भांगरभूंय | प्रतिनिधी
पुलिसांनी अजून गुन्यांव नोंद करूंक ना
म्हापशें, प्रतिनिधी : म्हापशें राजवाडो हांगाचे गाडे, दुकानां मोडून उडोवपाच्या वेळार दंडाधिकार्यांक आनी नगरपालिका अधिकार्यांक अधिकृत कामां करपाक आडमेळीं हाडिल्ले खातीर दुकानदार आनी हेरां आड केस नोंद करची, अशी लेखी कागाळ म्हापशेंचे मुखेल चंद्रकांत शेटकार हांणी पुलिशेंत केल्या.
उत्तर गोंय उच्च न्यायालयान पोरण्या आझिलो हॉस्पिटलाच्या मुखार आशिल्लें जिवन मयेकाराचें जिवन कोल्ड ड्रिंक हें दुकान काडून उडोवपाचो आदेश दिल्लो. सोमारा २८ ऑगस्टाक अतिक्रमण कारपाचो पंगड आनी दंडाधिकार्याच्या हाजिरेंत पालिकेन ह्या आदेशाची कारवाय केली. उपरांत संबंधीतांचे याचिके प्रमाण उच्च न्यायालयान स्थगिती दिल्ल्यान ही कारवाय थारायली.
हे विशीं मुख्याधिकारी चंद्रकांत शेटकार हांणी म्हापशें पोलिशेंत कागाळ दाखल केल्या. २८ ऑगस्टाक प्रभू चेंबर्स इमारती फुडल्यान जिवन उर्फ साबाजी मयेंकार हांणी केल्लें दुकानाचें बेकायदेशीर बांदकाम उडोवपाची प्रक्रिया नियोजीत केल्ली.
हें दुकान मोडपाचें काम अतिक्रमण हटाव पंगडा वांगडा मामलेदार साईश नायक, कनिश्ठ वीज अभियंते गौरेश गांवकार, बांदकाम पर्यवेक्षक प्रदीप कांदोळकार, पुलीस अधिकारी, पालिका कनिश्ठ अभियंता संगीता सातार्डेंकार, निरीक्षक शेखर गांवस, पर्यवेक्षक सुनील नायक आनी हेर अधिकार्यांचे हाजेरींत सुरू केलें. पूण सिध्दार्थ मयेंकार, धुरी आनी विरेंद्र मयेंकार (शेटयेवाडो, म्हापशें) हांणी कारवायेंत आडखळ हाडली. तशेंच विरेंद्र मयेंकार हाणें आपली महिंद्रा बोलेरो गाडी मुद्दाम दुकाना मुखार उबी केली आनी अतिक्रमण हटाव पंगडाच्या कामांत आडखळी निर्माण केल्यो.
अतिक्रमण हटाव पंगडाक, अधिकार्यांक दुबावितांनी तांचें कर्तव्य करपाक दिवंक ना. देखून दुबावीतांचेर योग्य कायद्या खाला गुन्यांव नोंद करचो, अशी मागणी मंगळारा २९ ऑगस्टाक धाडिल्ल्या ह्या कागाळ पत्रा वरवीं मुख्याधिकारी शेटकार हांणी पुलिसांक केली. पूण पुलिसांनी हे कागाळी प्रमाण गुन्यांव नोंद करूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
