भांगरभूंय | प्रतिनिधी
श्रावणाक हिंदू धर्मांत विशेश म्हत्व आनी पवित्र मानतात. श्रावण हो सणां- परबांचो राजा. सगले सण हातांत
हात घालून येतात, ते श्रावणांतूच. अंदूं श्रावण अधिक म्हयन्या खातीर एक म्हयनो उसरां आयलो. ह्या दिसांनी पावसाकूय आपलीं तरेकवार रुपां दाखोवपाचो मोह जाता. तो विंगड विंगड अवतार घेवन कोसळटा, तर केन्ना शिरशिरता. साबार सणांक लागून ह्या दिसांनी उत्साही वातावरण आसता. तातूंत पावस येवन वचप म्हणल्यार मन सामकें आनंदून वता. श्रावणांत पावसाक लागून न्हंयो, व्हाळ भरून व्हांवतात. झाडां- पेडां- वेली फुलून येतात. सरभोंवतणी पाचवीचार हिरवळ दिश्टी पडटा. जणू पाचवे गालिचेच जमनीचेर घाल्यात. श्रावणांत तरेकवार सुगंधीत फुलांचो परमळ आसमंतांत पातळटा. मन एका वेगळ्याच विश्वांत वता. पारजत आपले धवेफुल्ल पाकळ्यांचे, केशरी देठाचे कळे आंगणभर पातळून दवरता. श्रीकृष्णाक पारजताचें फुल खूबच आवडटा. तांचें दोगांयचें जल्मजल्माचें नातें अशें म्हणटात.
श्रावणात नागपंचम, सुता पुनव, रक्षा बंधन, मंगळागौर, गोकुळाश्टम हे सण येतात. ते हिंदू समाज भक्तीभावान मनयता. प्रत्येक सणाचें खाशेलेंपण वेगळें. नागपंचमींत नागाची पुजा करून ताका दुदा, लाह्यांचो निवेद्य दाखयतात. पातोळ्यो करतात. सुता पुनवेक दर्याक नाल्ल अर्पण करतात. ते दीस बंद आशिल्ली नुस्तेमारी सुरू जाता. गोंयांत सुता पुनवेक जानवें बदलतात आनी नवें घालतात. जल्माश्टमीक श्रीकृष्णाची पूजा करतात. ताका तरातरांच्या फोवांचो निवेद्य दाखयतात. ताका गोंयांत अश्टम म्हणटात. ते दीस नार्व्यां व्हडली जात्रा, फेरी भरता. शेंकड्यांनी लोक थंय वतात. ह्याच दिसांनी धंयहांडी उत्सव जाता. तरणाटे उंचायेर धंय हांडी बांधून तातूंत हजारांनी रुपया दवरतात आनी त्यो हांडयो फोडूंक बालगोपाळ तरणाटे एका वयर एक उबे रावतात. खास करून मुंबय हो खेळ पळोवपाक मेळटा. गोंयांतूय तो जाता. पूण हांगाचे धंय हांडीची उंचाय चड आसना.
श्रावणांत हिंदू बायलो उपास करतात. त्यो एक म्हयनो घरांत शिवराक जेवतात. कांदो, लसूण पसून खायनात. हालींच्या वर्सांनी काॅलेजींनी वचपी कांय तरणाटे पसून शिवराक श्रावण पाळपाक लागल्यात. बायलो शुक्रार पाळटात. आयतारा पत्री, पानां, फुलां, हळद, कुकुम लावन नाल्लाची पुजा करतात. गोडधोड जेवण करतात. हो आयतार सांजवेळा तुळशींत पावयतात. श्रावणांत वाड्या वाड्यार सत्यनारायण महापूजा आसता. नवीं लग्न जाल्लीं जोडपीं पुजा करतात. गुरुचरित्रवाचन, होम हवन करतात. श्रावणांत घराघरांनी भक्तीमय वातावरण आसता. अशें एकूय हिंदू घर मेळचें ना, जंय धर्मीक उत्सव, उपास जायनात. गोडधोड शिजयनात. श्रावण हो हिंदूं खातीर म्हत्वाचो म्हयनो.
श्रावणांत प्रत्येक देवळांत कितें ना कितें कार्यावळ आसताच. शेनाय, चौघुड्याचें वादन जाता. सकाळच्या वेळार ते मंगल सूर कानार पडटात. चिपळ्यो, टाळ, मृदंगाच्या तालार लोक भजनांत तल्लीन जातात. कांय देवळांनी तर सोमार, बुधवार, शुक्रारा सांजवेळा भजन रंगता. थंय जाण्टे, नेण्टे व्हड संख्येन हजर आसतात. सगल्यांचे यादींतलो हो खीण.
चिभेक रुचीक खाणां मेळटात, तीं श्रावणांतूच. देखूनच ल्हान भुरग्यांक तर श्रावण जाय- जाय कसो दिसता. पावसा वांगडा सुटपी वारो, फुलांचो परमळ मनांतलो ताण पयस करता. श्रावणांत हिरवळीचेर चलपाक वेगळीच मजा येता. वातावरण खऱ्या अर्थान निसर्गरम्य आसता, तें श्रावणांतूच. अशा ह्या मनभुलोवण्या श्रावणांचेर मोग करीना असो हिंदू मनीस सहसा मेळचो ना. जांकां गांवच्या वातावरणाची, धर्मीक सणांची आवड आसा, ताका तर श्रावण पिसो करून सोडटा. म्हणून म्हणीन दिसता,
सोंपू नाका रे श्रावणा
भुलयत राव मना….
सिद्धी तिळवे
9158200956
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
