आयज दिसतलो ‘सुपरमून’

भांगरभूंय | प्रतिनिधी

आयज ‘सुपरमून’ दिसतलो म्हणून खगोलशास्त्र मोगीं खातीर गुरूपुनव हो दीस खूब खाशेलो जातलो. आयज सगळ्यांक व्हडलो आनी खूब तेज आशिल्लो चंद्र पळोवपाची संद मेळटली. हो वर्सातलो सगळ्यांत व्हडलो चंद्र, अशें मानतात. अंदूं 30 ऑगस्ट 29 सप्टेंबराक ‘सुपरमून’ दिसतलो.
‘सुपरमून’ ही एक खगोलीय घडणूक. पुनवेच्या दिसा जेन्ना धर्तरी आनी चंद्र हांचें मदलें अंतर उणें आसता तेन्ना आमकां ‘सुपरमून’ दिसता. धर्तरी आनी चंद्रा मदीं सरासरी अंतर 3,84,400 किमी आसा, पूण ‘सुपरमून’ दिसता ते रातीं हें अंतर 3,70,000 किमी आसता. देखून आमकां ‘सुपरमून’ पळोवंक मेळटा.
दोळ्यांनी ‘सुपरमून’ पळोवंक मेळटा, पूण चंद्राक खूब लागसरल्यान पळोवपाचो आसल्यार दुर्बिणीचोय उपेग करूं येता. खगोलशास्त्राप्रमाण चंद्र धर्तरेच्या लागीं येता तेन्ना दर्याक भरती वा वादळां येवंक शकतात.