भांगरभूंय | प्रतिनिधी
पराग म्हजो इश्ट. जेश्ठ कवी, सुटकेझुजारी आनी शिक्षक सर्गेस्त गजानन रायकार हांचो तो पूत. गजाननबाब गोंयच्या पयल्या
विधानसभेचे सदस्य आशिल्ले. संघर्शांतल्यान तांणी समाजीक, शिक्षणीक आनी साहित्यीक मळार आपली वळख घडयली ताचो आयज लेगीत आदरान साबार जाण उल्लेख करतात. परगा मदीं आपल्या बापायचे साबार गूण साहजीकपणान आयल्यात. ताकाय समाजीक, शिक्षणीक, राजकी मळार वावुरपाक आवडटा.
परागान हालींच एक देखदिणी कृती केली जी आयच्या तरणाट्यांक खात्रेन प्रेरीत करतली. सुटकेझुजाऱ्यां खातीर आशिल्ल्या राखिवतेंतल्यान परागाक गोंय शासनान नोकरेचें नियुक्ती पत्र दिलें. आयज सरकारी नोकरी मेळप म्हणल्यार व्हड दिव्य अशें मानतात. ते खातीर आमदार- मंत्र्यांच्या दारांत फावटी मारपाक, पयशे खावोवपाक लेगीत तरणाटे तयार आसतात. अश्या काळांत परागान आपल्याक मेळिल्लें नियुक्ती पत्र शासनाक परतें दिलें आनी कोणाय गरजेवंताक ती नोकरी दिवची म्हूण कळयलें.
पदवीचें शिक्षण मेळयले उपरांत परागान आपलो छापणावळीचो वेवसाय सुरू केलो. कांय वर्सां ताणें तो बरे तरेन चलयलो. स्वता राजकारणांत सक्रीय आसून, तशेंच बापूय आदलो आमदार आसून लेगीत ताणे केन्ना सरकारी नोकरे खातीर यत्न केल्ल्याचें हांवें तरी आयकूंक ना. छापणावळीचो वेवसाय चालू दवरतनाच ताणें विंगड विंगड कंपनींचो घाऊक विक्रेतो म्हूण आपल्या धंद्याक आरंभ केलो आनी ताचो विस्तार करीत रावलो. आयज ताच्या आस्थापनांत विंगड विंगड पदांचेर पन्नाशेक तरणाटे काम करतात.
पराग आपल्याक नोकरी सोदीत रावलो ना. ताणे नोकऱ्यांची निर्मिती केली. आपणे नोकरी करचे सुवातेर हेरांक नोकरी दिली. नोकरे खातीर रीण काडून लेगीत पयशे दिवपी साबार तरणाटे आमकां मेळटले. पूण त्याच पयशांनी एखादो धंदो सुरवात करून तो तरातराक व्हरपाची वान्सा आनी तयारी गोंयचे तरणाटे दाखयनात.
नोकरी केले उपरांत जो पगार मेळटा ताची वाड एका थारावीक गतीन जाता. सरकारी नोकरेंत प्रामाणीकपणान काम करतल्याक आनी कामाक दांडी मारतल्याक समान संधी आनी पगारवाड. पूण धंद्यांत वा वेवसायांत जितलें चड प्रामाणीकपण, नाविन्य, धडपड, वेळेचो वापर, वैयक्तीक लक्ष तितलो चड परतावो. धंद्यांत तूं राजा जाल्यार नोकरेंत गुलाम. पूण तरणाट्यांक ताचें कांयच पडून गेल्लें नासता. धंदो वा वेवसाय करून तातूंत जोखीम स्विकारपाची तांची तयारी नासता.
गोंयच्या तरणाट्यांच्या रगतांत उद्देजिकतायेचो उणाव आसा. तांकां अभ्यासक्रमांतल्यानय जाय त्या प्रमाणांत मार्गदर्शन वा उमेद मेळना आनी देखून तांचे मदीं ती वृत्ती तयार जायना.
आयज सरकारच्या विंगड विंगड खात्यांचे वतीन उद्देजीक कुशळटायेचीं प्रशिक्षण शिबिरां गांवां-गांवांनी घडून येतात. तरणाट्यांक स्टार्ट अप्स वा परंपरीक धंदे-वेवसायां खातीर अर्थीक आदार दिवपी साबार येवजण्यो चालीक लायल्यात. तरणाट्यांनी तांचो फायदो घेवपाक जाय.
