भांगरभूंय | प्रतिनिधी
दीस मुखार वतात, तसो समाजांत बदल जायत वता. काळा वांगडा मागीर मनीसूय बदलतात. तो आडावप कोणाकूच शक्य ना. जो काळा वांगडा बदलना तो शेणलो. पूण कितलो बदल जाला, तें नियाळपाक दरेकल्यान भुरगेपणांतल्यो यादी तपासून पळोवच्यो. आदले दीस आनी आतांचे दीस हातूंत जमीन- आस्मानाचो फरक आसा. आदल्या तेंपार फॅन, टीव्ही, मिक्सर, स्कुटरी बगर लोक जियेताले. चडशे नोकरी करीनासले. ल्हानसो घरगुती धंदो वा शेता- भाटांत वावुरताले. कांय लोक खूब कश्ट करताले. घाम गळयताले. देखून तांची भलायकी ठणठणीत उरताली. मात, आयज कदेलार बसून रिमोटा वरवीं टीव्ही लावपाक मेळटा. मोबायल फोनाचेर तरातरांचें मनोरंजन जाताच, पूण कामाचो वाज आयलो जाल्यार मॅसेज करून जेवणा सयत जायतें मागोवं येता. सगलें इन्स्टंट जालां. आहाराचें, न्हिदपाचें वेळापत्रक इबाडलां. व्यायाम ना, तातूंत हुस्को, ताण, धांवपळ, भेसळ खावप- पियेवप… परिणाम मनीस हो दुयेंसाचो पोटलो जाला!
इंडियन कावंसिल आॅफ मेडिकल रिसर्च हांच्या तेंक्यान डाॅ. मोहनस् डायबेटीस स्पेशॅलिटी सेंटर हांच्या फुडारपणा खाला लागीं लागीं सगल्या राज्यांतल्या 1 लाख 13 हजार लोकांचेर आदारून हालींच एक संशोधन केलां. अर्थांत ताचे वयल्यान निश्कर्श काडपाक मेळचो ना. तरीय हें संशोधन आससीएमआर सारके नावाजते संस्थेन केल्ल्यान ताचेर विस्वास दवरचोच पडटलो आनी आमचो देश हो दुयेंतींचो देश जावचो ना, हे खातीर यत्नूय करचे पडटले. हायपरटेंशनाचे (उच्च रक्तदाब, ब्लड प्रेशर) थोडे न्हय, तर 31 कोटी दुयेंती भारतांत आसात, तर गोडेंमुताचे 10 कोटी. हाचें फाटल्यान वखदांच्या कंपनींचें रॅकेट आसा, असो दावो कांय लोक अदीं मदीं करतात, पूण मागीर गोडेंमुताक लागून हेर दुयेंसां जातात ताचें कितें? वर उल्लेख केल्ली जिणेशैली, आहारुय हाका चड जापसालदार आसा, हें न्हयकारूंक मेळचें ना. फक्त प्रेशराचेंच न्हय, तर पोट सुटिल्ले, काळजाचीं साबार दुयेंसां आशिल्ले भारतीय आसात. आतां आनीक एक दुयेंस नेटान वाडत आसा. मोबायलाक लागून. तें म्हणल्यार दोळ्यांची दृश्टी उणी जावप, वक्ल लागप. गोडेंमूत दुयेंस चड खर आसल्यार हें जाताच, पूण आतां ताका मोबायलाचो बुस्टर डोस मेळ्ळा.
गोंयांत खावपा – पिवपाचे शैलींत खूबच बदल जाला. पयलीं कांय थारावीक लोकूच आहाराचे बाबतीत बेफिकीर आसताले. मात, आतां चडशे लोक मेळत तेन्ना खातात. खास करून भायलें खाण. सांजवेळा मसाल्याचें, तेलकट, मांसाहारी खावपाक रस्त्यां कुशीक घिट्टी पडटात. सांजवेळा मनीस पासयेक वतना ताचें पोटूय खाणांचें पासयेक वता. भावी पिळगी पसून ह्या खाणाचे भकीक पडल्या, ही चड हुस्क्याची गजाल….. ह्या उदर भरणा विशीं चड सांगपाची गरज ना. कारण दरेका शारांत, उपनगरांत आनी म्हामार्गांचेर हें दृश्य दिसताच. हें भायलें खावन फाटीं बार्देशांत कांय जाणांक ओंकाऱ्यो, पोटांत दुखप सुरू जाल्लें. जो मेरेन गंभीर घडणूक जायना, तो मेरेन सरकारी यंत्रणाय ओगी रावता. रस्त्या कुशीक खाणां विकलीं म्हूण कोण हरकत घेवचो ना, पूण थंय नितळसाण ही आसपाकूच जाय. तोंडान नितळ गोंय, स्वच्छ गोंय म्हणलें म्हूण उपकारचें ना.
अहवाला प्रमाण, 2030 लागता म्हणसर गांवगिऱ्या वाठारांनीय रक्तदाब आनी गोडेंमूत पावतलें. आनीक 1 3 कोटी लोकांक प्री- डायाबेटीस आसा. डाॅ. मोहनस् सेंटराच्या दोतोरांच्या मतान हातूंतल्या 60 टक्के लोकांक 2028 मेरेन गोडेंमुताचें दुयेंस जातलें. देशाची 70 टक्के लोकसंख्या खेड्यांनी रावता. मागीर कांय वर्सांनी आमी सगलेच दुयेंती म्हणचे पडटले. जाड आसप ह्या दोनूय दुयेंसांक धोक्याचें. अनुवांशिक कारणांक लागून लोक जाड जातात, पूण आतां हेर लोकूय आहार, न्हिद नाशिल्ल्यान जाड जावपाक लागल्यात. देशांत 35 कोटी ढब्बू मनीस आसात. हाय काॅलेस्ट्राॅल आशिल्ले 21
कोटी.
हीं वयलीं दुयेंसां, तांची टक्केवारी, संवयीं हातूंत खंयचीं राज्यां मुखार आसात?? केरळ, पुडुचेरी, सिक्कीम, पंजाब आनी……………. आमचें गोंय! विचार करात!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
