अबकारी गोलमाल

भांगरभूंय | प्रतिनिधी

खरें म्हणल्यार ताच्या पगारांतल्यान ते सगले पयशे व्याजा सयत वसूल करपाक जाय. ताची मालमत्ता जप्त करपाक जाय.

लग्न जालें काय थोड्यांक पांच परतावण, पूजा अशे थोडे सोपस्कार करचेच पडटात. सरकारी नोकरेचेंय तशेंच. ती मेळ्ळी काय भ्रश्टाचार करपाकूच जाय, नाजाल्यार स्वताचे कर्तबगारीक काळो दाग लागतलो, अशी कांय जाणांची भावना नोकरेच्या पयल्या दिसा सावन आसता. ताका लागून ते उक्तेपणी हात मारतात. लोकांचो रातदीस संपर्क येता, अश्या खात्यांनी तर ‘प्रामाणीकपणान’ भ्रश्टाचार करपी लोक आसात. ते बँकेंत सांठपी पगाराक हात पसून लायनात खंय. भायले जोडीचेर तांचें बरे भशेन चलता. ‘धरलो तर चोर, नातर साव’. लोकूय असल्या दादा- ताईंचे वाटेक वचनात. कारण वाडी दवरली काय एके फावटीन तांचीं कामां जातात. थोडीं कायदेशीर, थोडी बेकायदेशीर. असले कर्मचारी, अधिकारी मागीर एक दीस आडकतात. पयरुच गोरवां सांबाळ खात्याचो आदलो संचालक प्रवीणकुमार पटीदार हाका न्यायालयान 1 वर्साची बंदखण आनी 35 हजारांचो दंड फर्मायलो. ही खबर येता थंय आसा, अबकारी खात्याचे पेडणें कचेरेंत बाॅम्ब फुटलो. बोगस परवाने, पयशे भरिल्ल्याच्यो बोगस पावत्यो दिवन एका युडीसीन (कारकून) ही भानगड केल्ल्याचो दुबाव आसा. तपासा उपरांत ह्या प्रकरणांत फक्त युडीसी आसा काय आनीक भागीदार तें भायर सरतलें. एकल्याक इतलें व्हडलें धाडस जावचें ना. अबकारी खात्यांच्या इतिहासांत अशें पयलेच खेप घडलां आसुये! सरकाराक सुमार 2 कोटी रुपया लुकसाण जालां, अशें कळटा.
गोरवां सांबाळ खात्याच्या संचालकाचो कारनामो मात्सो वेगळो. तणाची पुरवण करपी दोडामार्गाच्या कंत्राटदाराक 23 लाख दिवपाचे आशिल्ले. ताचें बील करतना ताणें 10 टक्के लांच मागली. 15 हजार घेतना ताका भ्रश्टाचार विरोधी पंगडान रंगेहाथ धरलो. 2010 तलें हें प्रकरण. 13 वर्सां जालीं. कालचो अबकारी खात्याचो गोलमाल जाला, तो पेडणें तालुक्यांत. दर्यादेगे वयल्या साबार बार्रांच्या, शॅकांच्या परवान्याचें नुतनीकरण करप, नवे परवाने दिवप हें काम करतना संबंदीत कर्मचाऱ्यान तशें सगलें कायदेशीर केलां. म्हणजे पावतेचेर कचेरेची, बँकेची म्होर मारल्या. सायबाची सही आसा. पूण पयशे सरकार जमा जावंक नात, अशें कळटा. मागीर ते गेले खंय, हाची चवकशी अबकारी वरिश्ठांनी करची? संबंदीत मंत्र्यांनूय हातूंत लक्ष घालून दोशींक कडक ख्यास्त करपाक लावची. 2017 सावन ही भानगड चालू आसा, असो दुबाव. बार्रकारांक नोटीस आयली तेन्ना ते कागदां घेवन गेले आनी आमी पयशे भरल्यात अशें सांगपाक लागले. उपरांत तपासल्यार खंयचे कडेन कांय ना. हे पयशे संगणकाच्या व्हायरसान बी खाल्या आसतले!! एन्ट्री करतकच डाटा फुडले प्रक्रियेक वता तेन्ना कोणाकूच मात पसून दुबाव कसो येवंक ना? बँकेंत पयशे भरप्याकूय दुबाव येवंक ना? अबकारी खात्यान ह्या प्रकाराची चवकशी केली (आतांय करता), मात पत्रकारांक इतले दीस कांयच वास लागूंक दिलो ना. भ्रश्टाचाराचें प्रकरण चेपप हो पसून व्हडलो गुन्यांव. संबंदीत कर्मचाऱ्याचेरूय कांयच कारवाय जावंक ना. ताची बदली केल्या खंय. ताका चवकशी पुराय जाय मेरेन निलंबीत करपाक नाका? दुबावीत दोशी सिद्ध जालो काय ताका खाल्ल्या पयशांचे तुळेन चिमटीभर दंड आनी वर्स, स म्हयन्यांची ख्यास्त जाता. खरें म्हणल्यार ताच्या पगारांतल्यान ते सगले पयशे व्याजा सयत वसूल करपाक जाय. ताची मालमत्ता जप्त करपाक जाय. तसो कायदो ना, जाल्यार तो करचो. 1950 तल्या कायद्यांतल्यो त्रुटी, पळवाटो ना जावप काळाची गरज.
सरकारी भ्रश्टाचार, हप्ते, कमिशन हे प्रकार ना नपयत जातले जाल्यार समाज जागृत जावंक जाय. मात, तातूंतले कांय लोक वायट कर्तुबांत भागीदार जाल्ले पळोवंक मेळटा. कदेलार बशिल्ल्यांक गेल्ले फावट फुलां माळटात, ते हेच लोक. अबकारी खात्याच्या पेडणें विभागांत हें जालां, म्हणटकच हेर विभागांनीय तें जावपाची शक्यताय न्हयकारपाक येना. हो कर्मचारी खंय- खंय काम करतालो, ताची तपासणी केल्यार अधिक म्हायती मेळपाक शकतली. अबकारी खात्यांतल्योच न्हय, तर एकान एक विभाग, खात्यांतल्यो असल्यो प्रवृत्ती तकली वयर काडच्यो नात, हे खातीर उपाय, येवजण करपाची गरज आसा. भोवतेक सरकारी कर्मचाऱ्यांक, अधिकाऱ्यांक फोल्गां मारूं येता इतलो बरो पगार मेळटा. तरीय तांकां लांच घेवपाची, भ्रश्टाचार करपाची, लोकांक लुटपाची वान्सा कित्याक जाता, तें कळना. प्रामाणीक कर्मचाऱ्यांनी ह्या शर्विलकांचो पर्दाफाश करपाक जाय. नाजाल्यार सुक्या वांगडां ओलेंय जळटलें.