भांगरभूंय | प्रतिनिधी
पयलो इफ्फी जालो, तेन्नाच गोंयांत फिल्म सिटी उबारतले अशें आयकूंक येतालें, एक- दोन घोशणाय जाल्ल्यो. ह्या नोव्हेंबरांत 19 वर्सां जातलीं. आतां मुख्यमंत्री डाॅ. प्रमोद सावंत हांणी ल्हानशी काय जायना पूण रोखडीच फिल्म सिटी उबारपाची प्रक्रिया सुरू करतले, अशी घोशणा सांखळे जाल्ल्या फिल्ममेकिंग कार्यशाळेंत उक्तायल्या. तांणीच फाटपुरवण केली जाल्यार 2024 चे इफ्फी मेरेन फिल्म सिटी सुरु जावं येता. रोजगाराचें हें बेसबरें म्हणटात, तशें साधन. अनिश्चितताय आसली तरी रातयां येशाच्या तेंमकाचेर पावपाचें भाग्य बऱ्याच कलाकारांक मेळ्ळां.
1980 च्या दशका पयलीं भारतीय सिनेमांनी पश्चिमी संगीताचेर आदारीत पदां, नाच दिसतात. तातूंतले वाजोवपी, नाचपी हे चड करून गोंयकार आसताले. संगीत नियोजनूय तेच करताले. भारतांत सिनेमा सुरू जालो, तेन्ना सावन गोंयकार तिका योगदान दित आसात. मूकपटांची पयली अभिनेत्री पसून मूळ गोंयकार- दुर्गाबाय कामत. तिची चली कमलाबाय (उपरांत गोखले) ही पयली बालकलाकार. मूकपट आशिल्लो मोहिनी भस्मासूर (1913). आघाडीच्या संगीतकारां कडेन वाजोवपी चडशे गोंयकार. एन. दत्ता, दत्ताराम, फ्रँक फर्नांद, चिक चाॅकलेट, ख्रिस्त पॅरी, सॅबेस्तियान डिसोझा, अॅन्थनी गोन्साल्वीस (संगीत नियोजक), वर्षा उसगांवकार, सुदेश भोसले, आल्फ्रेड रोझ, रेमो, हेमा सरदेसाय, मिलिंद गुणाजी…कितल्याश्याच गोंयकारांनी सिनेसृश्टींत नांव जोडलां. मूळ गोंयकारुय आसात. मंगेशकार कुटुंबाचें नांव तर संवसारभर गाजता.
गोंयांत फिल्म सिटी उबी जाता आसतनाच सिनेमाक लागता त्या सगल्या मळांचें शिक्षण भुरग्यांक मेळपाक जाय. तेंय उण्या मोलान. कला अकादमीचें कार्यक्षेत्र वाडूंक जाय. भायल्यो कांय संस्था क्रॅश कोर्सा सारकें शिक्षण भरपूर दुडू घेवन दितात. तातूंत शिक्षण मेळटा तें प्रत्यक्षांत उजार करपाक मेळटाच, अशें ना. आमच्या म्हाविद्यालयांनी अभिनय, छायाचित्रण, नेपथ्य, पटकथा, संवाद……. हांचे अभ्यासक्रम सुरू जावंचे. गोंयांत कांय जाणांनी सिनेमा काडल्यात. पूण अर्थीक नदरेन ते तांकां परवडूंक नात. मुळांत सिनेमा काडपाक भरपूर पयसो जाय. मागीर खर्च वसुल करपाक तो चलपाक जाय. गोंयांत तशें मार्केट ना, अशें निर्मात्यांचें मत. मात, गोंयकार कलाकारांक म्हायतीपट काडूं येतात. चित्रपट महोत्सवांनी गोंयकारांच्या कांय म्हायतीपट, ल्हान सिनेमांक नांव मेळ्ळां. प्राणी, गोंयचे जिनस, सैम, दायज थळां अशे विशय घेवन ल्हान म्हायतीपट काडूं येतात. खास करून टिव्ही खातीर.
सध्या टिव्हीचें मळ गाजता. हिंदी, मराठी, इंग्लीश माळांक मागणी आसा. जायरातपटांच्या मळाचेरुय संद आसा. फक्त निर्माते, दिग्दर्शकूच न्हय, तर अभिनय, कॅमेरामन, लेखक, संगीतकार, नेपथ्य… जायत्या मळांचेर यत्न केल्यार गोंयकारांक संद मेळूं येता. डाॅ. मिनाक्षी मार्टीन्स, प्रसाद गुरव, देवानंद मालवणकार, साईंकीत कामत, गिरिजा प्रभू, अशोक फळदेसाय आनी हेर बऱ्याच गोंयकारांनी टीव्ही मळाचेर येश मेळयलां. अर्थांत ते खातीर मुंबय रावचें पडटा. गोंयांत फिल्म सिटी जातकच गोंयांत रावन सिनेमा, टीव्ही माळो करप शक्य जातलें. ते खातीर फिल्म सिटी आनी तिका लागपी बुन्यादी सुविधा (तरातरांचे अभ्यासक्रम, प्रशिक्षण आनी हेर गजाली) गोंयांत जाय.
फिल्म मेकिंग कार्यशाळा राज्यभर आयोजीत करतले, अशें मुख्यमंत्र्यान सांगलां. त्यो जावच्योच, पूण हायस्कूल पांवड्याचेर एक विशय म्हूण सिनेमा विशींचें शिक्षण सुरू जावचें. ह्या मळाची फक्त तोंडवळख पसून जाल्यार फुडाराक ताचो फायदो जावं येता. पयलीं सिनेमा आनी दूरदर्शन अशीं दोनूच मळां आशिल्लीं. मात, आतां मनोरंजन मळा वयले टिव्हींचे 50 वयर चॅनल आसात, जंय गोंयकारांक सहज काम मेळूं शकता. ताचे भायर ओटीटी, युट्यूब आसाच. आतां झी आनी सोनी टिव्ही चॅनल एकठांय येतात. तांचें नेटवर्क देशांतलें सगल्यांत व्हडलें आसतलें. सोशल मिडियाय वाडटा. गोंय हें पर्यटन थळ. ताचो आनी पर्यटना कडेन संबंदीत गजालींचो प्रचार करपाची संद गोंयकार कलाकार, तंत्रज्ञांक घेवं येता. सरकार हे बाबतींत कलाकारांक उर्बा दिता. ताची व्याप्ती वाडोवची पडटली. मेळटा तें भायल्यांक आवटसोर्स करचे परस गोंयकारांकूच ताचो एक वांटो केल्यार रोजगाराच्या मळाचेर हांगाचे तरणाटे मुखार येतले. तेन्ना फिल्म सिटी सुरू जावची. आमी वाट पळयतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
