सोशल मिडिया हॅण्डलाक येवकार

भांगरभूंय | प्रतिनिधी

हो जमानो डिजीटलाचो हें सगल्यांक मान्य करचेंच पडटलें. प्रत्येकाच्या हातांत मोबायल फोन पावला आनी ताचे वांगडा इंटरनेटूय. फेसबुक, ट्विटर, इन्स्टाग्राम, व्हाॅट्सअॅप सारक्या सोशल मिडियाचो वापर करपी अब्जांनी लोक संवसारांत आसात. विज्ञान- तंत्रज्ञानाचो आविश्कार आशिल्ल्या ह्या धाकटुल्या उपकरणाचो समाजाचे उदरगतीक खूब हातभार लागला. अर्थांत ताचो वायट उपेग करपीय लाखांनी लोक आसात. पूण, समाजान बरें तितलें घेवपाक जाय. शिक्षण खात्यान पयरूच स्वताचें सोशल मिडिया हॅण्डल सुरू केलां. फेसबूक, ट्विटर, इन्स्टाग्राम आनी युट्युबाच्या माध्यमांतल्यान तें शाळांच्या संपर्कांत रावतलें. ह्या उपक्रमाक राज्यांतल्या शिक्षण संस्थांचो तेंको मेळ्ळो जाल्यार शिक्षणीक मळा वयल्या विद्यार्थी, शिक्षकांक तें फायद्याचें थारतलें, हातूंत दुबाव ना. मात, हे सोशल मिडिया वयले अकावंट सतत अपडेट दवरचे पडटले…. हें काम करप्यांक ताची आवड आनी शिस्त जाय. तरूच हें जातलें. ‘सरकारी मानसिकताय’ म्हणटात ती हांगां उपकारची ना.
सध्या कांय हायस्कूलां सोशल मिडियाचेर अदीं मदीं दिसतात. पूण सक्रिय आशिल्लीं 2- 3 नूच आसुये. तांच्या अकावंटांचेर विद्यार्थ्यांक शिक्षण, खेळां मळाचेर मेळिल्लें यश फोटो वा संदेशाच्या रुपांत पळोवपाक मेळटा. शिक्षण खात्याच्या सोशल मिडिया हॅण्डलाचेर मात सगले तरेचो मजकूर आसतलो. शिक्षक आनी विद्यार्थ्यांची खासा कामगिरी आसतलीच, तशेंच खात्याचीं परिपत्रकां, येवजण्यो, नवे अभ्यासक्रम, अभ्यासा विशीं मार्गदर्शन आसतलें. ताण- तणाव कसो पयस करचो, हाची म्हायती दितले. नव्या शिक्षण धोरणाची म्हायती, गोंय समग्र शिक्षा अभियान आनी हेर शिक्षण संस्थांचे उपक्रमूय ह्या सोशल मिडिया हॅण्डलाचेर आसतले. विद्यार्थ्यांक सगल्यांत चड गरज आसा ती अभ्यास, ताण- तणाव, करियर मार्गदर्शनाची. शिक्षण खात्याच्या युट्यूब चॅनलाचेर राज्यांतल्या वेंचिक 30 शिक्षकांनी दरदिसा सांजवेळा एक- एक विशय शिकोवपाचोय उपक्रम चालीक लावं येता. हे घडयेक विशयाचें ज्ञान, मार्गदर्शन दिवपी बरेच जाण आसात. तांचे व्हिडियो लाखांनी विद्यार्थी पळयतात, सस्क्रायब करतात. भितर गोंयकार विद्यार्थी आसतले. मात, आपल्या शिक्षकान तो विशय शिकयल्यार विद्यार्थ्यांक चड आवडटलो, मानवतलो. फकत विशयूच न्हय, तर सामान्य ज्ञान, करियर मार्गदर्शन करपी बरेच गोंयकार शिक्षक आसात. तांकां ही भांगराची संद शिक्षण खात्यान दिल्यार राज्यांतल्या शिक्षणाचो दर्जोय आनीक सुदारतलो. करियरा विशीं सांगप गरजेचें. कारण आयज सगलेच 80 टक्क्यां वयर गुण घेतात. मागीर रोजगाराच्या बाजारांत तांकां जीवघेणी सर्त करची पडटा. भुरग्याक आपली आवड मतींत घेवन रुचता तें शिक्षण घेवपाक मेळचें, हे खातीर शिक्षण खात्यान ह्या सोशल मिडिया उपक्रमांत भर दिवचो. अमूक कोर्स खंयच्या म्हाविद्यालयांत (गोंय आनी गोंया भायल्या) आसा, तें विद्यार्थ्यांक कळपाक जाय. राज्यांतल्या सगल्या शिक्षकांक, विद्यार्थ्यांक आसपावन घेतल्यार सोशल मिडियाचेर साबार कार्यावळी चालीक लावप शिक्षण खात्याक सोंपें पडटलें. मुख्यमंत्री डाॅ. प्रमोद सावंत हांणी ‘हॅलो गोंयकारा’ ही कार्यावळ केल्या. तसली एखादी लायव्ह कार्यावळ वर्साक तीन ते चार फावटी तरी जावची. म्हणटकच विद्यार्थ्यांच्यो, शिक्षकांच्यो समस्या, प्रस्न समजून घेवपाक मेळटले. तातूंतल्यान मार्ग काडपाक मेळटलो.
बरेच विद्यार्थी पोपटपंची करून पास जातात. तांकां सामान्य ज्ञान, वेव्हारीक ज्ञान तशें उणेंच आसता. तें दिवपाची सामकी गरज आसा. इंग्लीश म्हणजे संस्कृती भ्रश्ट करपी भाशा, असो कांय लोकांचो प्रामाणीक समज आसा. पूण भावना कुशीक दवरून वस्तुस्थिती पळयत जाल्यार आयज पसून पावला पावलार इंग्लीश आदळटा. मुलाखती, प्रकल्पाचें सादरीकरण… भोवतेक कडेन इंग्लीश लागलाच. इंग्लिशीच्या भंयान बरेच विद्यार्थी फाटल्या- फाटल्यान रावतात. ह्या सोशल मिडिया हॅण्डलाचेर इंग्लीश संभाशणाचे वर्ग घेवप इंग्लिशीच्या शिक्षकांक शक्य आसा. ते खास करून तिसरे यत्ते पसून फुडल्या सगल्या यत्तांक आसचे. इंग्लिशी वांगडां गणिताचेय वर्ग घेवं येतात. विद्यार्थ्यां मदल्यान नवे कलाकार, साहित्यीक, संशोधक घडचे, हाचे खातीर सोशल मिडिया हॅण्डल वापरूं येतात. तीं फक्त शिक्षणीक उपक्रमां पुरतीं मर्यादीत दवरचीं न्हय. चडांत चड विद्यार्थ्यांक ह्या हॅण्डलाचेर आस्पावन घेवचे. पदवी घेवन नोकरी लागली तरी ते फाॅलोव्हर म्हूण रावपाक जाय, इतलें बरें शिक्षण खात्याचें हें सोशल मिडिया हॅण्डल आसचें.