प्रधानमंत्री विदेश भेट : रंगारंग आनी राजकारण

भांगरभूंय | प्रतिनिधी

राष्ट्राध्यक्ष, प्रधानमंत्री दुसऱ्या देशांचे राजकी भेटीर आसतना रंगारंग कार्यक्रमांचो अतिरेक राजनितीक प्रसंगाचें गांभीर्य उणावन सगळें पोरांटकेंत उडयता. मोदी हांच्या अमेरिका दौऱ्या वेळार विदेशनिती, राजनिती, वेपार- उद्देग हांचे तुळेन नीता अंबानीची बनारसी साडी, हॉटेलांतली मोदी थाळी, व्हायट हावसांत शाहरूख खानाच्या पिक्चरांतले छैया छैया पद, गायिका मॅरी मिसबेनान मोदीक पांय पडप आनी भारतीय समुदायान देशाचे ध्वज घेवन रस्त्यार नाचप ह्या शिमग्याचेर मिडिया फोकस चड दिसलो. गायक ब्रूस स्प्रींगस्टीनाक बॉस म्हणटात. ऑस्ट्रेलियन प्रधानमंत्र्यान मोदींची रॉकस्टारा वांगडा तुळा करप वा बायडनान आपल्याक तुजो ऑटोग्राफ घेवचो पडटलो अशे मोदींक सांगप हातूंत उपरोधूय आसपाक शकता.
लोकशाय यंत्रणेंत लोकांनी वेंचून दिल्ल्या प्रधानमंत्री मोदींचो दौऱ्याच्या वेळार आमच्या देशांतल्या मीडियान ‘बॉस’ असो उल्लेख करप हातूंत देसेंतकाय दिसना. पयली सुलतान, राजे आपल्या दरबारांत तांची तोखणाय, व्हडवीकाय दिसूयभर गावपी भाट बाळगिताले आता तांची जागा देशांत मीडियान घेतल्या अशें दिसपाक लागलां.
शेड्डे ऋतू नुसार रंग बदलतात. जगाच्या फाटी वयल्या खंड, उपखंडातले धवे, काळे, हळडुवे कातीचो रंग आशिल्ले राजकारणी शेड्डे हे मात सुवार्था खातीर केन्ना रंग बदलत हाचो नेम नासता.
मोदींच्या तीन अमेरिकेच्या दौऱ्यांत थंयच्या तीन राष्ट्राध्यक्षांचे वेळ- काळानुसार बदलते रंग पळोवपाक मेळ्ळे.
आपले भेटींत मोदीन बराक ओबामाचो उल्लेख बराक असो एकेरींत करप आनी 2016 वर्सा बराकान इश्ट मोदीक अपुरबायेन काँग्रेसींत लोकशाये विशीं भाशण दिवपाक निमंत्रित करप हाची त्या वेळार देशांत खूब चर्चा जाल्ली. मोदींच्या हालींच्या अमेरीका भेटी वेळार आता पूर्व राष्ट्राध्यक्ष भूमिकेंत बराकान सीएनएन वाहिनीक दिल्ले मुलाखतींत भारतांतले मानवी हक्क, अल्पसंख्यकांचे हक्क हांचे बाबतीत मोदी सरकाराचे भूमिकेचेर दुबाव घेतलो, हाची चड चर्चा जाली.
ट्रंप राष्ट्राध्यक्ष जाले उपरांत सुरवेक मोदींच्या इंग्लीश उच्चारांची नक्कल करून फकांडां मारतालो. अमेरीका फर्स्ट म्हणत ताणें भारतीयांच्या एच 1 बी 1 व्हिसा कोटा उणावपाचो यत्न केलो. अमेरिकेंत 2020 तल्यो वेंचणुको लागीं पावल्यो आनी ट्रंप शेड्ड्यान रंग बदल्लो. ह्यूस्टनांतल्या ‘हावडी मोदी’ कार्यक्रमांत भारतीय जमावां मदीं मोदींच्या हातात हात घालून ट्रंप दिसलो. मोदीनूय ‘अगली बार ट्रंप सरकार’ म्हणत प्रतिसाद दिलो. उपरांत ट्रंपाक भारतात आमंत्रित करून देशांतल्या करदात्यांचे 120 कोटी मोडून केल्ल्या गुजरातांतल्या भव्य ‘नमस्ते ट्रंप’ कार्यक्रमांत आपलो इश्ट दोलांड (डॉनाल्ड) ट्रंपाक प्रस्तुत करतां, अशी ताची वळख गुजराती भावांक करून दिली. मोदींच्या त्या इश्टान मात भारताक विकसनशील देश म्हूण दिल्ल्यो सवलती रद्द केल्ल्यान आमच्या थंयच्या निर्गते वयले शुल्क वाडले. करोना काळांत आमच्या सरकारचे हात पिळून इश्ट ट्रंपान देशांतले हायड्रोक्सीक्लोरोक्वीन वखदाचे स्टॉक उखल्ले.
