भांगरभूंय | प्रतिनिधी
मुकेश थळी… हें नांव गणितांत, अणकारांत, साहित्यांत, कोशांत, गितांत, मनीसपणांत आनी रेडियोंत फाटलीं तीन दशकां आमी
आयकतात. ‘आकाशवाणी पणजी केंद्राचो हो म्हादय चॅनल, मुकेश थळी तुमकां कोंकणींतल्यान खबरो दिता’ हो आवाज गोंयच्या गांवागांवांत आनी शाराशारांत पावला. जेन्ना टीव्ही सारकीं मनरिजवणेचीं कसलींच साधनां नाशिल्लीं, तेन्ना रेडियो हो गितां आयकुपाचो आनी घडिल्ल्यो बातम्यो आयकुपाचें एकमेव साधन.
१९९२ वर्सा हांव आकाशवाणीचेर कॅज्युअल निवेदक म्हूण रुजू जाल्लें. तेन्ना मुकेश थळी हांची भेट जाल्ली. तेन्नासावन मुकेशाक स्टुडियोंत बातम्यो वाचतना पळयला आनी ताची शिस्त नियाळ्ळ्या. वेळा आदीं स्टुडियोंत पावप, मायक अॅडजस्ट करप, टांचण्यो काडून बातम्यो बरोवन हाडिल्ले पेपर वेगळे करप, पध्दतशीरपणान क्रमान मांडप आनी बातम्यो सांगतकच त्यो टांचण्यो थंयच उडयनासतना परत व्हरप… ही शिस्त ताची आमी पळयल्या. ताच्या शिस्तीचीं कितलींशींच उदाहरणां आमच्या मदीं आसात आनी आमी ताका पाळो दितात.
आदीं एकाच व्हडल्या स्टुडियोचें विभाजन केल्लें आसतालें, म्हणल्यार ट्रान्समिशनाचो आनी बातम्यो वाचपाचे स्टुडियो मदीं व्हडलो हारसो घालून वेगळे आसताले. आजून हे स्टुडियो आसात आनी ते वेगवेगळ्या कार्यावळीं खातीर वापरतात. उपरांत लोकांक गीतां आयकूंक दिवपाचो आनी खबरो आयकूंक दिवपाचो ’कंसोल’ एकूच जालो. ते खातीर अदीं मदीं आमकांय केन्नाय बातम्यो वाचच्यो पडटाल्यो. बातम्यो सांगपाची एक खाशेली शैली आसता, मात त्या वेळार आमी मुकेशाच्या मार्गदर्शनान हें तंत्र ताचे मंत्र शिकलीं. रेडियोचेर बातमी आयकुपी व्यक्तीक ती समजुवची हे खातीर स्पश्ट कशें उलोवप, पॉज केन्ना घेवप आनी उलयतना आपली गती कशी नियंत्रणांत दवरप हें सगळें ताणें शिकयलें. ताच्यांत सिम्प्लिफाय करपी टीचर आनी तेच वांगडा शिकत रावपी एक जिज्ञासू विद्यार्थी कायम दिसता.
सारकेंच न्हय? आमी जर ७० किलोमिटर प्रती वर धांवपी ट्रेनीन बसलीं जाल्यार घडये आमकां सरभोंवतणचो वांठार नियाळून ताचो आनंद लुटपाक मेळटलो. तीच गाडी १४० किलोमिटर प्रती वर धांवली जाल्यार? सरभोंवतणचो वांठार दिसतलो? ना न्हय? तेच भशेन आयकुप्याक स्पश्ट आयकूंक येवचें हे खातीर बातमी सांगप्यान वा आरजेन आपल्या गतीचेर कशें नियंत्रण दवरूंक जाय हाचें तत्व, अर्क ताणें आमकां सांगचें.
आकाशवाणीच्या न्युज रूमांत अनंत केळकार, दिलीप देशपांडे, सतिश नायक, धर्मानंद खोलकार आनी गोपाळ चिपलकट्टी सर हांणीय आपली सेवा दिली. मुकेशानूय ह्या न्युज रुमाची प्रतिश्ठा तांचे भशेनच सांबाळून दवरली. आतां मुकेशाच्या मार्गदर्शना खाला तयार जाल्लीं नवीं भुरगींय ही परंपरा मुखार व्हरतलीं आनी आयकुप्यांक बातम्यांचो आनंद दितलीं अशी आस्त आसा.
रेडियोचें काम करूनय मुकेश आपलो आवडीचो विशय गणित आनी साहित्याकय वेळ दिता हो ताचो गूण तोखेवपा सारको. हातांत घेतिल्लें काम पुर्णत्वाक हाडप ही ताची जिद्दूय कोणेंय आत्मसात करची अशी… म्हज्या भुरग्यांचे अभ्यासाची कसलीय डिफीकल्टी ताका कळयली जाल्यार गाडयेंत प्रवासांत आसल्यार लेगीत तत्परतेन रोखडोच मोबायला वेल्यान ऑडियोचेर जाप धाडपी हो मुकेश हो बहुगुणी रसायन. बरो मनीस.
मुकेशान नाटकां बरयलीं आनी दरेक नाटकाक ताणें म्हाका आमंत्रण दितना ’दोतोरा’कूय बरोबर हाड हां म्हूण सांगप… हे खातीर दत्तराजूय म्हज्या बरोबर नाटकाक येवप. थंय माईक (मुकेशाची आई) मेळटकच मन धादोसतालें. हांव कुळाराकच पाविल्लेवरीं दिसतालें… कारण आवयच्या मायेची उब माई कडल्यान मेळटाली.
एकदां खंय आमचे आदले राष्ट्रपती सर्गेस्त ए पी जे अब्दुल कलाम सर हांकां कोणें तरी विचारलें की वाडदीस कित्याक मनोवप, तांणी खंय सट्ट करून सांगलें ‘‘भुरगें जल्मता तेन्ना ताच्या रडपाच्या आवाजान आवयक आनंद मेळटा.” मुकेशान आपल्या गुणांनी माईक अशे कितलेशेच आनंद दिले हातूंत दुबाव ना. माई हें आपलें कोंकणीचें आनी संस्कारितेचें विद्यापीठ जातूंत आपूण घडलों अशें तो सदांच सांगता. मुकेशाच्या साहित्यान आमकांच न्हय तर कितल्याशाच वाचप्यांक आनी रेडियो आयकुप्यांक आनंद दिला हातूंतय दुबाव ना. कोंकणी नादशास्त्र, उच्चारशास्त्र, कोंकणीची मूळ कालेत ह्या सगळ्याचो जादू अणभवचो जाल्यार तो मुकेश-बातम्यांनी. कोंकणीचें ताका उपाट प्रेम. तें प्रेम ताच्या बातमी वाचनांत दिसता.
मुकेश आयज रेडियोवयल्यान रिटायर जाता. पूण म्हाका खबर आसा तो ओग्गी बसून ’रिटायर्ड’ जीण जगपी व्यक्ती न्हय. तो आपल्या नव्या नव्या साहित्यांतल्यान आमचो सगळ्यांचो आनंद द्वीगुणीत करतलो… आकाशवाणीच्या खबरांचो आवाज जाल्ल्या मुकेशाक म्हजी परबीं… ताका दरेक पावलार येस मेळचें ही स्वामी चरणी प्रार्थना….
चारुशीला दत्तराज देसाय
पणजी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
