भांगरभूंय | प्रतिनिधी
पैलवानांक लेगीत लैंगीक अत्याच्याराक तोंड दिवचें पडटा? इतले शक्तीशाली आसून लेगीत ते स्वताक वाटावंक पावले नात? अश्या अर्थाचे प्रस्न, दुबाव सामाजीक माध्यमांचेर आनी हेर कडेन आयकूंक आयले उपरांत, समाजांतल्या अज्ञान आनी असमजाची काकुळट दिसचे परस लज चड दिसली. समाजांत खोल मेरेन रोमिल्लीं ही अज्ञानाची बियांच अश्या तरेच्या लैंगीक अत्याचाराक, लैंगीक असमानतायेक आनी वाडपी गुन्यावांक पोसवण दिता हें जर आमकां अजुनय कळना, जाल्यार कसले प्रगल्भ आमी समाज आनी देश म्हूण?
दिशाभूल करप्यांची फाट थापटिता हो समाज
‘दंगल’ चित्रपट आमी जायते जाणांनी पळयला जातलो. आपल्या धुवांक खुस्ती खेळपाक लावपी महावीर सिंग फोगटाची ती खरी काणी. स्वता पैलवान आशिल्लो महावीर सिंग फोगट आपल्या चलयांक खुस्ती खेळपाक लायता तेन्ना ताच्या तोंडात लोक शेण घालतात. चलयो कितें खुस्ती खेळटल्यो? म्हूण ताची फकाणां मारतात. आनी उपरांत मॅडलांचेर मॅडलां हाडून स्वताक आनी स्वताच्या बापायच्या विश्वासाक सिध्द केले उपरांत तेच लोक तांकां माथ्यार घेतात. आयज आमच्या देशांत लैंगीक अत्याचाराच्या आड ताळो फोडून खरें उलोवपी ह्योच महावीर सिंग फोगटाच्यो चलयो. ल्हान आसतना समाजाचीं दुशणां खावपी तांकां आयजूय समाज दुशणांच दिता. खरें उलयल्ले खातीर. आनी तांकां फट थारावपा खातीर ज्या तरेन यत्न चल्ल्यात ते पळयल्यार तांच्या खरेपणाची पावला कणकणी जाण जाता. स्वताच्या कश्टांनी कमयल्लें समाजांतले आपलें स्थान कित्या खातीर पणाक लायला आसतलें ह्या सगळ्यांनी? लैंगीक अत्याचारा सारकेल्ली बाब प्रसिध्दी मेळोवपाक वापरपाची गरज पडूं येता ह्या पैलवानांक? पूण आयज अश्या तरेचे प्रस्नूय विचारून जाले लोकांनी कारण कोणा एका गब्बर राजकारण्याक वाटावपाक खंयच्याय थरार वचूं येता हो समाज आनी ह्या समाजांतले म्हणपाक गेल्यार सुजाण लोक. सोशल मिडीयांत तर असल्यांक पगारी नोकर म्हूण बसयल्ले आसात. प्रस्न विचारपाक, जापो दिवपाक आनी योग्य दिकेन वचप्यांची दिशाभूल करपाक.
कायद्याचो वापर
खरेंच तथ्य आसा ह्या आरोपांनी जाल्यार कायद्याचो आदार कित्याक घेनात हे पैलवान अशेय प्रस्न विचारून जाले ह्या समाजान. कायद्याचोच तर आदार घेवपाचो यत्न करतात दर एकटो. पूण कायदोच जर तोंड फिरयत जाल्यार मागीर कितें करचें मनश्यान? आयज मेरेन लैंगीक अत्याचार जाल्ल्या कितल्या बायलांक परत घरा धाडला ह्या कायद्यान? असल्यो कागाळी केल्यार तुमच्या घराचें नांव वाट लागतलें, कोर्टांत तुमकां नाका जाल्ले प्रस्न विचारतले, तुमच्या चलयां कडेन कोण लग्न जावचो ना, तुमची अब्रु वतली, तुमी किते करताले इतले रातचे भायर, तुमी कित्याक गेल्ले अमुक कडेन आनी तमुक कडेन, येद्या व्हडल्या मनश्या कडेन झगडपाक जातलें तुमकां, ते परस पयशे घेवन मिटयात ही गजाल ना जाल्यार तोंड धांपून ओग्गी रावात असले सल्ले ह्याच कायद्याच्या राखणदारांनी दिवन जाल्यात हाचे पयली. कागाळी बरोवन लेगीत कागाळीच ना जाल्यात हाचे पयली. आनी तरीय कायद्याचेर विश्वास दवरपी वर्सान वर्स लडत आसात आपल्यो केशी, केन्ना तरी निकाल मेळटलो ह्या आशेन. देखून ह्या कायद्याक जागो करपाक केन्ना रस्त्यार येवन आड्डुचें पडटा, जनमानसाक कळोवचें पडटा, चार चौगांचो आदार घेवचो पडटा. तेन्ना कायद्याक जाग येता, हें कोण सांगतलो कायद्याची भास उलयतल्यांक?
