भांगरभूंय | प्रतिनिधी
जाका येता राग, ताका खाता वाग, हें कवीत कोणाकुय राग बी आयल्यार ल्हानपणांत म्हणटाले. तेन्नाचो काळूच वेगळो. वाग ह्या प्राण्याचो धाक आनी भंय सगल्यांक दिसतालो. आयज जग जालां परतें. आयज वागाक मनशाचो भंय दिसता. जीव आसल्यार भीक मागून खायन ही परिस्थीती. शंभर वर्सां पयलीं लाखभर वाग आशिल्ले, आयज साडेतीन हजारुच उरल्यात. वागाचें प्रमाण इतलें देवलां कि आयकून सुद्दा वायट दिसता. तांचेर आयिल्या संकश्टाचेर तोडगो कितें कांय हो सगळ्यांकूच पडील्लो एक प्रस्न.
दर वर्सा 29 जुलय हो दीस आंतरराष्ट्रीय वाग दीस म्हूण मनयतात. हालींच तो सगल्यांनी मनयलो. ह्या दिसाचें खाशेलपण म्हळ्यार लोकां मदीं वाग संरक्षणा विशीं जागृताय निर्माण करप. ह्या दिसा सरकारा वतीन विंगड विंगड कार्यावळीचें आयोजन जाता. फुडल्या कांय वर्सांनी वागाची जमात वाडची तशेंच ती सुरक्षित आसची म्हूण सरकारा वतीन खूप यत्न चलल्यात. वाग बचाव प्रकल्पूय चालीक लायल्यात हें दिसून येता. आतांच्यानूच जर हांचो बचाव जालो ना जाल्यार सगळ्यांक वाग ह्या प्राण्याचो विसर पडटलो. ‘एक था टायगर’ ही गत जायना जाल्यार पुरो, हो चलिल्लो हुस्को. रानां, झाडां वाचयलीं नात जाल्यार एक- एक करून ह्या पर्यावरणाचे भाग नश्ट जावंक वेळ लागचोना. “वाग वाचयात, वागांक जगयात भुरग्यांक वाग पळोवनी उक्त्या दोळ्यांनी, इतिहास जावन पुस्तकांनी न्हय”.
वागाक कोण वळखना म्हूण आसा? ना असो कोण आसचो ना. पूण कांय तेपान आमी वागाची वळखूच विसरतलीं, अशें दिसता. ताच्यो यादी मागीर फकत पुस्तकांनीच आनी युट्यूब्यार घडये पळोवंक मेळत. आता परिस्थीतीच तशी आयल्या मागीर किदें आनी म्हणप? ही गत आमीच केल्या आमच्या सैमाची, आमच्या पर्यावरणाची. देवान निर्मिल्ल्या ह्या संवसारांत वेगवेगळे प्राणी आसात. तांतलोच एक म्हळ्यार वाग. ताच्यो खुपश्यो जाती, प्रजाती आसात.
आमच्या भारत देशाचो राष्ट्रीय प्राणी हो वाग. 1973 वर्सा वागाक ती मान्यताय मेळळी. हो प्राणी खूप शक्तीशाली. तशेच भयानक सभावाचोय आसता. तो केन्ना कोणाचेर घुरी घालीत म्हूण नेम ना. ताचे दोळे सामके तीक्ष्ण आसतात. तो खूप चपळ आसता तसोच धावपाक तो कोणाकूय फाटीं उडयता. ताका पेंवपाकुय बेस बरें तरेन येता. वाग हो मांस खावपी प्राणी देखून शिकार जर दिसली जाल्यार तो आनीक वेळ काडीना. ताचेर केन्नाचीच घुरी घालून ताणें ताका करकरावन खालेंच म्हूण समजुपाचें. दिसपाक माजरा सारको जरी आसलो पूण सभावान मात ताचे सारको नासता. ताचो राबीतो अटंग्या रानांत. जरी तो क्रूर प्राणी आसलो तरी तो आमच्या देशाची संपत जावन आसा. जंगलाक सोबा हाडपी असो हो प्राणी. आमच्या पर्यावरणाची सोबीतकाय वाडोवपी. चडशी जनावरा वागाक थर्त भितात. मनशा तर वागाक पळोवनूच आंग काडटात. पूण ताच्या संरक्षणाची जापसालदारकी ही आमचीच आनी तितलीच ती म्हत्वाची.
राखतले तर वाचतले.
सैम जे सांबाळटले
सोबीतकांय वाडटली ताची
तरूच सुखान तुमी रावतले
करु नाकात अपुरबाय
पूण राखात तरी मनीसपण
तांकांय भोगू दी जिणेचो..
सुखान दर कण
पर्यावरण राखणेचो घेवया आमी सोपूत..
आमी धुवो ह्या सैमाच्यो
आनी आमीच राखणे पूत
लडूक लढे सरल्यात फुडें
नव्यान सरता फुडें आमी
नव्या युगाचे आमी गडे
शिल्पा लाड
8411007204
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
