शेतकी मळाचेर क्रांती

भांगरभूंय | प्रतिनिधी

शेतकी मळाचेर तशें गोंय फाटीं. चडश्यांचो सरकारी आनी खाजगी नोकऱ्यांचेर भर. उद्देग, वेवसायांतूय खूबशे गोंयकार आसात. फाटल्या 25 वर्सांच्या काळांत गोंयचे भोवतेक वेवसाय परप्रांतांतल्यान हांगां आयिल्ल्यांच्या हातांत गेल्यात. मूळ गोंयकारांचो आंकडो नेटान उणो जायत आसा, शिक्षणाचोय तळागाळांत प्रसार जाला, हें ताचे फाटलें कारण. हांगा बेरोजगारीचो आंकडो व्हडलो आसा. हे नवे, आदले पारंपरिक धंदे, वेवसाय बेकार गोंयकार तरणाट्यांनी आपणाव येताले, पूण कांय आडवाद सोडल्यार ह्या मळाचेर निर्शेवणीच दिसता. शेतकी मळाचेंय तशेंच. एका काळार दरेका गांवांत गोंयकार शेतां पिकयताले, ताचे कडेन संबंदीत वेवसाय करताले, पोरसां लायताले. मात, 25- 30 वर्सांनी मातयेंत राब-राब राबपी हात, पांय उणें जायत गेल्यात. हालींच फळां उत्पादन म्हामंडळान शेतकामत्यांची, तांच्या पिकाची आंकडेवारी दिल्या, ती पळयल्यार मात, गोंयच्या शेतकी मळा विशीं समेस्त गोंयकारांक एक आशा निर्माण जाल्या. गोंयांतल्या गांवठी भाजयांच्या उत्पादनांत 170 टनांची वाड जाल्या. ही वाड फुडले वर्स येता म्हणसर वाडत वतली, ही जापसालदारकी आतां शेतकार आनी शेतकी खात्याची!
गोंय फळां उत्पादन म्हामंडळाच्या आंकड्या प्रमाण, 2021- 22 वर्सा भाजयांचें उत्पन्न 920.71 टन जाल्लें. तेन्ना 970 शेतकार आशिल्ले. तांचो म्हाल विकत घेवन म्हामंडळान तांकां 3 कोटी 23 लाख रुपया दिल्ले. तर अंदूं 2022- 23 त उत्पादनांत वाड जाल्या. 170 टनांची. 1091.07 टन. म्हामंडळान ह्या शेतकारांक अंदूं 4 कोटी 33 लाख रुपया दिल्यात. सांगपाचें म्हणल्यार अंदूं म्हालूय वाडला आनी शेतकारांचो आंकडोय. 970 वयल्यान तो 1115 चेर गेला. अंदूंचे पयले पांच शेतकामतीय म्हामंडळान जाहीर केल्यात. तातूंत धारबांदोडें, मडगांव, काणकोण, कांसावली, शिरोडेंचे शेतकार आसात. तांकां वर्साक 41 ते 12 लाखां मेरेन फायदो जाला. हें वाचून मातयेंत हात म्हेळे केल्यार ‘व्हडलें कांय मेळना रे’ म्हणप्यांचे दोळे उक्ते जाल्या आसतले. वेवसायीक नदरेन उत्पन्न घेवप्यांची गजाल सोडात, पूण जांचे कडेन जमीन, पोरसूं आसा, तांणी स्वताच्या कुटुंबा पुरती भाजी, फळां पिकयलीं जाल्यार ह्या मळाचेर एक वेगळीच क्रांती जातली.
गोंयचो आंवाठ ल्हान, ताका लागून हांगां चड पीक घेवपाक मेळना. आतां आदले सारके शेतकार उरूंक नात आनी जमनीय. शेत कसपा बदला, पोरसूं रोवपा बदला हालींचे नोकरी करपी तरणाटे वाडवडलांची जमीन सरळ विकून उडयतात आनी मेळिल्ले लाख, कोटी बँकेंत दवरून ताच्या आदारान जगतात. साबार शेतां- भाटां, पोरसां- कुळागरांनी आतां काँक्रिटाचीं घरां तकली वयर काडपाक लागल्यांत. दोंगर तर केन्नाच तकले वयलीं झाडां वचून बोडके जाल्यात. हे फांटभूंयेचेर गोंयांत थळाव्या भाजयांचें उत्पादन घेवपी शेतकार वाडटात, ही खोस, उर्बा दिवपी गजाल. शेतकी खात्यान आतां ह्या आनी हेर शेतकारांच्या दारांत वचून तांकां मजत करपाक जाय. वांगडा शेतकामाचो छंद आशिल्ल्या लोकांकूय. तॅर्रास, बाल्कनींत भाजी पिकोवपी लोक आसात, पूण भुंयखंड घेवन घर, बंगले बांदिल्ल्यांक तरातरांची भाजी पिकोवपाची चड संद आसा. शोभेचीं झाडां, माड, फुलांचीं झाडां, पेर, निरपणस दरेका घरा भायर दिसता, पूण मिरसांगो, भेंडे, वांयगीं, दुदी ह्यो भाजयोय दिसच्यो. नर्सरींनीय गांव पाचवें करपाच्या कामांत योगदान दिलां, हें न्हयकारून चलचें ना. शेतकी खात्यान शेतकारांच्यो समस्या सोडयल्यार गोंय फुडल्या 10 वर्सां भितर सुजलाम सुफलाम जातलें, हे विशीं दुबाव ना.
भाजी पिकयली म्हूण जायना, तांकां बाजारपेठूय मेळपाक जाय. फळां उत्पादन म्हामंडळ हें काम करता. पंचायत, पालिका, समाजूय हे बाबतींत बरेंच कितें करूं शकता. मात, ही भाजी म्हारग आसपाक फावना. उत्पादन वाडटकच मोल देंवतलें, हें खरें, पूण भायल्या भाजयांचे तुळेन गांवठी भाजी म्हारग आसता. तरीय गिरायक घेता. (हांगां भायले भेंडें, वांयगीं, विरवील घेवन ते गोंयचे म्हूण विकपी कांयजाण आसात.) गोंयांत गांवठी भाजी जावं वा हेर कसलोय जिनस, गोंयकारांच्यो ताचेर उडयो पडटात, हें वेगळें सांगपाक नाका. ताकाच लागून गांवठी भाजी, फळांचें उत्पन्न वाडपाक जाय. रोजगाराचें हें बरें साधन. म्हामंडळान जाहीर केल्ले आंकडे पळोवन गोंयकारांक हें पटलां आसतलेंच. मात, हाचे फाटल्यान रातदीस केल्ले कश्ट आसात, हें कोणें विसरचें न्हय.