भांगरभूंय | प्रतिनिधी
संवसारीक योग दीस सुरू जावन आठ वर्सां जालीं. 21 जून 2015 दिसा तो पयले फावट संवसारभर मनयिल्लो.
प्रधानमंत्री नरेंद्र मोदी हांणी 27 सप्टेंबर 2014 त संयुक्त राष्ट्रांचे सभेंत केल्ल्या भाशणांत योगाचें म्हत्व सांगिल्लें आनी संवसारभर एक दीस थारावन तो मनोवचो अशी इत्सा उक्तायिल्ली. उपरांत हो विचार चालीक लागलो आनी दुसऱ्याच वर्सा सावन संवसारांतलीं 180 वयर राष्ट्रां योग दीस मनोवपाक लागलीं. आयजूय तातूंत खंड पडूंक ना. त्या देशांतल्या प्रत्येक राज्यांत हजारांनी लोक योगासनां करतात. हातूंत बरींच इस्लामी राष्ट्रांय आसात, हें विशेश. भारतांत जल्माक आयिल्ल्या ह्या व्यायाम शास्त्रान आतां सगल्या धर्मांची, संस्कृतायांची, प्रांतांची शीम हुपल्या आनी तें भलायकी जागृत नागरिकांच्या शिरंतरांनी रिगलां, अशें म्हणल्यार अतिताय थारची ना. आमचो भारत देश म्हणल्यार डोंबारी, मांत्रिक, जादुगारांचो देश अशी प्रतिमा एका काळार संवसारभर पातळिल्ली. मात आतां काळ बदल्ला. नेटान विकसीत जावपी, पोरण्या गिरेस्त दायजाचो देश म्हूण आमची वळख निर्माण जाल्या. तिका खत लागतलें, अशें कसलेंच कर्तुब आमी करपाक फावना. योगाक लागून भारताक साबार देशांनी मान मेळपाक लागला. कांय देशांनी तो आपले दिसपट्टे जिणेंत आपणायला लेगीत!
योगाचो उल्लेख हजारांनी वर्सां पयलीं सावन मेळटा. तेन्नाचे ऋशी, मुनींनी ताचो प्रसार केलो. हालींच्या काळांत आचार्य बी. के. अय्यंगार हांणी योग भारतांत आनी संवसारांत लोकप्रीय केलो. तेन्ना टीव्ही, डिजीटल क्रांती निकतीच जाताली. उपरांत बाबा रामदेव हांणी आस्था चॅनलाच्या साह्यान योगांतलीं कांय आसना, अनुलोम, विलोम, कपालभाती वरवीं योग तळागाळा मेरेन व्हेलो. सकाळीं 6 वरांचेर घराघरांनी लोक उठून योग करताले. आयजूय करतात. योग फक्त कुडीक व्यायाम दिना, तर मानसीक भलायकेचीय जतनाय घेता. मनःशांती खातीर योग हो बरो व्यायाम. भूक लागपाक, पचन जावपाक, तणाव पयस करपाक, बरी झेम पडपाक योगा सारको दुसरो उपाय ना. मात, योगासनां करतना तीं शास्त्रशुद्ध पद्धतीन करपाक जाय. स्वास घेवपाची आनी सोडपाची पसून विशिश्ट पद्दत आसा. जाणकार मार्गदर्शका खाला ती केल्यार फायदेशीर थारतात.
योगाचो मुळ संस्कृत अर्थ एकचार, एकवट. मनांतली अस्वस्थताय पयस करून मन एकाग्र करपाक योग शिकयता. मनांतली वायट भावना, दुस्वास तो पयस करता. निजाचो योगी केन्नाच दुसऱ्यांचो द्वेश करीना. ताच्या मुखामळाचेर एक तेज आसता. विशाल दृश्टीकोन, मळबा येदें काळीज, संवसाराचें कल्याण करपाची इत्सा, दुस्माना विशींय मोग… अश्यो जायत्यो भावना योग ताचे कुडींत निर्माण करता. योग हो मना जोडटा, सगल्यांक एकठांय हाडटा. ताका धर्माचे चवकटींत बांदप सामकें चुकीचें. तो सगल्यांनी आपणावचो आनी हेरांक आपणावंक सांगचो. योग हो सगल्या भारतीयांचो, आतां तर पुराय विश्वाचो जाला!
योगशास्त्रांतलीं कांय आसनां शिक्षणीक पांवड्यार शाळा, उच्च माध्यमिक विद्यालयांनी शिकोवपाची गरज आसा. कांय शाळांनी हाची सुरवातूय जाल्या. सकाळीं शाळांनी प्रार्थना जातात, तेन्ना दरदिसा एक आसन (सोंपें) वा सप्तकांतल्यान दोन दीस योगवर्ग घेवं येतात. पयशे दिवन आमी जिमांनी वतात, तशे विदेशांत लोक योग वर्गांक वतात. मात सोंपीं योगासनां घरचे घरा करूं येतात. ते खातीर म्हारगीं उपकरणांय लागनात. योग कोणूय करपाक शकतात. जाण्टो, भुरगो कोणूय. पूण कठीण आसनां मार्गदर्शका खालाच करचीं. दुयेंतींनीय आसनां करतना जतनाय घेवची.
योग हो जिणेक उर्जा दिता. भलायकेंतलो उणाव पयस करता. तो फक्त योग दिसा सोशल मिडियाच्या डीपी वा स्टेटसा पुरतो वा कोणाक तरी आपूणय योग करतां हें दाखोवपाक करचो न्हय. योग हें आमच्या आयुश्याचें म्हत्वाचें आंग जावचें, इव्हेंट न्हय. आयचें युग सर्तीचें, तणावाचें. पूण योगा वरवीं आमी सगल्या शारिरीक, मानसीक संकश्टांचेंर जैत जोडूं शकतात. सध्या आमचो देश गोडेंमूत, रक्तदाबाची (प्रेशर) राजधानी जावपाच्या मार्गाचेर आसा. कोट्यांनी भारतीयांक ह्यो दोन दुयेंसांची बादा जाल्या. सुदृढ भारत, घटमूट भारताचे दिकेन पावलां मारतलो जाल्यार हेर व्यायामां वांगडा प्रत्येकान योगूय शिकचो पडटलो, आपणावचो पडटलो. चलात तर, सुरवात करूंया.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
