भांगरभूंय | प्रतिनिधी
देसांतले फुडले लोकसभा वेंचणुकेचे धोल वाजापाक सुरवात जाल्या. तातूंत एका फाटल्यान एक राजकी फुडारी समान
नागरी कायद्या विशीं उलोवपाक, प्रतिक्रिया दिवपाक लागल्यात. ‘भारताक एक समान नागरी कायदो मेळचो’ हे नदरेन प्रधानमंत्री नरेंद्र मोदी समेस्तांची मानसिकता घडोवपा खातीर ह्या कायद्या विशीं उलोवंक लागल्यात. समान नागरी कायद्याचेर प्रसारमाध्यमां म्हायती दिवंक लागल्यांत, लिखाणाकय आरंभ जाला. त्याच वेळार समान नागरी कायद्या विशींचे एक गोंयकार जाणकार, ज्येष्ठ वकील अॅड. मनोहर उसगांवकार हांच्या मरणाची दुखेस्त खबर येवप म्हळ्ळ्यार गोंयचेंच न्हय तर देसाचें व्हड लुकसाण जावप.
अॅड. उसगांवकार हे फक्त एक म्हान गोंयकारच न्हय तर देसाक मेळिल्ले गिन्यानी व्यक्तित्व. देसाचे कायदेमंत्री जावपाची तांक आशिल्ले अॅड. उसगांवकार राजकारणा पसून पयस रावपी, वेवसायांतले राजकी फुडारी तांकां लागींचे. वेवसायाचेर निष्ठा दवरून वावुरल्यार वेवसायांतल्यान नामना जोडपाक येता, हें तांचे कडल्यान तरणाटे पिळगेन शिकपा सारकें.
खबरांकार म्हणून वावुरतना अॅड. उसगांवकार हांचेकडेन उलयतना चडशी भासाभास कायद्या संबंदान आडमेळीं पयस करपा खातीर आसताली. कायदो वाचपा परस तो समजून घेवप, ताचो अर्थ परिस्थिती प्रमाण लावप आनी भारताच्या संविधानांत खंयच्या कलमांत तो आसा हें सोंप्या उतरांनी सांगपाची कळाशी अॅड. उसगांवकार हांचे कडेन आशिल्ली. कायद्याच्या म्हायतीचें पेटूल उगतें करपाचें तांचें खाशेलेंपण आदले मुख्यमंत्री प्रतापसिंह राणे सांगूंक शकतले.
अॅड. उसगांवकार हे म्हायतीचीं विस्कटावणी करतना वरांची वरां ते सांज वेळा, रातीं उसरां मेरेन आपले कचेरेंत रावताले. राज्याक, देसाक तांची मोलादिक सेवा दिल्याच, त्या भायर पोर्तुगीज कायद्याचो ताणीं केल्लो अणकार सांसणाचो यादींत उरतलो. देसाच्या समान नागरी कायद्याची बांदावळ करपाक तांचीं पुस्तकां उपेगाक येवंक शकतात.
गोंयच्या वकिलांची एक पिळगी कोर्टा कडेन रस्त्या वेल्यान चलत वचत, पोर्तुगीज कायद्याच्या गिन्यानांतल्यान म्हान जाली. अणकारय एका क्लिकाचेर मेळपाचें तंत्रगिन्यान उदरगतींतल्यान, शिक्षणांतल्यान आमचे मेरेन आयज पावलां. ताचो वापर आदवोगादय करतात. अॅड. उसगांवकार हाणीं लॅपटाॅप, मोबायल नासतना केल्लो पुर्तुगेज कायद्यांचो अणकार म्हत्त्वाचो. त्या अणकारा खातीर गोंयचे भूमी, भाटां- बेसांच्या मालमत्तेचे प्रश्न सुटावे जावपाक शकतात. इन्कम टॅक्स कायदो, भाटां- बेसांची गोंयच्या, देसांच्या न्यायालयांत उबंत पडिल्लीं प्रकरणां सुटावीं करपाक वर्साांची वर्सां आयजय लागतात. अॅड. उसगांवकार भाटा- बेसांच्या, इन्कम टॅक्साच्या खटल्यांचे अभ्यासक. गोंयच्या उद्देगपतींचे ते आधार, तांच्या भाटां- बेसांचे, कंपन्यांचो कारभार जाग्यार घालपी. गोंय सरकाराक भूमी विशींचे कायदे करपाक ताणीं मजत केल्या.
गोंयांक स्वतंत्र हायकोर्ट अजून मेळूंक ना, पूण आदले खासदार अॅड. शांताराम नायक हाणीं तो विषय लोकसभे मेरेन व्हेलो तो अॅड. उसगांवकार हांचे वरी ज्येष्ठांचे मागणेंतल्यान. गोंयांत कायदो म्हाविद्यालयां, लाॅ स्कूल, न्यायालयाचो नवो प्रकल्प बांदपाक तांचें मार्गदर्शन मेळ्ळां.
गोंयचे खणींचो उद्देग, वेवसायां विशींच्या कायद्याचे तांकां बरें ज्ञान आशिल्लें. कंपनी कायदो, अर्थकारणाचे कायद्यांत जे बदल जाल्यात ते अॅड. उसगांवकार हांच्या येत्नातल्यान. एकादरो आदवोगाद खटलो जिखता, तो सुप्रिम कोर्टा मेरेन पावन थंय जिखलो जाल्यार त्या खटल्याचेर जाल्ल्या निकालांतल्यान कायदो जाता. अॅड. उसगांवकार खूपशे खटले जिखल्यात, हारल्यातय, पूण आदवोगाद म्हणून ताणीं केल्लें लिखाण हें फुडारा खातीर आसा.
गोंयांतल्यान पुर्तुगेज राजवट गेली, पूण कायदे तशेच शेक गाजोवपा खातीर उरले तेन्ना अॅड. उसगांवकार पुर्तुगेज सरकाराचे मान्यतायेन कायदेय अणकारीत करपाक लागले. त्या कायद्यांचो अणकार पोर्तुगालूय उपेगांत हाडटा आसूंये. कायद्यांचो अणकार वेवस्थित जावचो, छापणावळय सारकी जावची हे खातीर वावुरपी अॅड. उसगांवकार तांच्या भुरग्यांनी पळयल्यात. आपले कडेन आशिल्लें गिन्यान प्रसंगार मनीसपणांतल्यान फुकट (पयशे घेनासतना) वांटपी, पत्रकारांक कायद्याचें पुस्तक दिवपी अॅड. उसगांवकार आमकां पळोवपाक मेळ्ळे. ताणीं आदवोगादच न्हय उद्देगपतीय घडयल्यात. कायदो साहित्य निर्मणे पासत ताणीं देख घालून दिल्या, तांच्या पुस्तकांची जतनाय घेवप, लेखनाची परंपरा फुडें व्हरप हीच तांकां खरीं आर्गां.
सुहासिनी प्रभुगावकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
