भांगरभूंय | प्रतिनिधी
डार्क वेबा वरवीं ड्रग्स मागोवपी स जाणांक राष्ट्रीय गुन्यांव फांट्यान (एनसीबी) धरल्यात. ते खातीर तांकां सप्तकभर तपास करचो पडलो. दिल्ली लागसारच्या नोयडांत (उत्तर प्रदेश) शिकपी एका गोंयकार तरणाट्याक धरतकच हें घुंवळे वखदांचें रॅकेट उक्तें जायत गेलें. हे सगले तरणाटे 22 ते 28 वर्सां पिरायेचे आसात. भितर दिल्लीची एक चलीय आसा. एनसीबीन 15 हजार एलएसडी ब्लाॅट्स जप्त केल्यात. आतां मेरेन धरिल्लो हो सगल्यांत चड सांठो. ताचे भायर अडेज कील गांजो आनी 4 लाख 65 हजार रुपया रोख सांपडल्यात. हो म्हालवज 10 कोटीं रुपयां वयर आसा. हे तरणाटे ह्या रॅकेटाचो वांटो आसात काय ते फक्त वेसनी तें तपासांत उक्ताडार येतलेंच, पूण हो प्रकार भिरांकूळच म्हणचो पडटलो. कारण तो डार्क वेब आनी क्रिप्टोकरन्सीच्या माध्यमांतल्यान चलता. हातूंत कांय देशांचीं नांवां आयल्यांत, नेमके कितले देश घुस्पल्यात तें मात स्पश्ट जावंक ना, पूण राजस्थान आनी हेर राज्यांनी ह्या गैरवेव्हाराचीं पाळां मुळां आसात, असो एनसीबीक दुबाव.
डार्क वेब हो गुपीत इंटरनेट सायटींचो चोंबो. तो वापरपाक खास तयार केल्ले वेब ब्रावजर लागतात. देखीक तोर. सदच्या गुगल क्रोमाचेर ह्यो सायटी मेळनात. सर्च इंजिनाचेरुय त्यो दिसनात. हांगाचे वेव्हार सामके गुपीत. डार्क वेब वापरप कायदेशीर आसा. मात, थंय वचून बेकायदेशीर कृत्य करप हो अर्थांत गुन्यांव. डार्क वेबा वयल्या कांय सायटींचेर लिंगीक गैरप्रकार, आकांतवाद, शस्त्रां विकप…. बेकायदेशीर आसा. पूण, चडशे गुन्यांवकार डार्क वेबाचो (कांय प्रमाणांत टेलेग्रामाचो) नाका जाल्ल्या कामां खातीरुच वापर करतात, अशें तपास यंत्रणांक दिसलां. दुसरी गजाल क्रिप्टोकरन्सीची. हें आभासी चलन. संगणकीय अल्गोरिदमाच्या आदारान तयार केल्ल्या ह्या चलनाक प्रत्यक्ष रुप नासता. मात तें संगणका वरवीं अर्थीक वेव्हारा खातीर वापरुं येता. 2009 त ‘बिटकाॅयन’ आयलें. सातोशी नाकामोटो हांची ही संकल्पना. सध्या शेंकड्यांनी वेगवेगळ्यो क्रिप्टोकरन्सी आसात आनी तांचेर करोडांनी डाॅलरांची उलाढाल जाता.
वयर धरिल्ल्या स तरणाट्यांचें ह्या डार्क वेब आनी क्रिप्टोकरन्सीचो गैरवापर करून ‘खाओ, पिओ, मजा करो’ चलिल्लें. अशे आनीक शेंकड्यांनी तरणाटे आसतले. तरणाटे घुंवळे वखदां घेनात अशें न्हय, पूण ह्या प्रकरणांतले सगले दुबावीत 28 वर्सां पिराये सकयले. गोंयकार तरणाटो विद्यार्थी, म्हणटकच हे उरिल्लेय विद्यार्थी आसूं येतात. ताकाच लागून हेर घुंवळे वखदां प्रकरणां परस हें चड गंभीर. पुलिसांनी खास करून शाळा, काॅलेजांचेर, हाॅस्टेलांचेर लक्ष दवरपाक जाय. थंयचे भुरगे मध्यानरातीं 2, 3 जाय मेरेन हेडटात, ताचे फाटलें कारण सोदून काडपाक जाय. फाटीं वैजकी म्हाविद्यालयाच्या हाॅस्टेलांत घुंवळे वखदां मेळिल्लीं. उपरांत तें प्रकरण वाऱ्यार हुबून गेलें.
ह्या ड्रग्साचे धागेदोरे अमेरिका, पाॅलण्ड, नेदरलॅण्ड मेरेन आसात. धरिल्ले भुरगे गोंय, दिल्ली, नोयडा, केरळ आनी राजस्थानांतले. डार्क वेबाचे मजतीन हें चल्लां हें कळटकच एनसीबी सक्रीय जाली. पयलीं खंय जाळें उडयलें? गोंयां. हांगाच कित्याक? हाचे वयल्यान आमचे सरकारी यंत्रणेन बोध घेवपाक जाय. सोशल मिडिया सायटींचेर नदर दवरतकच पयलो सांपडलो तो गोंयकार. नोयडा शिकपी. खाजगी मेसेंजर अॅप वापरून तो ड्रग्स मागयतालो. मेसेंजराचेर दिल्लीचो एकलो काश्मीराक ड्रग्स धाडटना मेळ्ळो. उपरांत ताणें चलयेचें नांव सांगलें. तिचे कडेन कांय सांपडलें ना, पूण तिणे राजस्थानाच्या मनशाचें (तिचो मोगी) नांव दिलें. ताचे कडेन एसएसडी ब्लाॅट मेळ्ळे. ते तो डार्क वेबा वरवीं मागयतालो आनी विकतालो. ताणें पुण्यां 5000 ब्लाॅटस धाडिल्ले. ते मेळ्ळे.
हो सगलो वेव्हार तंत्रज्ञानाचे मजतीन चलतात. विकपी, गिरायक एकमेकांक प्रत्यक्ष मेळटातूच अशें ना. ब्लाॅट म्हणजे रेव्हेन्यू स्टँपाचो अर्द वाटो. 4 ब्लाॅटांचें वजन 0.1 ग्राम. मोल 4 ते 8 हजार रुपया. बाॅल्सांत लिपयल्यार कोणाकूच कळचें ना. तें जिभेन चाटलें काय नशा येता. आमचो देश घुंवळे वखदांचें केंद्र जालां, अशें एनसीबी म्हणटा. ही सुरय फटास अशें कोणाक म्हणपाक मेळचें ना. गोंयकारांक तरी. केंद्र आनी राज्य सरकारांनी हे ड्रग्स वाळटेचेर लक्ष दिवंक जाय. नाजाल्यार ती आमच्या देशाक पोखरून उडयतली. सुरवात जाल्या. निदान आतां तरी सगल्यांनी सादूर रावचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