अमेरिकेचो नवो राष्ट्राध्यक्ष सूत्रां सांबाळ्ले उपरांत खंयच्या क्रमान जागतिक नेत्यांक फोन करता ताचेर ताचे त्या व्यक्ति वांगडा आनी अमेरिकेची त्या देशा वांगडा इश्टागत झळकता. अमेरिकेचीं सुत्रा हातांत घेतले उपरांत बायडेनान पयलो फोन 9 नोव्हेंबर 2020 दिसा कॅनेडाचो प्रधानमंत्री जुस्तिन त्रुदेव हाका लायिल्लो. बऱ्याच उपरांत 17 नोव्हेंबराक चीनच्या शी जिनपींगाक फोन केले उपरांत ‘इश्ट’ मोदीक फोन केल्लो. मोदीन ट्रंपाचो हावडी मोदी समारंभात प्रचार केल्लो ताचो बायडेनाक आनी कमला हॅरीसाक राग आशिल्लो. तो राग मोदीच्या 2021 च्या व्हायट हावस भेटी वेळार व्यक्त जालो. मोदींच्या आगमना वेळार स्वागताक थंय रेड कार्पेट घाली नाशिल्ली आनी मोदी भितर आनी भायर सरतना व्हायट हावसाच्या दारा मेरेन येवपाचो शिश्टाचार बायडेनान पाळ्ळो ना. त्या वेळार एके संयुक्त पत्रकार परिशदेंत लोकशायेचें म्हत्व समजावन सांगत कमला हॅरीसान मोदीचे कान तोंपपाचे केल्ल्या यत्नाची देशांत निंदा जाल्ली.
ह्या वेळार मात बायडेन आनी हॅरीस हांचो मोदी मोग उपाट भरून व्हांवपाक लागिल्लो. हाची दोन कारणां आसात. मोदी सरकारा कडल्यान 31 प्रीडेटर ड्रॉना खातीर 3 अब्ज डॉलरांची (रू. 25,000 कोटी) ऑर्डर आनी अमेरिकन उद्देजक, कारखानदारांक भारतांत निवेश करपाची संद मेळटली म्हळ्यार खंयचो देश गालिचे घालून स्वागत करचो ना? लग्ना घरांतलीं मंडळी साडी, कपडे खरेदी करपाक बेळगावां दुकानांत पाय दवरतनाच मालक बटाटवडे, च्या, थंड पेयां मागयता तसल्यांतलो हो प्रकार. मोदी वांगडा आपली इश्टागत आनी दाटायेचे प्रदर्शन मांडून व्हडा संख्येन राबित्याक आशिल्ल्या भारतीयांची मतां फुडले वेंचणुकेंत मेळोवप हें दुसरें कारण आसपाक शकता. ते खातीर भोजन समारंभात अमेरिकेंतले भारतीय मुळाचे उद्देगपती, लेखक, विचारवंत, वकिल हांचो व्हड संख्येन आसपाव दिसलो. तातूंत मूळ भारतीय अमेरिकन अंतराळवीरांगना सुनिता विल्यम्स आशिल्ली. 2013 वर्सा ती गुजरांत भोंवडेर आयिल्ली तेन्ना तिने मोदींच्या राज्य सरकाराचो शिश्टाचार मान्य केलो ना आनी मुख्यमंत्री नरेंद्र मोदींची भेटूय घेतली ना, पूण अमेरिकेत प्रधानमंत्री मोदीच्या सम्मानांत दिल्ल्या प्रितीभोजांत मात हजेरी लायली हाचे वयल्यान हे रंगबदल नाटक समजुपाचें.
फुडल्या वर्साच्या देशांतल्या वेंचणूक प्रचार सभांनी भाजप मंत्री, नेते मोदी हांणी जगांत देशाचो गौरव, सम्मान वाडयलो सांगत मतां मागतले. तंत्र, सुरक्षा उपकरणां, शस्त्रां हांचें तंत्रगिन्यान हस्तांतरण करपाच्यो कबलाती जरी जाल्ल्यो आसल्यो तरी ताचे मोल डॉलरांनी फारीक करतना आमकां हें प्रकरण म्हारग पडपाचें आसा. मोदी भेटीचो चड फायदो बायडनाक जालो, अशें दिसता. अमेरिकेन आदींच्यो वेपार सवलती दिवन शुल्क उणावप, आमच्या देशाक फायद्याची थारपी मुक्त व्यापार कबलात करप हाचेर विचार जालो ना. ट्रंपाच्या भारत भेटी वेळारूय ताणें आपले वांगडा दोन देशां मदले वेपार- उद्देग कबलाती करपी खात्याचे प्रतिनिधीमंडळ हाडले नाशिल्ले. मजा मारून गेलो.
इश्टागत कितलीय घटमूट आसली तरी खंयचोय देश आपलें तंत्रगिन्यान आनी शस्त्रास्त्रांची अत्याधुनिक आवृत्ती केन्नाच विकपाक भायर काडिना. दुसरें म्हळ्यार अमेरिके कडल्यान शस्त्रां विकतीं घेतलीं म्हूण आमी सामर्थ्यशाली जाले ह्या भ्रमांत मुरगटपाची गरज ना. अत्याधुनिक शस्त्रागार आशिल्ल्या अमेरिकेक तालिबान्यांनी अफगाणिस्थानांतल्यान कशे खोंटावन धांवडायले तें सगळें जगान पळयलां. अमेरिकेचो दुस्मान रशिया कडल्यान एस- 400 क्षेपणास्त्र यंत्रणा विकती घेतिल्ले खातीर अमेरिकेच्या दुस्मानांचेर आर्थीक निर्बंध लावपी CAATSA कायदो जसो तुर्किये देशाआड लायला तसो तो आमचेआड लायतले अशी धमकी आमकां आदीं अमेरिकेन दिल्ली, हें विसरपाक जायना. ते खातीर इश्टागती कुशीन दवरून संशोधन विकासांतल्यान आमी देशांत शस्त्रां, उपकरणां तयार करून आत्मनिर्भर जाल्ले चड बरें.

दीपक लाड
पर्वरे