वाग वाठार हो रामबाण उपाय

भांगरभूंय | प्रतिनिधी

म्हादयमायंक वाटावपाक वाग वाठार हो बरो ‘राम’बाण म्हणटात तसलो उपाय. वाग वाठार बेगीन अधिसुचीत करचो.

जुलयांत भरपूर पावस पडलो. सरासरी परस चड. मात, फाटली पंद्रसभर पावसान तशी दांडीच मारल्या. फक्त गोंयांत न्हय, तर कर्नाटकांतूय! ताका लागून कर्नाटक उचांबळ जालां. तांणी उदकाचो प्रस्न खूबच गंभीरतायेन घेतलासो दिसता. रोखडेंच कर्नाटकांतल्या सगल्या पक्षांचें शिश्टमंडळ दिल्ली वतलें. ह्या प्रस्नाची म्हायती प्रधानमंत्री, रानां मंत्री, उदका स्रोत मंत्र्यांक दितलें. तसो निर्णय जाला. हातूंत कावेरी, कृष्णा न्हंयांच्या उदका वांटपाच्या वादाचो आस्पाव आसा. पूण आमचे खातीर म्हादय उदका वाद म्हत्वाचो. कर्नाटकांतल्या भाजपा, काँग्रेस, जनता दल…. सगल्याच पक्षांचो म्हादयचें उदक वळोवपाक तेंको आसा. उत्तर कर्नाटकांतल्या लोकांक पिवपाक उदक ना, अशें तांच्या सरकारान जाहीर केलां. आदल्या भाजपा सरकारानूय हेंच जाहीर केल्लें. त्या वेळार काँग्रेसीन म्हादय प्रकल्प भाजपा परस बेगीन, चड नेटान चालीक लावपाचें आस्वासन दिल्लें. आतां ते सत्तेर आसात. थंयचे शेतकार ऊसाचें उत्पादन घेतात. ऊसाक हेर पिकां परस चड उदक लागता. उदकाचो उणाव आसतना तांणी हें धाडस केलां आनी आतां ‘उदक ना, उदक ना’ म्हूण आरड मारतात. उत्तर कर्नाटकांत हरशीं न्हंयो आसात. मात, तातूंतल्यो मुखेल न्हंयो दुशीत जाल्यात. देखून ताचें उदक वापरूंक मेळना. त्यो नितळ केल्यार कर्नाटकाक म्हादयची मात्त पसून गरज ना. तरीय ते म्हादयचो प्रवाह वळोवपाक सोदतात, हाचे फाटलें कारण कळना. ‘म्हजें तें म्हजें, तुजें तेंवूय म्हजेंच’ ही वृत्ती गोंय आनी तामिळनाडूंतल्या असंतोशाक जापसालदार थारल्या.
म्हादय येवजणेचेर सर्वोच्च न्यायालय, म्हादय वाद लवादान काम बंद दवरपाचो आदेश दिवन पसून कर्नाटकान लिपचोरयां कळसा- भांडुरा बांधाचें काम चालूच दवरिल्लें. अचकीत आमचे पर्यावरणमोगी थंय गेले तेन्ना तें उक्ताडार आयिल्लें. खरें म्हणल्यार सरकारी यंत्रणेन थंय 24 वरां लक्ष दवरूंक जाय आसलें. पूण, ह्या प्रकरणा कडेन सुरवाती पसून आमची आडनदर जायत गेल्या, हें मान्य करचेंच पडटलें. अजून पर्यावरण मंजुरी मेळूंक नाशिल्ल्यान कर्नाटक आतां थेट प्रधानमंत्री मोदी हांकां मेळपाचें आसात. त्या शिश्टमंडळांत भाजपाचेय प्रतिनिधी आसतले. राजकी, अर्थीक नदरेन पेजाद आशिल्लीं राज्यां पयलीं सावन ‘दिल्लीश्वरां’चे मर्जेंतलीं. म्हणटकूच कर्नाटकाक झुकतें माप मेळूं येता. पूण गोंय ल्हान आसलें तरी आपली शक्त दाखोवंक शकता. म्हादय अभयारण्य, तातूंतलो वाग वाठार अधिसुचीत करीत जाल्यार म्हादयक कोण हात लावंक शकचो ना. उच्च न्यायालयान ‘वाग वाठार’ जाहीर करपाक सांगलां. पूण सरकारांतल्या कांय प्रतिनिधींक तो जाल्लो नाका. देशी, विदेशी वाग, जनावरांचेर खूब खूब मोग आसा, अशें दाखयतना ते अशे कित्याक वागतात काय? केंद्रीय मंत्री प्रल्हाद जोशी हांणी तर पयर हुब्बाळींत शेतकारांक स्पश्टूच सांगलां, वाग वाठार ही एकूच अडचण आसा. ती पयस जाली जाल्यार ‘म्हादय तुमच्या दारांत’.
म्हादयचेर कर्नाटक बसकांचेर बसका घेता. मात आमचे सभाघर समितीची (तातूंत सगल्या पक्षांचे आमदार आसात.) बसका फाटल्या सात म्हयन्यांत जावंक ना. उदक व्हेलेंच जाल्यार कर्नाटक तें कितलें व्हरता ताचेर नदर दवरपाक प्रवाह प्राधिकरणाची स्थापना जाल्या. तें गोंयांत आसतलें. ताचे कचेरेचो जागो अजून थारूंक ना. म्हादयची विज्ञानीक आनी कायद्याची बाजू अभ्यासपी समितीन अजून अहवाल सादर करूंक ना. ते वटेन तामिळनाडू आनी कर्नाटकाचें पेटपाचें आसा. कावेरी देखरेख प्राधिकरणान दरदिसा 15 हजार क्युसेक उदक सेगीत 10 दीस सोडपाक सांगिल्लें. आतां कर्नाटकान उदक ना अशें सांगून फक्त 10 हजार क्युसेक उदक दर दिसा सोडटा, पूण ताचीय खात्री ना, अशें स्पश्ट केलां. ताचेर तामिळनाडून, खास करून थंयच्या भाजपान तिडक उक्तायल्या. कर्नाटकांत काँग्रेस सत्तेर आयली तेन्ना सावन हें जाता, अशें तामिळनाडू भाजपाचें म्हणणें. लोकप्रतिनिधी झगडले तरी भितरल्यान एक आसतात, हें सांगपाक जाणकार नाकात. पूण हाचो मार सामान्य नागरिकांक बसता. म्हादयचे बाबतींत तशें जावचें न्हय.
म्हादय प्रकरणांत उदका स्रोत खात्याचेर व्हडली जापसालदारकी आसा. तांणी गोंयांतले सगले सैमीक स्रोत परतून जिवे करपाक जाय. खंयच्याच व्हाळाचें, न्हंयेचें उदक दुशीत जावपाक दिवंक फावना. सगल्यो न्हंयो खोलावंक जाय. दोंगरांनी उदक जिरोवंक जाय. झाडां तिगतलीं, वाडटलीं हाची जतनाय घेवंक जाय. तरूच उदक आटचें ना. म्हादयमायंक वाटावपाक वाग वाठार हो बरो ‘राम’बाण म्हणटात तसलो उपाय. वाग वाठार बेगीन अधिसुचीत करचो.