भांगरभूंय | प्रतिनिधी
हालींच कृष्णदास श्यामा म्हळ्यार सेंट्रल लायब्ररीन दर वर्सा प्रमाण अंदूंय राष्ट्रीय ग्रंथपाल दीस व्हड उमेदीन मनयलो. ह्या वेळार तांणी कला, संस्कृती मंत्री गोविंद गावडे हांचे उपस्थितींत कार्यावळ केली. सेंट्रल लायब्ररीन एक खाशेलें पुस्तक प्रकाशित केलां. फुडें जावपाचे बदल लक्षांत घेवन ‘डिजिटल’ ह्या विशयाचेर तांणी सोद निबंध मागयल्ले, तातूंतले कांय वेंचिक सोद निबंध चार वांगड्यांचे समितीन वेंचिल्ले. ही संपादकी समिती म्हळ्यार आताचे क्युरेटर डॉ सुशांत तांडेल, आदले क्युरेटर डॉ. कार्लोस फेर्नांडीस, ज्येष्ठ ग्रंथपाल सौ. सुलक्षा कोळमुळे आनी प्रशांत फडते. हें पुस्तक डिजिटल आनी व्हर्च्युअल लायब्ररीज अभ्यासकांक उपकारक पडटलें हातून दुबावूच ना. ह्या निमतान ग्रंथपाल फांट्या विशीं जाणून घेवचें म्हूण आयचो लेख. जशीं कांय शाळांनी भुरगीं उणी ही समस्या उबी रावल्या, तशी वाचक उणे- उणे जायत आसात, अशी कागाळूय संवसारभर आयकूंक येता.
ह्या फाट्यांत येवपी उमेदवारांनी फक्त नोकरी मेळपाक जाय म्हूण हे सेवे कडेन पळोवचें न्हय, तर आपुण वाचक वाडयतलो अशें मनान घेवन काम करचें. वाचक म्हळ्यार वाचनाची संवय ही तशी वाडचीना. ते खातीर विंगड- विंगड कार्यावळी दवरच्यो पडटल्यो. नेमांत आसचे नात अशे निर्णय तुमकां वाचक वाडोवपाक घेवचे पडटले. डॉ. रंगनाथन वाडदिसा आमी राष्ट्रीय ग्रंथपाल दीस मनयतात. तो कितलींशींच वरां काम करतालो. खरेंतर आताच्या संगणक युगांत तुमी बसुनूच वावर करू शकतात. जायत्या अॅपांची मजत हाचे खातीर घेवं शकतात. इल्लो तरी त्रास तुमी घेवचोच पडटल्लो.
ह्या फाट्याचें शिक्षण घेवन तुमी वाचनालयांत ग्रंथपाल म्हूण नोकरी करूं शकतात, पूण ह्या निर्णया पयलीं तुमी ह्या फाट्याचो अभ्यास करूं शकतात. देखीक डॉ. रंगनाथन हांच्या वाडदिसा आमी राष्ट्रीय मळाचेर ग्रंथपाल दीस मनयतात. ह्या पदमश्री विजेत्या डॉक्टरा विशीं जायती म्हायती आसा. तो भरपूर काम करतालो. गोंयांतल्या वाचनालयांची म्हायती आसूंक जाय. कित्याक तर, गोंयचेच न्हय तर अख्ख्या आशिया खंडांतले पयले वाचनालय गोंयांत सुरु जालें. ही म्हायती, ते खेरीज गोंय मुक्त जाले उपरांत वाचनालयाची चळवळ कशी उबी रावली, खाजगी वाचनालयां सुरु कशीं जालीं? हो इतिहास तुमी लक्षांत घेवपाक जाय. तुमी फुडें जेन्ना हो अभ्यासक्रम शिकतले तेन्ना पुस्तकांचें वर्गीकरण कशें करप, हांचें प्रशिक्षण तुमकां व्हड वाचनालयान मेळटलेंच, पूण आदीं सावन जर तुमी हें बारीकसाणेन पळयशात तर शिकप चड सोंपें जावं शकता. गोंय विद्यापीठान पदवी शिक्षण मेळपाची सोय आसा आनी जर तुमी खोलायेन अभ्यास करपाक सोदतात जाल्यार डिप्लोमा सर्टिफिकेट कोर्स करी नासतना तुमी पदवीचे शिक्षण जरूर घेयात . लागींच्या महाराष्ट्रांत पुण्यां, मुंबय, परभणी, चंद्रपूर सारक्या सुवातींनी तुमकां शिकपाक मेळटा. थंय हो अभ्यासक्रम शिकयतात. हांचो प्रवेश मागीर सुरु जातलो, तरीय तुमी आतां सावनूच ह्या अभ्यासक्रमांतल्या विशयांचेर अभ्यास करपाक लागात. हातूंत तुमकां वाचनालयाचो इतिहास, वर्गीकरण ह्यो गजाली शिकच्योच पडटल्यो. तो वावर आदी पसुनच करशात तर ताचो लाव तुमकां चड जातलो.
गोंया भितर विंगड विंगड कॉलेजींनी तशेंच भौशीक खाजगी वाचनालयांनी पात्र ग्रंथपाल जाय पडटात. कॉलेजी खातीर तुमकां नेट सारकी परिक्षा दिवची पडटा. ह्या फाट्यांत येवपी उमेदवारांक वाचपाची आवड तर आसपाकूच जाय, खेरीज आवड आसूं वा नासूं तुमचें वाचन चौफेर आसपाकूच जाय. संगणकाचो कोर्स तुमचे कडेन आसपाकूच जाय. कित्याक तर हाचे फुडें वाचनालयाचो सगळो वावर संगणकाचेरूच जातलो. ग्रंथपालाक करपा सारकीं खूब कामां आसात. तो आपल्या वाचनालयान पुस्तकांचेर चर्चा दवरुं शकता. एखाद्या साहित्यिकांक आपोवन ताचें मनोगत जाणून घेवं शकता. नव्या पुस्तकांचें प्रदर्शन करूं शकता. गोंयच्या लेखकांची म्हायती प्रदर्शनांतल्यान दिवं शकतात. ‘आवट ऑफ बॉक्स’ विचार करून ह्या कार्यावळींनी तो भर घालूं शकता. पूण ह्या फाट्यान येवपी उमेदवाराक वाचनाची भरपूर आवड मात जायच.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
