भांगरभूंय | प्रतिनिधी
आयज सात जुलय. माधवी सरदेसाय हांची जयंती. जयंती म्हणपाक कितेशेंच जाता. आयज माधवीचो जल्मदीस
अशें म्हणूया. आयच्या समयार माधवीबायचीं साबार रुपां दोळ्यांमुखार येतात. दिगज्ज कवीं मुखार आपली ‘मिठाकणी’ ही कविता मडगांवच्या काम्राच्या सभाघरांत सादर करुन सगळ्यांत चड ताळयो घेवपी माधवी. गोंय विद्यापिठांत म्हाका शणै गोंयबाब आनी कोंकणी व्याकरण शिकोवपी माधवी. एक कर्तव्यदक्ष गृहिणी, ‘जागा’ची संपादक अशीं साबार रुपां दोळ्यांमुखार येतात.
माधवीबायक हांव साबार फावटीं मेळटालों. कोंकणी कार्यावळींनी तर हमखास. इल्लोसो वेळ मेळत जाल्यार खांदार लायिल्ल्या बोटव्यांतलीं जागाचीं प्रुफां तपासपी माधवीबाय आजून दोळ्यां मुखार येता.
माधवीबायचो फ्लॅट बी. पी. एस. क्लबा लागसार. थंयच म्हऱ्यांत आना फोंत गार्डन आसा. हो म्हजो आनी म्हज्या घरकान्नीचो सांजचो पासयेक वचपाचो जागो. ‘जागा’चो नवो आंक आयलो की माधवीबायन म्हाका उमेदीन फोन करप आनी आंक व्हरपाक यो म्हूण सांगप. मागीर पासयेक सावन परततना माधवीबायगेर वचून तो आंक घेवप. आंक दितना माधवीबायच्या तोंडार जें स्मित झळकतालें तेच तरेचो अणभव आयज म्हाका येता. मागीर आमकां आयस्क्रीम खावपाक दिवप. थोड्यो खबरो मारप आनी आमी भायर सरप. माधवीबाय आमकां सकयल पावपाक येतालें. आनी सकयल पावतगीर आपणे बिल्डींगेच्या कंम्पावंडांत लायिल्ली झाडां म्हज्या घरकान्नीक दाखोवप. तांचें पयसुल्ल्यान नातें. परततना घरकान्नीन सदांच म्हणप हें कितलें विद्वान आनी कितलें सादें!
माधवीबायची आनी म्हजी निमणी भेट जाली ती ऑक्टोबर 2013 म्हयन्यांत. अना म्हांब्रो हांकां एप्रिल 2013 त मरण आयिल्लें. अना माधवीबायचें एक दैवत. ‘जागा’चो ऑक्टोबर म्हयन्याचो आंक तांकांच ओंपिल्लो. बरोच दाटगुळो आंक. तो व्हरपाक यो म्हण माधवीबायन म्हाका फोन केलो. सदचे वरी आमी तांगेर गेलीं. ‘जागा’चीं पार्सलां तेन्नाच आयिल्लीं आसूंक जाय. पार्सला हॉलांत आशिल्लीं. माधवीबायन आंक काडून म्हजेकडेन दिलो. खूपच सोबित जाल्लो. आपल्याक दिवाळी आंकय अनाचेर काडपाक जाय. लेखकांनी लेख वेळार दिल्ल्यार पुरो अशें म्हणूंक लागलें. मागीर आनीक दोन आंक म्हज्या हातांत दिवन म्हणूंक लागलें केरळच्यान एक कोंकणी साहित्यीक आयला आनी तो अमक्या हाॅटेलांत रावला. ताका मातशे हे आंक पावते कर. सांजे तो ट्रेनीन वचपाचो.
सदचेवरी आमकां पावोवंक सकयल आयलें. परततना घरकान्न म्हणूंक लागली आयज माधवी बरे फ़्रेशशें दिसना. हांवे म्हळें आतांच विद्यापिठांतल्या आयलां न्ही म्हुणून जायत. पूण, माधवी येद्या व्हडल्या दुयेंसाकडेन झुजतालें हाची मात लेगीत सुलूस कोणाकूच लागली ना.
मागीर फ़ेब्रुवारी म्हयन्यांत माधवी उपचाराखातीर मुंबय गेलां म्हणपाचें कळ्ळें. अशा अवस्थेंत लेगीत तें ‘जागा’चें काम करतालें. तें बरें जावन येतलें अशी सगळ्यांकच आस्त आसली. पूण दुयेंस हळू हळू हाताभायर गेलें. इतले मजगतीं, माधवीबायक डिसेंबर 2014 त ताच्या ‘मंथन’ ह्या लेख संग्रहाक साहित्य अकादेमी आनी बिम्ब पुरस्कार फ़ावो जालो, पूण आपल्या हातांतल्यान हाचेपरस बरें पुस्तक येवंचें आनी ताका पुरस्कार मेळिल्लो जाल्यार बरें जावपाचें, अशें ताका दिसतालें. माधवीबाय इतलें डॉक्टरेट स्कॉलर, भाशेचें जाणकार कोंकणीत दुसरें जालेंना.
22 डिसेंबर 2014 दिसा माधवी बायन निमणो स्वांस घेतलो. तेन्ना हांव मुंबय आसलों. माधवीबायचें निमणे दर्शन घेवंक म्हाका मेळ्ळें ना ताची आयजूय खंत जाता. तेच बराबर माधवीबायच्या अचेतन कुडीचें चित्र म्हज्या स्मृती पटलाचेर ना. आसा तें सदैव हांश्यांच्या गुटल्यांतून हांशे फुटपी अशें हांसतें माधवीचें चित्र!. माधवीबायक नमन.
सखाराम शेणवी बोरकार
9923306751
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
