पुराय राज्यांत मेळटा, म्हणटकूच कोणाकूय ताचें वेसन लागूं येता. तें घेवपाचें वा तें विकून जोडपाचें. गोंयांत 2021 त ड्रग्स गुन्यांवां खाला 134 जाणांक अटक जाल्या. तातूंत 24 गोंयकार आसात. 2022 त 184 मदले 54 गोंयकार आनी 2023 त आतां मेरेन 89. तातूंत 25 गोंयकार. हांगा विदेशी नागरिकूय रावतात. तांचेर नदर दवरपाक जाय. कोणाचो तरी आशिर्वाद आसले बगर ते ड्रग्स विकपाचें धाडस करचे नात. ड्रग्स खंयच्यान येता तें पुलिसांक खबर आसा. आतां तांणी चड सादूर रावन कारवाय करची.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