सामाजीक आंदोलनां नवीं न्हय आमकां
खरें म्हणल्यार आमच्या समाजाक आंदोलनां नवीं न्हय. रस्त्यार येवन आंदोलनां करपी खरे आनी फट सगळ्या तरेचे लोक पळयल्या ह्या समाजान. आंदोलनांतल्यान बरें आनी वायटूय जातना पळयलां. पूण मागीर आंदोलना चेंपोवपाचो यत्न कित्याक जाता? कित्याक शांत वाटेन वचपी आंदोलन चिगळावन घालपाचो यत्न जाता? स्वताक लैंगीक अत्याचारा पासून वाटावंक शकले नात पैलवान म्हूण तांच्या शारिरीक बळग्याचेर इतलो भरवंसो दवरपी एखादो, त्याच पैलवानांनी आपल्याक ओडीत व्हरपी पुलीसांचेर हात लेगीत उबारलो ना हें पळोवंक शकना व्हय? तरी आसतना तांच्या मान सन्मानाची पर्वा करिनासतना तांकां बंदखणींत उडोवपी पुलीस खंयच्या कायद्याचें पालन करतालो कांय हो प्रस्न येना कोणाच्या मनांत? ह्या देशांत देवा धर्माच्या नांवार, भुता खेतांच्या नांवार लेगीत सामाजीक आंदोलना जालीं. नाशिल्लेच विशय निर्माण करून आंदोलनां पेटोवन घालीं. वेंचणुको लागी पावल्यो काय तर ह्या आंदोलनांक उत येता. पूण लैंगीक अत्याचारा सारकेल्लो एक विशय आमच्या समाजाक आंदोलनाचो विशय दिसना हाचेंच अजाप.
दोळ्यार पट्टी बांदिनासतना आंधळे जाल्यात आमी
न्यायदेवता खंय दोळ्यार पट्टी बांदता. तिच्या मुखार सगळें समान. आमी मात दोळ्यार पट्टी बांद नासतना, सगळें पळोवन लेगीत आंधळ्या वरी वागपाक लागल्यात. कांय जाण तर ह्या पैलवानांक आता खेळांत कोणूक हारयतलो अशी भिरांत दिशिल्ल्यान ते अशे वागतात म्हणून मेकळे. जाल्यार कांय जाणांनी स्वताच्या पदकां वांगडा मेळिल्ली अर्थीक इनामांय परत दिवची म्हूण मागणी केली. सगळ्यो सुखसोयी पांगरुन न्हिदिल्ल्या त्या गुन्यांवकारी कुंभकर्णाक मात कोणूच जाग हाडपाक सोदना. चुकून उठून तांणे आपल्या पदाचो, सत्तेचो, अधिकारांचो वापर केलो जाल्यार? आयज मेरेन तेच तर करत आयला तो. आनी म्हणून तर हें आंदोलन जितले बेगीन काबार जाता तितले बरें. ना जाल्यार ताचे परिणाम फकत कांय पैलवानां पुरते उरचेनात हाची पुराय जाण सत्तेची धुरा हातांत घेवन बशिल्ल्यांक आसा. ते दोळे उघडना तो मेरेन समाजांतल्या सुजाण नागरिकांनी आपले दोळे सताड उक्ते दवरचे पडटले. ना जाल्यार केन्ना कोण खंयच्यान येवन सत्तेचो माज दाखयत, सांगू येना.
अन्वेषा सिंगबाळ
9923442746
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
