भांगरभूंय | प्रतिनिधी
इलेक्ट्रीक गाडयो ही काळाची गरज, अशें म्हणल्यार तें फट थारचें ना. सरभोंवतणी पातळिल्लें प्रदुशण पळयत जाल्यार ई- गाडयांचो आंकडो वाडप म्हत्वाचें. आयज पणजे नितळ उर्जा रॅली आयोजीत केल्या. फाल्यांची हवा शुद्ध आसपाक जाय, तर नितळ उर्जेचो वापर चडांत चड जावंक जाय. समाजानूच ताचे खातीर फुडाकार घेवंक फावो.
इंधनाचेर चलपी गाडयांची संख्या वाडतूच आसा. ती आडायल्यार उदरगतीच्या मार्गार आडमेळीं निर्माण जावं येतात. हाचेर पर्याय, ई- गाडयो. सध्या गोंयांत इंधनाचेर चलपी पंधरा लाखां वयर गाडयो आसात. दरवर्सा तातूंत 50 हजार गाडयांची भर पडटा. भायल्यो गाडयो येतात त्यो वेगळ्यो. आमची लोकसंख्या 17 लाखांच्या आसपास आसा, ताचे वयल्यान वाचकांनी अदमास घेवचो. भौशीक येरादारी कोरोना काळा उपरांत सामकी कोसळ्ळ्या. ताका लागून हाचे मुखार प्रत्येक गोंयकार स्वताची गाडी घेवन भोंवतलो. बायलो पसून. फुडल्या 10 वर्सांनी हें चित्र दिसतलें. तश्यो आयज भोवतेक कुटुंबां कडेन उण्योच तीन तरी गाडयो आसात. (दुचाकी आनी चार चाकी) वाडट्या गाडयांक लागून हवा, आवाजाचें प्रदुशणूय जाता. देखून हाचे मुखार ई- गाडयांचें युग येवपाक जाय. राज्य सरकारान जानेवारी सावन ही सुरवात करपाचें थारायलांच. नव्यो भाड्याच्यो टॅक्सी, दुचाकी आनी पर्यटन टॅक्सी इलेक्ट्रीक आसतल्यो. सरकार 2024 सावन फक्त ई- गाडयो विकत घेतलो. जे कोण गाडयो भाड्यान दिवपाचो वेवसाय करतात, तांच्योय 50 टक्के गाडयो हाचे मुखार इलेक्ट्रीक आसच्यो पडटल्यो. तशी घोशणा मुख्यमंत्री डाॅ. प्रमोद सावंत हांणी केल्या. भौशीक येरादारी, तांची जोडणी निटायेर पडल्यार खाजगी वाहनांचो आंकडो उणो जावं येता. वाडिल्ले अपघात पळयल्यार ते नदरेनूय यत्न जाय. पूण हाचे फुडें ई- गाडयांचेर सगले भर दितले, हे खातीर यत्न करचे पडटले. चार्जींग पाँयटूय वाडोवचे पडटले. सुरवात जाल्या, जानेवारीच्यान तिका वेग येवं.
शेड बांदची, पूण….
गोंय हें तशें शेतकी राज्य न्हय. आदल्या तेंपार भाजी, फळां, भात पिकोवपी शेतकार आशिल्ले. तांचो आंकडो खूप देंवला. तरणाटी पिळगी मातयेंत देंवपाक तयार ना. जांचे कडेन जमीन आशिल्ली, तांणी ती विकून कोटी रुपया बँकेंत दवरल्यात. ताचेर ते जगतात. कांय निजाचीं कुटुंबां आसात, तांणी मात पोरसां फुलयल्यांत. वर्साक 10 ते 40 लाख रुपया पसून थोडे जोडटात. गोंयांत भाजयो पिकयतात ते चड करून आदिवासी. रातदीस कश्ट करपी हो समाज ह्या वेवसायांत अजून आसा. तांचे जमनीचेर काँक्रिटाचीं रानां उबीं रावचीं नात, हाची जतनाय सरकाराक घेवची पडटली.
पयरूच सरकारान भाजयांची विक्री करपाक रस्त्या कुशीक शेड वा आसरो बांदपाची तयारी दाखयल्या. वत, पावसांत रस्त्या देगेक उबें रावन तांकां भाजी, फळां विकचीं पडटात. दरेका मतदारसंघांत एकेक शेड (वट्ट 40) बांदूं येता, अशें सरकाराचें म्हणणें. ताचे भायर खास आदिवासी बाजार संकूल उबारलां ताचें 15 आॅगस्टाक बाणस्तारी उक्तावण जातलें.
पावसाच्या दिसांनी तवशीं, दुदी, घोसाळीं, भेंडे, अळमीं बी घेवन आदिवासी समाजाच्यो बायलो रस्त्याचे कुशीक बसतात. तांकां बऱ्याच समस्यांक तोंड दिवचें पडटा. ताचेर विधानसभेंत भासाभास जाली. तांचे खातीर शेडी बांदतले, तातूंत फक्त आदिवासी समाजाच्या शेतकारांकूच बसपाक मेळटलें काय हेरांकूय आसपावन घेतले, तें स्पश्ट जावंक ना. शेड बांदूनय जर विकपी सदच्या जाग्यार बसले तर तांकां थंयच्यान धांवडायतले? सगल्यांत म्हत्वाचो प्रस्न म्हणल्यार सद्या सगलेच विकपी रस्त्याचे देगेर बसतात. तांचो म्हाल विकत घेवपाक गाडयेकार गाडी अर्दी रस्त्याचेर उबी करतात. पयलींच रस्ते अशीर, तातूंत हें! तेन्ना येरादारीक आडखळ जावची ना, कोंयडी जावची ना, अशे तरेन ही शेड उबारची पडटली. ती रस्त्या भितर बांदली जाल्यार सध्या खपता, तसो म्हाल खपत हाची खात्री दिवंक जावचीना. म्हणटकच ती शेड रिकामी उरली जाल्यार सरकाराची सगली मेहनत उदकांत. भाजी, फळां गोंयच्या शेतांनी, पोरसांनी पिकयिल्लीं आसूंक जाय, अशें आमदारांचें म्हणणें. राज्या भायलो म्हाल विकत घेवन तो शेडींनी विकूंक दिल्यार ह्या उपक्रमा फाटलो उद्देश सफल जावचो ना. शेड उबारपाची कल्पना बरी आसा, ताचेर ह्या शेतकार बायलांचें मत घेवन फुडलें पावल घालूं येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