केंद्र शासन आसत वा गोंय शासन, तरणाट्यां मदीं उद्देजीगता तयार करपाच्या वावराक लागल्यांत. ताचीं फळांय दिसतात. गोंयकार तरणाटे तंत्रज्ञान, पर्यटन सारख्या मळांचेर अर्थीक गुंतवणूक करपाक लागल्यात. पूण तरणाट्यांची ही संख्या भोव उणी आसा. ती वाडपाक जाय. सरकाराची अर्थीक आदाराची, आस्थापनांच्या नोंदणेची प्रक्रिया सुसुटीत जावपाक जाय. गांवां-गांवांनी तरणाट्यां मदीं जागृताय जावंक जाय. रस्त्याचे कुशीक जायरात फलकांचेर येवजण्यांची वळख घडोवन तरणाटे उद्देजिकताये कडेन आकर्शीत जातलेच अशें ना. वैयक्तीक नदरेन तांचे मेरेन ह्यो येवजण्यो शासनाक पावोवच्यो पडटल्यो.
आधुनीक काळांत धंदे वेवसायाचीं साबार दालनां तरणाट्यांक उक्तीं जाल्यांत. परंपरीक आनी काळा भायऱ्या धंद्यांक वेंगावचे परस नवीन मळां तरणाट्यांनी सोदून काडपाक जाय. ‘शार्क टॅंक इंडिया’ नांवाची एक कार्यावळ सोनी चॅनलाचेर वितरीत जाताली. ह्या कार्यावळींत इत्सूक तरणाटे आपल्या धंद्या- वेवसाया संबंदीच्यो नाविन्यपूर्ण कल्पना निधी निवेश करपाक तयार आशिल्ल्या धनिकांच्या सामकार दवरतात. यु-ट्युबाचेर ह्या कार्यावळींचें कांय भाग पळोवंक मेळटात. तरणाट्यांनी आनी तांच्या पालक- शिक्षकांनी ते मुजरत पळोवचे. एका परस एक भन्नाट संकल्पना ह्या कार्यावळींत तरणाट्यांनी मांडल्यात आनी त्यो येसस्वी करून जाल्ल्याच्यो देखी आसात.
तंत्रज्ञानाच्या ह्या युगांत पाचेर आदारीत साबार धंदे-वेवसायांची निर्मिती करप शक्य आसा. परंपरीक विचार साच्यांतल्यान भायर वचपाची वृत्ती तयार करपाक जाय. पर्यटनाच्या मळार तंत्रज्ञानाच्या वापरान आपलो रोजगार आपूण स्वता तयार करून हेरांक नोकरी दिवपाक व्हड वाव आसा.
गोंयांत विंगड विंगड वाठारांनी आनी शारांतल्या म्हत्वाच्या सुवातींनी आमकां खाणांचे गाडे दिसून येतले. कांय आडवाद सोडल्यार हे गाडे जाणटे लोक चलयतना दिश्टी पडटात. सांजवेळां चार- पांच वरां गाडो चलोवन ते हजारांनी रुपया जोडटात. तांच्या हातची रूच पांच नखेत्री हॉटेलांतल्या शॅफांक शक्य जावची ना. आपल्या रांदपाच्या कळाशेचो ते योग्य वापर करतात. दुर्दैवान कांय आडवाद सोडले जाल्यार ज्या गाड्याचे जोडीचेर शिकून व्हड जाले तो गाडो चलोवपाची तरणाट्यांची तयारी नासता. अशे गाडे परप्रांतीय भाड्याक घेवन लाखांनी रुपया म्हयन्याक जोडटात आनी आमी मात तांकां घांटी म्हूण हिणयासत रावतात. तांकां आमचे धंदे वेवसाय गिळून उडयले म्हूण पिडत रावतात.
परागान नोकरेचें मेळिल्लें नियुक्ती पत्र सरकाराक परतें दिवन आनी आपूण आपल्या वेवसायांत रुजलां हें सांगून एक नवी नदर तरणाट्यांक दिल्या. परागा सारखेच साबार तरणाटे आयज मुखार येवन आत्मनिर्भरतेचो तशेंच आत्मसन्मानाचो मंत्र मुखार व्हरतात. पूण ही संख्या वाडपाक जाय. नोकरी सोडून तरणाटे उद्देजिगताये कडेन आकर्शीत जातले तेन्नाच खऱ्या अर्थान आमचो देश अर्थीक सुबत्तेच्या नदरेन सवंसारांतलो पयल्या पांचांतलो अर्थीक महासत्ता जाला म्हणपाचो नैतीक अधिकार आमकां प्राप्त जातलो.
अनंत अग्नी
9422439903
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
