भांगरभूंय | प्रतिनिधी
कांय मरणां मनाक खोल घाय करून वतात. संवेदनशील मनीस अस्वस्थ जाता. अशींच दोन मरणां बेतकेकारांक आयतारा दुख्खांत बुडोवन गेलीं. वाडकार कुटुंबाचो संवसार खिणा भितर उध्वस्त करून गेलीं. हे दुघर्टनेंत आवय- पुताक मरण आयलें. किंदळीचो व्हडलो रुख घरा फाटले शेडीचेर पडलो आनी…..!! पावसाक लागून ह्या झाडा पोंदची जमीन भुसभुशीत जाल्ली, ताका लागून वाऱ्याच्या नेटा बरोबर तें झाड हुमटलें, असो मुळावो अदमास.
झाडां पडपाच्यो ह्यो घडणुको पावसाच्या दिसांनी नव्यो न्हय. पूण हांगा पुराय रुखूच कोसळ्ळो. नेटाचो वारो आयलो काय गांवांगांवांनी झाडांचे खांदे पडटात. तातूंत घराचें लुकसाण जाता. मनीस हानीय जाता. वीज खातें लायटीच्या सरयां लागसार आशिल्ल्यो ताळयो बेणटात. पूण चवथ मेरेन झाड आशिल्लें तशें जाता. लायटीच्या खांब्या वयर बरेच कडेन झाडां आसात. पावसांत सरयांचेर खांदी, चुडत पडलें काय मागीर शाॅर्ट सर्किट जावन त्या वाड्या वयली वा गांवांतली लायट वता आनी लोकांक वराचीं वरां काळखांत रावचें पडटा. लायटीचेर चलपी उपकरणां निकामी जातात, ती गजाल वेगळी. आमचो माड आदलो, वीज खात्यान मागीर खांबे घाल्यात असो युक्तीवाद करपीय गोंयकार आसात!! वीज आमच्या जिविताचो वेगळावं नज असो वांटो जाला, देखून अर्द वर पसून लायट नासल्यार नेण्ट्या पसून जाण्ट्या मेरेन सगलेच काचाबूल जातात. तेन्ना ह्या झाडांचेर कितें तरी सांसणाचो उपाय काडपाक जाय. जमनी पोंदच्यान वीज केबल घालप सुरू जालां, पूण तें केन्ना मेरेन पुराय जातलें, तें कळना.
दुसरी गजाल, धोक्याच्या झाडांची. तीं कापून उडोवपा संबंदी कायदो आसा. पूण तो चालीक लागना. थळाव्या पंचायतींनी पावसांत पडपाची शक्यताय आशिल्लीं झाडां वा खांदयो पळोवन त्यो कापून लोकांक हुस्क्या मेकळे करपाक जाय. कांय कडेन घरधनी वा भाटकार घराचेर आयिल्लीं झाडां कापपाक दिनात. तातूंतलीं थोडीं झाडां उत्पन्न दिवपीय आसतात. तीं कापपाक कोण तरी विरोध करताच. आमकां रुख म्हत्वाचे, पूण ताचे परस लोकांचो जीव मोलादीक, हें आमी विसरूंक फावना. कांय वेळार हीं झाडां कापपाक हजारांनी रुपया लागतात. घराक कांयच लुकसाण करिनासतना तीं कापचीं पडटात. हें तशें कठीण काम. आमच्यो भोवतेक पंचायती तर दुडवांक पादिसेर. त्योय घरांत रावप्यांनी अर्ज दिवन पसून झाड वा झाडाचो खांदो कापपाक फाटीं फुडें जातात. दीस धुकलतात. पावसा पयलीं हीं कामां जावपाक जाय. पूण तीं जायनात. वीज खातें, रानां खात्यान पंचायती, पालिकांचे मजतीन ह्या कामांत फुडाकार घेवंक फावो. दुर्घटना जातकच जागृत जावप चुकीचें. लोकांचेर अन्याय करपा सारकें.
उदरगत ही सगल्यांक जाय. पूण ती करतना पद्दतशीरपणान करपाक जाय. वाऱ्यान हुमटतलीं अश्या झाडांचीं रोपां नवे प्रकल्प उबारतना रोंवपाक जायनात. नवें घर बांदप्यांनीय हें मतींत घेवपाक जाय. रस्तो रुंदीकरण वा गटारां बांदतना झाडांचीं मुळां कापपाचे, ताचे भोंवतणची माती पोखरपाचे प्रकार सदांच घडटात. खोल भुंयेंत मुळां रोमून झाड उबें आसता. मुळां कापलीं वा खणलीं जाल्यार झाड कोसळूं येता, हाचेरुय विचार जावचो. हालींच कळंगूटे वडाचें झाड पडलें. बिल्डरान युक्त करून तें मुद्दाम उडयलें, असो गंभीर आरोप लोकप्रतिनिधीन केला. उदरगत करतना ह्या झाडांचेंय म्हत्व मतींत घेवचें. झाडां आमकां कितें दितात, हें सगल्यांक खबर आसा. पूण घरा लागसार धोक्याचे स्थितींत उबीं आसपीं झाडां आमचें लुकसाणूय करतात. तेन्ना मनीसजातीक धोक्याचीं थारूं येतात तीं झाडां कापप योग्य.
गोंयांत जायते कडेन दोंगरा लागसार वा ताचे धडेर घरां उबीं आसात. पालसणां कोसळून तीं पडपाक शकतात. तातूंत आतां झाडां कापून दोंगरांक नागडे, उघडे करपाचे प्रकार नेटान चालू आसात. दोंगरा वयलीं झाडां माती, फातर घट धरतात. ताका लागून पालसणां कोसळनात. मात आमी कापपाची गरज आशिल्ले रुख कापचे बदला नाका थंयचीं झाडां कापपाक लागल्यात. कारण एकूच. प्लाॅट करून विकप. निदान आतां तरी शाणे जावया. लोकांच्या घरा वयर आयिल्लीं झाडां कायदेशीर मार्गान कापुया. बेतके सारकी दुर्घटना आनीक घडची ना, हे खातीर पावलां उबारुया.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
