भांगरभूंय | प्रतिनिधी
विधानसभा अधिवेशनांनी साबार प्रस्नांचेर, समस्यांचेर, येवजण्यांचेर गरमागरम चर्चा जाता. तातूंतले कांय प्रस्न सुटावे जातात, तर कांय म्हयन्याचे म्हयने मुखार वचत रावतात. कांय प्रस्नांचेर फक्त भासाभास करून उपकारना, तर ताचेर शक्य तितले बेगीन तोडगो, उपाय काडचो पडटा. गोंयकारांक माल पडूं येता, अशी समस्या आसल्यार ती चड गंभीरपणान घेवंक जाय. दोन दिसां पयलीं विधानसभा कामकाजांत ड्रग्सांचो मुद्दो आयलो. तो वेगळे तरेचो आशिल्लो. राज्यांतल्या कांय केक, पेस्ट्री दुकानांनी घुंवळे वखदां मिस्तुराद केल्ले केक, पेस्ट्री विकतात, अशें आमदार वेन्झी व्हिएगश हांणी सांगलें. केकींनी मारिजुवाना, ब्रावनी वीड घालतात, अशेंय तांणी म्हणलें. हाचेर मुख्यमंत्री प्रमोद सावंत हांणी कडक पावलां उबारपाचें जाहीर केलां. केकांनी ड्रग्स मिक्स करून विकप, हो व्हडलो गुन्यांव. हो मुद्दो गंभीरपणान घेवपाक जाय. कारण भावी पिळगेचो, भुरग्यांचे भलायकेचो प्रस्न आसा. आमदारान ह्या ड्रग्स केक, पेस्ट्री विशीं सांगलां, म्हणटकूच तांचे कडेन पुरावे आसतलेच. दुबावूच ना. आतां चवकशेचीं रोंदां नेटान घुंवून दोशी बंदखणींत वतले, अशी आस्त.
घुंवळे वखदांचें एकदां व्यसन लागलें, काय तें सोंपेंपणी सुटना. गोंयांत दर्यादेगांचेर ड्रग्स मेळटातूच, पूण ते हायस्कुलां, काॅलेजीं लागसारूय पावल्यात, अशो खबरो पोरूं आयिल्ल्यो… आनी आतां ह्यो बेकऱ्यो! कांय दुकानां? हे केक बेकरी उद्देजक करतात काय कोण घरा तयार करतात, ताचो तपास करचो पडटलो. तरणाटे पिळगेची भलायकी इबाडपी ही कीड आनी तांकां पोसपी कोण गुन्यांवकार आसात जाल्यार तांकां जल्मभर याद उरतली, अशी ख्यास्त मेळची. झटपट पयसो जोडून गिरेस्त जावपाक लोक खंयच्या पांवड्यार वतात, ताचें हें उदाहरण.
अधिवेशनांत जमनीचोय प्रस्न चर्चेक आयला. ही व्हडली समस्या. पर्यावरणाक बादा हाडपी. दोंगर कापतनाचे, आंदोलनाचे, चळवळ करपी समाजसेवकांचें व्हिडिओ, खबरो येतात. पूण उपरांत देड- दोन वर्सांनी त्या कापिल्ल्या दोंगराचेर इमारत उबी जाल्ली दिसता. कितल्याशाच प्रकरणांचेर व्हडलीं आंदोलनां, उपोशणां जाल्लीं, पूण मागीर तीं जैतिवंत जालींच अशें ना. इमारतींक परवानगी दिवपी ती दितात, आंदोलक आंदोलनां करतात, काॅण्ट्रेक्टर ते वटेन चिऱ्यांचेर चिरो दवरून बांदकाम वयर कडीत आसता. राज्यांत दोंगराचें बोड तासपाचे प्रकार घडल्यात, ताचे आड दर खेपे आवाज जाला. मात, कालांतरान ते जमनीचेर इमारत उबी रावल्या, ही वस्तुस्थिती. सरकारी यंत्रणांचें हें मळबायेदें अपेस म्हणचें पडटलें. कालूय आरजीचे आमदार वीरेश बोरकार हांणी कामुर्लेच्या मॅगा प्रकल्पाचेर विधानसभेचें लक्ष ओडलें. थंय स मिटर रुंदायेचो रस्तो तयार करून मेगा प्रकल्पाच्या कामाक हात घाला खंय. हाची पळोवणी करपाचें उतर नगर नियोजन मंत्र्यान दिलां. नेम, कायदो माड्डिला जाल्यार संबंदीत अधिकाऱ्याक निलंबीत करपाचेंय आस्वासन तांणी दिलां. चूक जाल्ली आसल्यार त्या अधिकाऱ्याचेरूच न्हय, तर ताका ती परवानगी दिवपाक सांगपी पेजाद मनशांचेरूय कारवाय जाल्यार बरी! खरें म्हणल्यार संबंदीत सरकारी यंत्रणांनी दोंगरांचेर, शेतांनी तरातरांच्यो इमारती उबारप्यांचीं नांवां तांणी परवानगी घेतली काय जाहीर करपाक जाय. थळाव्या लोकांच्यो सुचोवण्यो मागोवपाक जाय. हालींच दोंगरांनी उजो लागलो. तेंवूय प्रकरण विधानसभेंत आयलें. हाचे फाटल्यान रियल इस्टेट लाॅबीचे संबंद आसात, न्हय ते गुथल्यात, असो आरोप जालो. ताचेर रानां मंत्र्यान, ‘तो फक्त गैरसमज’ अशें सांगलें. हे विशींचे पुरावे सादर करचे, अशेंय तांणी म्हणलां. जर तशे पुरावे आसात, जाल्यार हो प्रकार म्हणल्यार मोनजातीचेर आक्रमणूच म्हणचें पडटलें. हो गंभीर गुन्यांव. कांय वेवसायीक बेधडक कायदो हातांत घेतात, ते कोणाचो तरी आशिर्वाद आसता म्हणूनच.
विधानसभा कामकाजांत आमदार विचारतात, त्या प्रस्नांचेर सरकारी यंत्रणां कडल्यान जापो वतात. म्हणटकूच तांकां सगले प्रस्न, ताचे वयले उपाय खबर आसतले. मागीर ते हे प्रस्न, समस्या सोडोवपाचो यत्न कित्याक करिनात? कांय समस्यांक चिरंतन रूप कित्याक मेळ्ळां?
रस्ते, लायट, कोयर, येरादारी, जमीन, उदकाच्यो समस्याय सासणाच्यो कश्यो? राज्यां मुखार साबार प्रस्न आसात, ते केन्ना सुटावे जातले? दरवेळा आंदोलन करचें
पडपाक जायना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
