भांगरभूंय | प्रतिनिधी
मनशाचो सगल्यांत लागींचो आनी इमानदार इश्ट कोण अशें विचारल्यार जाप येतली- सुणो. दत्तात्रेयांच्या गुरुं मदीं पसून सुण्याचो आस्पाव आसा. सुण्यांच्या खाशेलेपणांक लागून तांकां लश्कर, पुलिशेंत आस्पावन घेतल्यात आनी तांणी मनशांक शक्य ना, अशें योगदान दिलां. खून, चोरयांचो तपास, बाॅम्ब सोदप, भुंयकांपा वेळार फांतरा- मातयेचे राशीं पोंदां आडकल्ल्या मनशांक सोदप, घुंवळे वखदां सोदप…. बरींच कामां हे श्वान करतात. जिवाक जीव दिवपी हो प्राणी. मात, कांय वेळार हींच सुणीं मनीसजातीक घातक थारतात. तिच्या जिवार उठ्ठात. आदल्या तेंपार रस्ताद सुण्यांक पंचायती जिवेशीं मारताल्यो. अर्थांत ती चुकीची, अमानवी म्हणटात तसली गजाल आशिल्ली. उपरांत प्राणीमोगी मेनका गांधी हांणी न्यायालयांत वचून हाचेर बंदी हाडली. आतां सुण्यांक पंचायत, पालिका वा समाजसेवी एनजीओ आसरो दितात. नसबंदीय करतात. तांकां पोटाक घालतात. पूण कितेंय आसलें तरी रस्ताद सुण्यांचो आंकडो वाडतूच आसा. आतां तर घरगुती सुण्यांचोय उपद्रव लोकांक जावपाक लागला. हालींच ताळगांवां दोन सान भुरग्यांचेर हल्लो जावपाचो प्रकार घडलो. काल सुण्याच्या धनयाक पुलिसांनी अटक केली. दोनूय भुरग्यांची भलायकी सुदारता. हो रोटवेलर जातीचो सुणो पयलीं सावन आक्रमक आसा, अशें थळाव्यांचें मत.
सुणीं आक्रमक जावपा फाटल्यान जायतीं कारणां आसात. सुणो पोसलो म्हूण जायना, ताका वेळार खावपाक दिवंक जाय, ताची कुयदाद घेवंक जाय, ताका भोंवडावन हाडपाक जाय. ताका घरांतलो वांगडी मानून कसलोच त्रास जावचो ना, हाची जतनाय घेवंक जाय. सुणो ही जापसालदारकी. ती फॅशन, स्टेटसाची कुरू न्हय! ताका घरांत बंद करून आपूण फिरपाक, पार्ट्यांक वचप चुकीचें. तांकां बुद्द, भावना आसतात, हें आमी विसरतात आनी मागीर सोंसू नजं जालें काय तें सुणें आक्रमक जातात. दिल्लींत पोशिल्ल्या पीटबुलान घरांतले जाण्टे बायलेक जिवेशी मारिल्ली. पीटबुला परस हो रोटवेलर आक्रमक. आमच्या भारतांत तशे रस्ताद सुणें पसून भिरांकूळ आसतात.
संवसारांत भटक्या सुण्यांचे सगल्यांत चड हल्ले आमच्या देशांत जातात. खास करून भुरग्यांचेर. सुमार 50 टक्के. चडशीं भुरगीं 15 वर्सां पिराये सकयलीं. रेबिजाचीं 36 टक्के मरणां भारतांतलीं. वर्साक सादारण 18 हजार. सगल्यांत चड रस्ताद सुणेंय भारतांतूच आसात. अमेरिके सयत सगल्याच देशांनी सुण्याची समस्या आसा. पूण, थंय चडशीं घरगुती सुण्यांचीं.
ताळगांवची घडणूक आयतारा आल्त ओयंतियांतले एके काॅलनींतली. सांजेच्या 7 वरांचेर हीं दोन भुरगीं आवय वांगडा भोंवपाक गेल्लीं, तेन्ना हो सुणो बंगल्याच्या दुरगांतल्या अचकीत भायर आयलो आनी ताणें भुरग्यांचेर हल्लो केलो. आवयन भुरग्यांक वाटावपाचो यत्न केलो. त्या घरांतल्यान दोन बायलो आयल्यो. पूण सुण्याक शांत करप तांकां जमलेंना. लोकूय धांवून आयले. एका वरा उपरांत भुरग्यांक हाॅस्पिटलांत व्हेलीं. (इतलो वेळ कित्याक लागलो काय?) पुलिसूय थंय पावले. थंय जें कितें घडलें तें भयानक आशिल्लें. आक्रमक सुण्याक भोंवडावपाचें काम तांचो धनी वा घरांतलीं मनशांच करतात. हें सुणें सहसा रस्त्यार येना. पूण, ताळगांवां घडलें तें विपरीत आसलें. सगल्यांचींच आक्रमक सुणीं अशीं रस्त्यार येवपाक लागलीं, जाल्यार लोकांचें भायर भोंवप बंद जातलें. हाचेर कितें तरी उपाय करपाक जाय. ताळगांवच्या सरपंचान अश्यो घडणुको परतून जावच्यो नात, हाची खबरदारी घेतलों अशें म्हणलां. तांणीच न्हय, तर सगल्यांनीच ते नदरेन पावलां उखलपाक जाय. आक्रमक सुणीं पोसप्यांनी तर चड जतनाय घेवंक फावो.
रस्ताद सुणींय कांय वेळार आक्रमक जातात. दुचाकीं, मोटारीं फाटल्यान धांवतात. अपघात जावं येतात. रातच्या वेळार एका सुरांत भोंकिल्ल्यान लोकांची न्हीद खळटा. ताचो भलायकेचेर वायट परिणाम जाता. ह्या सुण्यांचो बंदोबस्त जावचो. पालिका, पंचायतींनी तांचे खातीर आनीक खासा जागे उबारचे. एनजीओंची तांकां पूर्ण मजत मेळटली, हातूंत मात्तूय दुबाव ना. एकाच जाग्यार सगलीं सुणीं आसल्यार तांची देखभाल बरे तरेन जातली. लोकांकूय त्रास जावचो ना. सुणें ही मोनजात. तिका योग्य पद्दतीन सांबाळपाक जाय. सुणेंमोगी हें मतींत घेतले अशी आस्त.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
